މޮންޓެވީޑޯ، އުރުގުއޭ (ޖޫން 1) - ރިޓަޔާމަންޓް އުވާލައި ގައުމީ ޓީމަށް ކުޅެން ތައްޔާރަށް ހުރި ކަމަށް އުރުގުއޭގެ ފޯވާޑް، ލުއިސް ސުއަރޭޒް ބުނި ނަމަވެސް އޭނާ ނުހިމަނައި، މި މަހު، އެމެރިކާ އާއި މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތުގެ ސްކޮޑު އުރުގުއޭ އިން އިއުލާނުކޮށްފި އެވެ.
މިދިޔަ މަހު މީޑިއާ އަށް ދިން އިންޓަވިއުއެއްގައި، އެމެރިކާގެ އިންޓަ މިއާމީ އަށް ކުޅޭ ތަޖުރިބާކާރު ފޯވާޑް، ސުއަރޭޒް ވަނީ ގައުމީ ޓީމަށް އެނބުރި އަންނަން ފުރުސަތު ލިބިއްޖެނަމަ ނޫނެކޭ ނުބުނާނެ ކަމަށް ބުނެފަ އެވެ.
އުރުގުއޭ ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތް އުމުރުން 39 އަހަރުގެ ސުއަރޭޒް، ގައުމީ ޓީމަށް ކުޅުން ހުއްޓާލިތާ 19 މަސް ދުވަސް ވަނީ ވެފަ އެވެ. އަދި، މިދިޔަ އަހަރުގެ މެއި މަހު މީޑިއާގައި ވާހަކަ ދައްކަމުން އުރުގުއޭގެ ކޯޗު މާސެލޯ ބިއެލްސާ އަށް ވަނީ ފާޑުކިޔައިފަ އެވެ.
އުރުގުއޭ ގައުމީ ޓީމަށް ހަަތަރު ވޯލްޑް ކަޕްގައި ކުޅެދީފައިވާ ސުއަރޭޒް ވަނީ ގައުމީ ޓީމަށް ކުޅެދިން 143 މެޗުން 69 ލަނޑު ޖަހައިފަ އެވެ. އެ ގޮތުން، 2010 ވަނަ އަހަރުގެ ވޯލްޑް ކަޕްގައި ގާނާގެ އަސަމޮއޯ ޖިޔާން ޖެހި ބޯޅައެއް ގޯލު ރޮނގުމަތިން އަތްލައި ހުއްޓުވި ސުއަރޭޒަށް އޭގެ ހަތަރު އަހަރު ފަހުން ވަނީ އިޓަލީގެ ޑިފެންޑަރު ޖިއޮޖިއޯ ކިއެލީނީ ގައިގައި ދަތްއަޅައިގެން ވެސް އަދަބު ދީފަ އެވެ. އެ ގާނާ މެޗުގައި ރަތެއް ދެއްކި ސުއަރޭޒަށް، ކިއެލީނީ ގައިގައި ދަތް އަޅައިގެން ހަތަރު މަހުގެ ސަސްޕެންޝަނެއް އަަތުވި އެވެ.
އުރުގުއޭ އިން ވޯލްޑް ކަޕަށް ނެގި 26 ކުޅުންތެރިންގެ ސްކޮޑުގައި ސުއަރޭޒް ނުހިމެނި ސަބަބާ ބެހޭގޮތުން، ސީދާ ޖަވާބެއް ބިއެލްސާ ވެސް ދީފައިނުވާއިރު، މެންޗެސްޓާ ޔުނައިޓެޑްގެ މެނުއަލް އުގާޓޭ އާއި އަލް ހިލާލްގެ ޑާވިން ނޫނޭޒަށް ވަނީ ސްކޮޑުން ފުރުސަތު ދީފަ އެވެ.
މި ފަހަރުގެ ވޯލްޑް ކަޕްގައި އުރުގުއޭ ހިމެނެނީ، ސްޕެއިން އާއި ކޭޕް ވާޑޭ އަދި ސައުދީ އަރަބިއްޔާއާ އެކު ގްރޫޕް އެޗްގަ އެވެ. އުރުގުއޭގެ ފުރަތަމަ މެޗު އޮތީ ޖޫން 15 ވަނަ ދުވަހު، ސައުދީ އަރަބިއްޔާއާ ދެކޮޅަށެވެ.
