ވޭޕް އެތެރެކޮށް، އޭގެ ވިޔަފާރި ފުޅާ ދާއިރާއެއްގައި ކުރަމުންދާ ކަމަށް ތުހުމަތުކުރެވޭ މައްސަލައަކާ ގުޅިގެން ފުލުހުން ހިންގި ހާއްސަ އޮޕަރޭޝަނެއްގައި ގިނަ އަދަދެއްގެ ވޭޕް ކާޓްރިޖްތަކެއް އަތުލައިގެންފި އެވެ.
ފުލުހުން މައުލޫމާތު ދީފައިވާ ގޮތުގައި،އެ އޮޕަރޭޝަންގެ ތެރެއިން މަގުމަތިން ދިވެހި ދެ ފިރިހެނުން ހުއްޓުވައި ވަނީ ސުވާލުކޮށްފަ އެވެ. އަދި އެ މީހުން ދުއްވި ސައިކަލުގެ އިތުރުން، އެ މީހުންނާ ގުޅުންހުރި ކަމަށް ތުހުމަތުކުރެވޭ އަމާން އުދަރެސް އެޕާޓްމަންޓް ބަލައި ފާސްކޮށްފައި ވެއެވެ.
ބަލައިފާސްކުރުމުގެ އޮޕަރޭޝަނުގެ ތެރެއިން ގަވާއިދާ ހިލާފަށް އެތެރެކޮށްފައިވާ ކަމަށް ބެލެވޭ 156 ވޭޕް ކާޓްރިޖާއި ނެނޯ ސްޓިކްތަކެއް ފެނިފައިވާ ކަމަށް ފުލުހުން ބުނެ އެވެ.
އޭގެ އިތުރުން، އެ އެޕާޓްމަންޓުން ވަނީ ކުށް ކޮށްގެން ހޯދާފައިވާ ކަމަށް ބެލެވޭ 6000 އަށްވުރެ ގިނަ ރުފިޔާ ފުލުހުންގެ ބެލުމުގެ ދަށަށް ގެނެސްފައި ވެއެވެ.
މި މައްސަލައާ ގުޅިގެން ހައްޔަރުކުރި މީހުންގެ ތަފްސީލާއި، މި ވިއުގަ ހިންގުމުގައި އިތުރު ބަޔަކު ބައިވެރިވާކަން ނުވަތަ ނޫންކަން މިހާތަނަށް ހާމަކޮށްފައެއް ނުވެ އެވެ.
މި އޮޕަރޭޝަނަކީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، ސެޕްޓެމްބަރު 21، ގައި ކުރިއަށް ގެންދިޔަ އޮޕަރެޝަނެކެވެ.
ވޭޕް ވިއްކައިފި މީހަކު ނަމަ 20،000ރ. އިން ޖޫރިމަނާ ކުރުމާއެކު، ވިއްކި ކޮންމެ ވޭޕަކަށް 10،000ރ. ގެ ޖޫރިމަނާއެއް ވެސް ގާނޫނުގެ ދަށުން ކުރެވެ އެވެ.
