ޒިއުރިކް (ޖޫން 3) - އެޑްވާންސް އޮޓޮމޭޓެޑް އޮފްސައިޑް ސިސްޓަމްގެ އެހީ ހޯދައި، މި ފަހަރުގެ ފީފާ ވޯލްޑް ކަޕްގައި ލައިންސްމަނުން އޮފްސައިޑް ދިދަ ނެގުމަށް ހޭދަވާ މުއްދަތު ކުޑަވާނެ ކަމަށް ދުނިޔޭގެ މައި ފުޓްބޯޅަ އިދާރާ، ފީފާ އިން އިއުލާނުކޮށްފި އެވެ.
ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީ ހޯދަން ފެށުމަށް ފަހު، ރެފްރީންގެ ނިންމުންތައް ލަސްވަމުން އަންނަ ކަމުގެ ޝަކުވާ ވަނީ ފުޓްބޯޅަ ސަޕޯޓަރުންގެ މެދުގައި އިތުރުވެފަ އެވެ. އެ ގޮތުން، އޭގެއިން އެއް ހާލަތަކީ ކުޅުންތެރިއަކު އޮފްސައިޑްވެފައި އޮތްތޯ ބެލުމަށްޓަކައި ހޭދަކުރާ ވަގުތު އިތުރުވެ، ލައިންސްމަނުން، އޮފްސައިޑް ދިދަ ނެގުން ލަސްކުރާ ކަންކަމެވެ.
މީގެ ކުރިން ފީފާ ކްލަބް ވޯލްޑް ކަޕާއި އިންޓަކޮންޓިނެންޝިއަލް ކަޕްގައި ވަނީ ސެމީ އޮޓޮމޭޓެޑް އޮފްސައިޑް ޓެކްނޮލޮޖީ ބޭނުންކޮށްފަ އެވެ. އެ ޓެކްނޮލޮޖީގެ އެހީގައި، ކުޅުންތެރިއަކު 50 ސެންޓިމީޓަރަށް ވުރެން ބޮޑުކޮށް އޮފްސައިޑް ވެއްޖެނަމަ، ލައިންސްމަންގެ މައިކްރޯފޯން މެދުވެރިކޮށް، އޮފްސައިޑްވެއްޖެ ކަމުގެ ސިގްނަލެއް ފޮނުވާލައި، ދިދަ ނަގަން އަންގާނެ އެވެ.
އެހެން ނަމަވެސް، މި ފަހަރުގެ ވޯލްޑް ކަޕްގައި އެޑްވާންސް އޮޓޮމޭޓެޑް އޮފްސައިޑް ޓެކްނޮލޮޖީ ބޭނުންކުރަން ނިންމުމާ އެކު، ކުރިން 50 ސެންޓިމީޓަރަށް ވުރެން ބޮޑުކޮށް އިން އެ ބައި، 10 ސެންޓިމީޓަރަށް ބަދަލުވާނެ އެވެ. މާނަ އަކީ ކުރިއަށް ވުރެން އެތައް ގިނައެއް ބޮޑުތަނުން ލައިންސްމަނުންނަށް އޮފްސައިޑް ނިންމުން އަވަހަށް ޔަގީންކުރަން ފުރުސަތު ފަހިވެފައި އޮންނާނެ އެވެ.
ޓެކްނޮލޮޖީގެ އެހީގައި އޮފްސައިޑްގެ ނިންމުން އަވަސްކުރާ ގޮތަށް ހަމަޖެހިގެން ދިޔަ ނަމަވެސް، ލައިންސްމަނުންނަށް ސިސްޓަމްގެ މި ނިންމުމުގައި ގޯހެއް އުޅޭކަމުގެ ހީވުމެއް އޮތްނަމަ، ޔަގީންނިންމުން ނިންމަން ފުރުސަތު ދިނުމުގެ ގޮތުން، ދިދަ ނެގުން ލަސްކޮށްލުމުގެ އިހުތިޔާރު ފީފާ އިން ވަނީ ދީފަ އެވެ.
ފިފާ އިން ބުނީ، މި ބަދަލުތަކުގެ ސަބަބުން، މެޗު ކުރިއަށް ނުގޮސް، ހުއްޓިފައި އޮންނަ އޮތުން ދިގުލައިގެންދިއުމުން ކޮންމެ ވެސް ވަރަކަށް ސަލާމަތްކުރެވޭނެ ކަމަށެވެ.
މީގެ އިތުރުން، ފީފާ އިން ވަނީ އާޓިފިޝަލް އިންޓަލިޖެންސް (އޭއައި) އެހީ ހޯދައިގެން ހުރިހާ ކުޅުންތެރިންގެ 3D އެވަޓާ އުފައްދައިފަ އެވެ. މިކަން ކުރުމަށް، ފީފާ އިން ވަނީ ސިސްްޓަމްގެ ތެެރެއިން، ވޯލްޑް ކަޕްގައި ކުޅޭ 48 ގައުމުގެ 1248 ކުޅުންތެރިންގެ ޑިޖިޓަލް ކާޑެއް ވެސް ތައްޔާރުކޮށްފަ އެވެ. އަދި، މި ކާޑުގެ ވެރިފިކޭޝަން ކުރިއަށްގެންދާާނީ ވޯލްޑް ކަޕްގެ ކުރިން އޮންނަ ކޮންމެ ޓީމެއްގެ ފޮޓޯ ޝޫޓްގަ އެވެ. ފީފާ އިން ބުނީ، ކޮންމެ ކުޅުންތެރިއަކު ސްކޭން ކުރަން ހޭދަވާނީ ސިކުންތެއްހާއިރު ކަމަށް ފީފާއިން ވަނީ ބުނެފަ އެވެ.
