ބީނޯޒް އެރީސް، އާޖެންޓީނާ (މެއި 29) - އަންނަ މަހު އެމެރިކާ އާއި މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕް ފުޓްބޯޅަ މުބާރާތުގައި ކުޅޭނެ އާޖެންޓީނާގެ ސްކޮޑުގައި، އެ ޓީމުގެ ތަރި، ލިއޮނަލް މެސީ، ހިމެނުމާ އެކު، އޭނާ އަށް ހަ ވަނަ ވޯލްޑް ކަޕެއްގައި ގައުމު ތަމްސީލްކުރުމުގެ ފުރުސަތު ލިބިއްޖެ އެވެ.
އުމުރުން 38 އަހަރުގެ މެސީ، އަކީ ޕޯޗުގީސް ތަރި، ކްރިސްޓިއާނޯ ރޮނާލްޑޯ، 40، އާ އެކު، ތަފާތު ހަ ވޯލްޑް ކަޕެއްގައި ފެންނާނެ ދެ ވަނަ ކުޅުންތެރިޔާ އެވެ. މި ފަަހަރުގެ ވޯލްޑް ކަޕްގައި ޕޯޗުގަލް އިން ނެރޭ ޓީމުގައި، އަލް ނަސްރަށް ކުޅޭ ރޮނާލްޑޯ ވަނީ ހިމަނައިފަ އެވެ. މެސީ، ވޯލްޑް ކަޕްގައި 26 މެޗު ކުޅެފައިވާއިރު، އޭނާ އަކީ މުބާރާތުގެ ތާރީހުގައި، އެ އަދަދަށް މެޗު ކުޅުނު ހަމައެކަނި ކުޅުންތެރިޔާ އެވެ.
ރޮނާލްޑޯ ހަ ވަނަ ފަހަރަށް ފީފާ ވޯލްޑް ކަޕަށް
ޕޯޗުގަލްގެ ކެޕްޓަންކަން ކުރަމުން އަންނަ ކްރިސްޓިއާނޯ ރޮނާލްޑޯ ހިމަަނައިގެން، މި ފަހަރު އެ ގައުމުން ފީފާ ވޯލްޑް ކަޕްގައި ކުޅޭ ސްކޮޑު އިއުލާނުކުރިއިރު، މިއީ އޭނާ ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ވޯލްޑް ކަޕްގައި ކުޅޭ ހަ ވަނަ ފަަހަރު
ދާދި ފަހުން، އެމެރިކާގެ ފުޓްބޯޅަ ލީގު، މޭޖަ ލީގު ސޮކާ (އެމްއެލްއެސް)ގައި އިންޓަ މިއާމީ ކުޅުނު މެޗެއްގެ ތެރެއިން، މެސީގެ ފަޔަށް އަނިޔާވި ނަމަވެސް، އެއީ ސީރިއަސް ކަމެއް ނޫންކަން އެ ކްލަބުން ވަނީ ބުނެފަ އެވެ.
ގައުމީ ޓީމަށް 198 މެޗު ކުޅެފައިވާ މެސީ، ވޯލްޑް ކަޕްގެ ކުރިން އާޖެންޓީނާ އިން ކުޅޭ އެކުވެރިކަމުގެ މެޗުތަކުގައި ކުޅޭނީ އަނިޔާއިން އެއްކޮށް ރިކަވާވެއްޖެނަމަ އެވެ. ވޯލްޑް ކަޕްގެ ކުރިން އާޖެންޓީނާ އިން ޖޫން ހަތް ވަނަ ދުވަހު، ހޮންޑިއުރަސްއާ ކުޅުމަށް ފަހު، ދެ ދުވަސް ފަހުން އައިސްލެންޑާ ކުޅޭނެ އެވެ.
އާޖެންޓީނާގެ ކޯޗު، ލިއޮނަލް ސްކަލޯނީ، މިއަދު އިއުލާނުކުރި އެ ގައުމުގެ 26 ކުޅުންތެރިންގެ ވޯލްޑް ކަޕް ސްކޮޑުގައި މީގެ ހަތަރު އަހަރު ކުރިން، 2022 ވަނަ އަހަރު ގަތަރުގައި ބޭއްވި ވޯލްޑް ކަޕް ކާމިޔާބުކުރި ޓީމުގައި ކުޅުނު ގިނަ ކުޅުންތެރިން ހިމެނެ އެވެ. އެ ގޮތުން އެ ފަހަރުގެ ކެޕްޓަން، މެސީގެ އިތުރުން، ގޯލްކީޕަރު، އެމިލިއާނޯ މާޓީނޭޒް އާއި ރޮޑްރީގޯ ޑެ ޕޯލް ފަދަ ކުޅުންތެރިންނަކީ މި ފަހަރުގެ ސްކޮޑުގައި ވެސް މުހިންމު ރޯލެއް އަދާކުރާނެ ކުޅުންތެރިންނެވެ.
މި ފަހަރުގެ ވޯލްޑް ކަޕްގައި އާޖެންޓީނާ އިން ވާދަކުރަނީ ގްރޫޕް ޖޭގަ އެވެ. ގްރޫޕްގައި އާޖެންޓީނާ އިން ކުޅޭ ފުރަތަމަ މެޗުގައި ޖޫން 17 ވަނަ ދުވަހު ކުޅޭނީ އަލްޖީރިއާއާ އެވެ. ދެ ވަނަ މެޗުގައި، ޖޫން 22 ވަނަ ދުވަހު އޮސްޓްރިއާއާ ކުޅުމަށް ފަހު، ގްރޫޕް ސްޓޭޖުގެ ފަހު މެޗުގައި، ޖޯޑަންއާ ބައްދަލުކުރާނީ ޖޫން 28 ވަނަ ދުވަހު އެވެ.
