ސިޑްނީ (މެއި 30) - އަންނަ މަހު އެމެރިކާ، މެކްސިކޯ އަދި ކެނަޑާގައި ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތް ކުުޅުމުގެ އަމާޒުގައި އިޓަލީގެ ޒުވާން ޓީމަށް ކުޅުނު ކްރިސްޓިއަން ވޮލްޕާޓޯ، އޮސްޓްރޭލިއާ އަށް ރަށްވެހިކަން ބަދަލުކޮށްފި އެވެ.
އޮސްޓްރޭލިއާ އަށް އުފަން ނަަމަވެސް، 2020 ވަނަ އަހަރު ރޯމާގެ ޔޫތު ޓީމާ ގުޅުމަށް ޓަކައި، ވޮލްޕާޓޯ ވަނީ އިޓަލީގެ ރަށްވެހިކަން ހޯދައިފަ އެވެ. އަދި، މިހާރު އިޓާލިއަން ލީގުގެ ސަސުއޯލޯ އަށް ކުޅެމުން އަންނަ ވޮލްޕާޓޯ ވަނީ އިޓަލީގެ 21 އަހަރުން ދަށުގެ ގައުމީ ޓީމަށް ވެސް ކުޅެފަ އެވެ. އެއީ، މީގެ ތިން އަަހަރު ކުރިން، 2023 ވަނަ އަހަރު އެވެ.
އެކަމަކު، ހަމައެކަނި ޔޫތު ލެވަލްގައި އިޓަލީ އަށް ކުޅެފައިވާތީވެ، ވޮލްޕާޓޯ އަށް ސީނިއާ ލެވަލްގައި ގުޅުން އޮންނަ އެހެން ގަައުމަކަށް ކުޅެން ގަވާއިދުގެ ތެރެއިން ލިބިފައިވާ ފުރުސަތުގެ ބޭނުންކޮށް އޭނާ ވަނީ އޮސްޓްރޭލިއާ އަށް ބަދަލުވުމުގެ ހުރިހާ މަރުހަލާއެއް މިހާރު ފުރިހަަމަ ކޮށްފަ އެެވެ.
އޮސްޓްރޭލިއާގެ ކޯޗު ޓޯނީ ޕޮޕޯވިޗް، އެ ގައުމުގެ ސްކޮޑު އަންނަ ހޯމަ ދުވަހު އިއުލާނުކުރަން ނިންމާފައިވާއިރު، ވޮލްޕާޓޯ ވަނީ އެ ގައުމުން އެކުލަވާލި ޕްރިިލިމިނަރީ ސްކޮޑުގައި ހިމަނައިފަ އެވެ. އަދި، ފައިނަލް ސްކޮޑުގައި ހިމެނުމަށްޓަކައި، ވޮލްޕާޓޯ ކުރި މަސައްކަތުން ފީފާ އިން ވަނީ އިއްޔެ، އޭނާ އޮސްޓްރޭލިއާ އަށް ކުޅުމަށްޓަކައި ބޭނުންވާ ހުރިހާ ކަމެއް ފުރިހަމަކޮށްދީ ލިޔުން ހަވާލުކޮށްފަ އެވެ.
މީގެ ހަތަރު އަހަރު ކުރިން، ގަތަރުގައި ކުރިއަށްދިޔަ ފީފާ ވޯލްޑް ކަޕްގައި އޮސްޓްރޭލިއާ ޓީމުގައި ހިމެނެން ވޮލްޕާޓޯ އަށް ލިބުނު ފުރުސަތު ދޫކޮށްލަން ނިންމީ، އޭރު ކްލަބް ކެރިއަަރަށް އިސްކަންދިނުމަށް ފަހު، އިޓަލީގެ ފުރުސަތަކަށް މަޑުކުރުމަށްޓަކަ އެވެ. އެކަމަކު، ފަހުން އެ ފުރުސަތު ނުލިބި، އިޓަލީ، ޖެހިޖެހިގެން ތިން ވަނަ ވޯލްޑް ކަޕަށް ވެސް ކޮލިފައިނުވުމުން، އެންމެ ފަހުން، ވޮލްޕާޓޯ މި ވަނީ އޮސްޓްރޭލިއާ އަށް ކުޅެން ނިންމައިފަ އެވެ.
