މެޑްރިޑް (ޖޫން 2) - މެންޗެސްޓާ ސިޓީ އަށް ކުޅެމުން އަންނަ ސްޕެއިނުގެ މިޑްފީލްޑަރު، ރޮޑްރީ، އޭނާގެ މުސްތަގުބަލާ މެދު ގޮތެއް ނިންމާނީ މި މަހު، އެމެރިކާ، މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތަށް ފަހު ކަމަށް ބުނެފި އެވެ.
އުމުރުން 29 އަހަރުގެ ރޮޑްރީ ހޯދަން ސްޕެއިނުގެ ގަދަބާރު، ރެއާލް މެޑްރިޑުން އަންނަނީ މަސައްކަތް ކުރަމުންނެވެ. އެތުލެޓިކޯ މެޑްރިޑަށް ކުރިން ކުޅުނު ރޮޑްރީ އަކީ، ރެއާލްގެ ރައީސް ކަމަށް ވާދަކުރާ އެންރީކޭ ރިކޭލްމޭ، އެ މަގާމަށް އިންތިހާބުވެއްޖެނަމަ، ރެއާލަށް ގެންނާނެ ކުޅުންތެރިއެއް ކަމަށް ރިޕޯޓްތައް ބުނެ އެވެ.
މި ހަފްތާ ބަންދުގައި، ރެއާލުގެ ރައީސަކު ހޮވާ އިންތިހާބު އޮންނާނެ އެވެ. ރިކޭލްމޭ ވާދަކުރަނީ ރެއާލްގެ ރައީސަކަށް އެންމެ ފަހުން ވެސް ހުންނެވި ޕެރޭޒްއާ އެވެ.
ރޮޑްރީގެ މުސްތަގުބަލާ ގުޅޭގޮތުން، ނޫސްވެރިންގެ ބައްދަލުވުމެއްގައި އަމާޒުވި ސުވާލަކަށް ޖަވާބު ދެމުން އޭނާ ބުނީ، ކްލަބްގެ ކެރިއަރުގެ ކަންކަމަށް ފިކުރު ކުރުން މި ވަގުތަށް މަޑުޖައްސާލައިފައި ކަމަށެވެ.
"މި ވަގުތު މި ވިސްނަނީ، ވޯލްޑް ކަޕަށް، އެއީ އަހަރެންގެ ޒިންމާ އޮތް ކަމަކީ، އެ އަށް ފޯކަސް މި ކުރަނީ ވެސް. އަހަރެންގެ މުސްތަގުބަލަށް ވިސްނަން ޖެހޭ ކަމެއް މި ވަގުތަށް އޮންނާނީ މަޑުޖައްސާލައިފައި،" ރޮޑްރީ ބުންޏެވެ.
ޕެޕް ގާޑިއޯލާގެ ކޯޗުކަމުގައި ކުޅުމުގެ ވިސްނުމާ އެކު، ރޮޑްރީ، ސިޓީ އަށް ސޮއިކުރީ 2019 ވަނަ އަހަރު އެވެ. މީގެ ދެ އަހަރު ކުރިން، ފްރާންސް ފުޓްބޯލް އިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދިން ބެލޮންޑިއޯ އެވޯޑް ހޯދި ރޮޑްރީ ވަނީ، ސިޓީއާ އެކު، ޕްރިމިއާ ލީގުގެ ޗެމްޕިއަންކަން ހަތަރު ފަހަރު ހޯދުމުގެ އިތުރުުން ޗެމްޕިއަންސް ލީގު ވެސް ކާމިޔާބުކޮށްފަ އެވެ.
މި ސީޒަނަށް ފަހު ސިޓީގެ ކޯޗުކަމުން ގާޑިއޯލާ ވަކިވިއިރު، ރޮޑްރީ ވެސް އަންނަ ސީޒަނުގައި ފެންނާނީ އެހެން ކްލަބަކުން ކަމަށް ވާހަކަ ދެކެވޭއިރު، ރޮޑްރީ ބުނީ، ފުޓްބޯޅަ ކުޅުންތެރިންނާ ގުޅޭގޮތުން، މީޑިއާގައި އަބަދުވެސް އެކި ގޮތްގޮތަށް އަޑުފެތުރޭނެ ކަމަށެވެ.
