އަމްސްޓެޑަމް، ނެދަލެންޑްސް (ޖޫން 2) - މި މަހު ފަށާ ފީފާ ވޯލްޑް ކަޕް ފުޓްބޯޅަ މުބާރާތަށް ނެދަލެންޑްސްގެ ފޯވާޑް މެމްފިސް ޑިޕާއި އެއްކޮށް ފިޓްވާނެ ކަމަށް ބުނެފި އެވެ.
ނެދަލެންޑްސް ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތް ޑިޕާއިގެ ފަލަމަސްގަނޑަށް މިދިޔަ މާޗް މަހު ލިބުނު އަނިޔާއިން ރިކަވާވެގެން ކުޅުމަށް އެނބުރި އާދެވުނީ މިދިޔަ ހަފްތާގަ އެވެ. އުމުރުން 32 އަހަރުގެ ޑިޕާއި ވަނީ 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕާއި މީގެ ހަތަރު އަހަރު ކުރިން ގަތަރުގައި ކުރިއަށްދިޔަ ވޯލްޑް ކަޕްގައި ވާދަކުރި ނެދަލެންޑްސް ޓީމަށް ކުޅެފަ އެވެ.
ރޮނާލްޑް ކޫމަންގެ ކޯޗުކަމުގައި މި ފަހަރުގެ ވޯލްޑް ކަޕްގައި ކުޅޭ ނެދަލެންޑްސް ޓީމަށް ޑިޕާއި ނެގުމުން ގިނަ ފާޑުކިޔުން އަމާޒުވި އެވެ. އެއީ، އެއްކޮށް ފިޓް ނޫން ކުޅުންތެރިއަކުގެ ބަދަލުގައި، ފޯމުގައި ހުރި ފިޓް ކުޅުންތެރިއަކު ނެގުން މުހިންމު ކަމަށް ބުނެ އެވެ.
ނެދަލެންޑްސްގެ ޓްރެއިނިން ކޭމްޕްގެ ތެެރެއިން ނޫސްވެރިންނަށް މައުލޫމާތު ދެމުން ޑިޕާއި ބުނީ، އެހެން ކުޅުންތެރިންގެ ވާހަކަ ދެއްކުމަށް ވުރެ އަމިއްލަ ނަފްސަށް އިސްކަަންދޭން ވިސްނާ ކަމަށެވެ.
"އަހަންނަށް އެނގޭ ތި މީހުން ތި ސުވާލުތައް ތި ކުރަނީ ކީއްވެކަން. އަހަންނަށް އެއްވެސް އިރެއްގައި ޝައްކެއް ނެތް، ވޯލްޑް ކަޕްގެ ޖާގައަކާ މެދުގައި. ރަނގަޅު ވާހަކައެއް، އަނިޔާގެ ސަބަބުން އަހަރެންގެ ރިކަވަރީ ދިޔައީ ހީކުރި ވަރަށް ވުރެން ދިގުކޮށް، ކަންތައްތަކެއް ދިޔަ ވާން ޖެހޭ ގޮތް ނޫން ގޮތަކަށް. އެ ވާހަކަ މިހާރަކު ދެއްކުމުގެ ބޭނުމެއް ވެސް ނެތް. އިންޖަރީ އަސްލު އެހާ ސީރިއަސްއެއް ވެސް ނޫން،" ޑިޕާއި ބުންޏެވެ.
ނެދަލެންޑްސް ގައުމީ ޓީމަށް 108 މެޗު ކުޅެދީފައިވާ ޑިޕާއި، އަނިޔާ އަށް ފަހު އެނބުރި އައިސް، އޭނާ ކުޅެމުން އަންނަ ކްލަބް، ބްރެޒިލްގެ ކޮރިންތިއަންސްގެ ދެ މެޗެއްގައި ކުޅެފައިވެ އެވެ. އެއީ، 29 މިނިޓާއި 45 މިނިޓެވެ. ވޯލްޑް ކަޕަށް ތައްޔާރުވާން ނެދަލެންޑްސް އިން އެމެރިކާގައި ދެ މެޗެއް ކުޅޭނެ އެވެ. އެއީ، އަލްޖީރިއާ އާއި އުޒްބެކިސްތާނާ ދެކޮޅަށް ކުޅޭ މެޗުތަކެވެ.
ޑިޕާއި ބުނީ އެ ދެ މެޗުގައި ކުޅުމުގެ ފުރުސަތު ލިބި، ނެދަލެންޑްސް އިން ވޯލްޑް ކަޕްގައި ކުޅޭ މެޗުތަކަށް ފުރިހަމަ އަށް ތައްޔާރުވެވޭނެ ކަމުގެ ޔަގީންކަން އެބައޮތް ކަމަށެވެ.
ނެދަލެންޑްސް އިން މި ފަހަރުގެ ވޯލްޑް ކަޕްގައި ވާދަކުރާ ގްރޫޕްގައި ހިމެނެނީ، ޖަޕާން އާއި ސްވިޑެން އަދި ޓިއުނީޝިއާ އެވެ.
