މެކްސިކޯ (ޖޫން 2) - ސިޔާސީ ކަމެއްގެ ތެރޭގައި ތާށިވެގެން އިރާންގެ ގައުމީ ފުޓްބޯޅަ ޓީމުގެ ސްކޮޑުން ބާކީކޮށްފައި ހުރި ފޯވާޑް، ސަރުދާރު އަޒްމޫން ނުހިމަނައި، މި މަހު އެމެރިކާ، މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތުގައި އިރާނުން ވާދަކުރާ ސްކޮޑު އިއުލާނުކޮށްފި އެވެ.
ޔޫއޭއީގެ ކްލަބް ޝަބާބް އަލް އަހްލީ އަށް ކުޅޭ އަަޒްމޫން އަކީ އިރާން ގައުމީ ޓީމަށް ދެ ވަނަ އަށް އެންމެ ގިނަ ގޯލު ޖެހި ކުޅުންތެރިޔާ އެވެ. އަޒްމޫނަށް ވުރެން ގިނައިން އިރާން ޓީމަށް ލަނޑު ޖަހައިދީފައިވަނީ ލެެޖެންޑަރީ ފޯވާޑް، އަލީ ދާއީ އެވެ.
ކުރިން ރަޝިއާގެ ޒެނިޓް އާއި އިޓަލީގެ ރޯމާ އަދި ޖަރުމަނުގެ ބަޔާ ލެވަކޫސަނަށް ކުޅުނު އަޒްމޫން ވަނީ، ޔޫއޭއީގެ ރައީސް ޝެއިހް މުހައްމަދު ބިން ރަޝީދުއާ މިދިޔަ އަހަރު ބައްދަލުކޮށްފަ އެވެ. އަދި، އެ ބައްދަލުވުމުގެ ފޮޓޯއެއް އަޒްމޫން ވަނީ އަމިއްލަ އިންސްޓަގްރާމްގައި ހިއްސާކޮށްފަ އެވެ. އަދި، އެ ފޮޓޯގެ ކެޕްޝަންގައި، ޝެއިހް މުހައްމަދު ބިން ރަޝީދު އަށް ތައުރީފުކޮށް ލިޔުންކޮޅެއް ވެސް ހިމަނާފައިވެ އެވެ. މައްސަަލަ ގޯސްވީ، މީގެ އަހަރެއް ކުރިން ކޮށްފައިވާ އެ ޕޯސްޓް ޕިންކޮށްފައި އަޒްމޫންގެ އިންސްޓަގްރާމްގައި ބައިންދަން ނިންމުމާ ގުޅިގެންނެވެ.
އިޒްރޭލާއި އެމެރިކާ އިން ފެބްރުއަރީ 28 ވަނަ ދުވަހުން ފެށިގެން އިރާނަށް ހަމަލާދީ ފަށާފައިވާ ހަނގުރާމައިގެ ތެރޭގައި، އިރާނާއި ޔޫއޭއީގެ ގުޅުން ވެސް ގޯސްވެފައިވާއިރު، އަޒްމޫންގެ މި އަމަލާ ގުޅިގެން، އިރާންގެ މީޑިއާތަކުން ވަނީ އޭނާ އަށް ވަރަށް ބޮޑަށް ފާޑުކިޔައިފަ އެވެ. އިރާނުގެ ފާސް ނިއުސް އެޖެންސީން ރިޕޯޓްކުރާ ގޮތުގައި، އަޒްމޫން، މާޗް މަހު ނެގި އިރާންގެ ގައުމީ ސްކޮޑުން ބާކީކުރީ އިރާން ފުޓްބޯޅަ އެސޯސިއޭޝަން އާއި އެ ގައުމުގެ ސަރުކާރުގެ ނިންމުމަކާ ގުޅިގެންނެވެ.
އިރާން ޓީމަށް 91 މެޗުން 57 ގޯލު ޖަހާފައިވާ އަޒްމޫން އަށް ވޯލްޑް ކަޕް ސްކޮޑުން ފުރުސަތު ނުދޭން ނިންމުމަކީ، އިރާންގެ ކޯޗު، އާމިރު ގަލެނޯއީގެ ނިންމުމެއް ކަމަށް އޭނާ ވަނީ ބުނެފަ އެވެ.
ވޯލްޑް ކަޕްގައި އިރާނުން ކުޅެން ޖެހޭ މެޗުތައް އެމެރިކާގައި އޮތް ނަމަވެސް، އިރާނުން ކޭމްޕްކޮށްފައިވަނީ މެކްސިކޯގަ އެެވެ. އިރާން ޓީމުން އެމެރިކާ އަށް ދާނީ ހަމައެކަނި މެޗުތަކަށް އެކަނި ކަމަށް އެ ޓީމުން ވަނީ ބުނެފަ އެވެ. އެއީ، ފީފާ އާއި އެމެެރިކާގެ ސަރުކާރާއި މެކްސިކޯގެ ރަސްމީ އިދާރާތައް ގުޅިގެން ނިންމާފައިވާ ނިންމުމެކެވެ.
ފީފާ ވޯލްޑް ކަޕުގައި އިރާން އޮތީ ގްރޫޕް ޖީ ގަ އެވެ. އިރާނާއެކު އެ ގްރޫޕުގައި ދެން އޮތީ ބެލްޖިއަމް، އިޖިޕްޓް އަދި ނިއުޒީލެންޑެވެ. އިރާން ކުޅޭ ފުރަތަަމަ ދެ މެޗު އޮތީ ލޮސް އެންޖެލްސްގައި، ނިއު ޒީލެންޑާއި ބެލްޖިއަމާ ދެކޮޅަށް ޖޫން 15 އާއި 21 ގަ އެވެ. އަދި، މިސްރާ ދެކޮޅަށް ކުޅެން އޮތް މެޗު، ޖޫން 26 ގައި ކުޅޭނީ ސިއޭޓަލްގަ އެވެ.
