އެންމަޑީގެ ފަތުރުވެރިކަމުން ރާއްޖެއަށް ކޮންމެ އަހަރަކު ގާތްގަނޑަކަށް 311 މިލިއަން ޑޮލަރު (6.2 ބިލިއަން ރުފިޔާ) ލިބޭ ކަމަށް ސާވޭ އާއި ހިސާބުތަކުން ދައްކައިފި އެވެ.
އެންމަޑީގެ ފަތުރުވެރިކަމުން ރާއްޖެއަށް މިހާ ބޮޑު ފައިދާއެއްވާކަން ހާމަވީ ޓުއާ އޮޕަރޭޓަރުންނާ ސުވާލުކޮށް ހެދި ސާވޭއެއްގެ އިތުރުން ފަތުރުވެރިކަމުގެ ހިސާބުތައް ބަލައިގެން ހެދި ދިރާސާއަކުންނެވެ. އެ ދިރާސާގައި ބުނާ ގޮތުގައި އެއީ އެންމަޑީގެ ފަތުރުވެރިކަމުގެ ސަބަބުން ސީދާ ގޮތުން އިގްތިސާދަށް ލިބޭ ފައިސާ އެވެ.
އެ ދިރާސާގައި ބުނެފައިވާ ގޮތުން، އެންމަޑީގެ ފަތުރުވެރިކަމުން ވަންނަ ފައިސާގެ ހިސާބުތަކަށް ބަލާއިރު އެންމަޑިއެއްގެ އަގަކީ 2.6 މިލިއަން ޑޮލަރެވެ. އަދި އާންމުކޮށް ކަނޑުގެ ފުނުން ފެންނަ ބިޔަ މަޑިއެއްގެ އަގަކީ 91،200 ޑޮލަރު ކަމަށް ވެސް ދިރާސާއިން ދައްކަ އެވެ.
އެ ދިރާސާއިން ދައްކާ ގޮތުގައި އެންމަޑީގެ ފަތުރުވެރިކަމުން 2021 ވަނަ އަހަރު އެކަނި ވެސް ރާއްޖެއަށް 227.3 މިލިއަން ޑޮލަރު ލިބުނެވެ. އޭގެ ތެރެއިން ސީދާ އެންމަޑި ބަލަން ފީނުމުގެ ޑައިވްތަކާއި ސްނޯކްލިން ދަތުރުތަކުން ލިބުނީ 39 މިލިއަން ޑޮލަރެވެ. ބާކީ 188.3 މިލިއަން ޑޮލަރަކީ ފަތުރުވެރިކަމާ ގުޅޭ އެހެނިހެން ހިދުމަތްތަކުން ލިބުނ ފައިސާ އެވެ.
"މިއީ ގައުމީ ގްރޮސް ޑޮމެސްޓިކްސް ޕްރޮޑަކްޓުގެ 2.6 ޕަސެންޓު،" އެ ދިރާސާގައި ބުނެފައިވެ އެވެ.
މީގެ ކުރިން، އެންމަޑީގެ ފަތުރުވެރިކަމުން 2008 ވަނަ އަހަރު ލިބުނީ 8.1 ބިލިއަން ޑޮލަރެވެ. ނަމަވެސް އޭގެ ފަހުން 2021 ވަނަ އަހަރާ ހަމައަށް ފާއިތުވި 13 އަހަރުގެ ތެރޭގައި އިންޑަސްޓްރީ ވަނީ 380 ޕަސެންޓު ފުޅާވެފަ އެވެ. ފަތުރުވެރިކަމުގެ ވިޔަފާރި ކުރާ ޓުއާ އޮޕަރޭޓަރުންގެ ތެރެއިން 80 ޕަސެންޓު ވިޔަފާރިތަކުން މިހާރު އެންމަޑީގެ ފަތުރުވެރިކަމުގެ ހިދުމަތް ދެ އެވެ.
"މި އަދަދުތަކުން ދައްކުވައިދެނީ ރާއްޖެއަށް އެންމަޑީގެ އަގުހުރި މިންވަރު. އަދި އެންމަޑީގެ ފަތުރުވެރިކަމުން ލިބެން ހުރި މަންފާތައް ހިމާޔަތް ކުރުމާއި ފަތުރުވެރިކަމުގެ ސަބަބުން އެންމަޑީގެ އާއިލާއަށް ކޮށްފާނެ ނޭދެވޭ އަސަރުތަކުން ރައްކާވެތިބުމުގެ މުހިންމުކަން ވެސް މީގެން ހާމަވޭ،" އެ ދިރާސާގައި ބުނެފައިވެ އެވެ.
އެންމަޑީގެ ފަތުރުވެރިކަން އެންމެ ފުޅާކޮށް ހިނގަނީ ބ. އަތޮޅުގަ އެވެ. އެއީ ޔުނެސްކޯގެ ބަޔަސްފެއާ ރިޒާވެއް ވެސް އޮންނަ އަތޮޅެކެވެ. އެ ބާވަތުގެ ފަތުރުވެރިން ދެން އެންމެ ބޮޑީ އދ. އަތޮޅާއި ކ. އަތޮޅާއި އއ. އަތޮޅުގަ އެވެ. އެކަމަކު، ރާއްޖޭގެ 20 އަތޮޅުގެ ތެރެއިން 19 އަތޮޅުގައި އެންމަޑީގެ ފަތުރުވެރިކަމުގެ ހިދުމަތް ދެ އެވެ.
