މި އަހަރުގެ އަޟުޙާ ޢީދުގެ ބަންދާ ގުޅިގެން ސަރުކާރު ބަންދުވާ ދުވަސްތަކުގައި މޯލްޑިވްސް އިސްލާމިކް ބޭންކް (އެމްއައިބީ) އިން ޚިދުމަތް ދޭނެ ވަގުތުތައް އެ ބޭންކުން ރަސްމީކޮށް އިޢުލާނުކޮށްފިއެވެ. މި ބަދަލަކީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބަންދު ދުވަސްތަކުގައި ބޭންކުތައް ހުޅުވުމަށް ކަނޑައަޅާފައިވާ އުސޫލުތަކާ އެއްގޮތަށް ގެނެސްފައިވާ ބަދަލެކެވެ.
އެމްއައިބީން ހާމަކޮށްފައިވާ ގޮތުގައި، މި މަހުގެ 24 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށް ސަރުކާރު ބަންދުކުރުމަށް ނިންމާފައިވީ ނަމަވެސް، ކަސްޓަމަރުންނަށް ބޭނުންވާ ޒަރޫރީ ބޭންކިންގ ޚިދުމަތްތައް ފޯރުކޮށްދިނުމަށްޓަކައި މޭ މަހުގެ 28 ވާ ބުރާސްފަތި ދުވަހު އެ ބޭންކުގެ ބްރާންޗުތައް ހުޅުވުމަށް ވަނީ ހަމަޖެހިފައެވެ. އެ ދުވަހު ބޭންކު ހުޅުވާފައި ހުންނާނީ ހެނދުނު 9:30 އިން ފެށިގެން މެންދުރުފަހު 13:30 އާ ހަމައަށެވެ.
މީގެ އިތުރުން، ބޭރު ފައިސާ ފޮނުވުމަށް ބޭނުންކުރާ ޓެލެގްރަފިކް ޓްރާންސްފާ ނުވަތަ ޓީޓީގެ ޚިދުމަތް ހޯދާ ފަރާތްތަކަށް ޚާއްޞަ ވަގުތެއްވެސް އެމްއައިބީން ވަނީ ކަނޑައަޅާފައެވެ. އެގޮތުން ބުރާސްފަތި ދުވަހު ޓީޓީގެ ޚިދުމަތަށް އެދި ހުށަހެޅުމުގެ އެންމެ ފަހު ވަގުތަކީ މެންދުރު 13:00 ކަމަށް އެ ބޭންކުން ބުނެ އެވެ. އެހެންކަމުން، ބަންދު ދުވަސްތަކުގައި ފައިސާގެ މުޢާމަލާތްތައް ކުރަން ބޭނުންވާ ފަރާތްތަކުން މި ވަގުތުތަކަށް ސަމާލުކަން ދިނުމަށް ބޭންކުން އިލްތިމާސްކުރެ އެވެ.
އެމްއައިބީއަކީ މިހާރުވެސް ގިނަ ޚިދުމަތްތަކެއް ޑިޖިޓަލްކޮށް ފޯރުކޮށްދެމުން އަންނަ ބޭންކަކަށް ވުމާއެކު، ބޭންކުގެ ބްރާންޗުތައް ބަންދު ނަމަވެސް އޮންލައިންކޮށް ގިނަ ޚިދުމަތްތަކެއް ލިބޭނެ ކަމަށް އެ ބޭންކުން ފާހަގަކުރެއެވެ. އެގޮތުން ބޭންކަށް ހާޒިރުނުވެ އައު އެކައުންޓު ހުޅުވުމާއި، އިންޓަނެޓް ބޭންކިންގއަށް އަމިއްލައަށް ރަޖިސްޓްރީވުމުގެ ފުރުސަތު ކަސްޓަމަރުންނަށް އޮންނާނެ އެވެ.
ހަމައެއާއެކު، ފައިސާ މޮބައިލް އަދި ފައިސާ ނެޓް މެދުވެރިކޮށް ޓީޓީގެ ޚިދުމަތަށް އެދުމުގެ ފަސޭހަކަންވެސް ކަސްޓަމަރުންނަށް ލިބިގެންދާނެ އެވެ. އަދި އެމްއައިބީގެ "އެޕްލައި ނައު" ޕޯޓަލް މެދުވެރިކޮށް ބޭންކުން ފޯރުކޮށްދޭ އެކި ކަހަލަ ފައިނޭންސިންގ ޚިދުމަތްތަކާއި އެހެނިހެން ޚިދުމަތްތަކަށް ބަންދު ދުވަސްތަކުގައިވެސް އެދި ހުށަހެޅޭނެ ކަމަށް އެ ބޭންކުން މަޢުލޫމާތުދެ އެވެ.
ޢީދު ބަންދުގެ ދުވަސްތަކުގައި އޭޓީއެމް މެދުވެރިކޮށް ފައިސާ ނެގުމާއި ޖަމާކުރުމުގެ ޚިދުމަތް 24 ގަޑިއިރު މެދުކެނޑުމެއް ނެތި ލިބޭނެއެވެ. އެމްއައިބީން އަބަދުވެސް މަސައްކަތް ކުރަމުންދަނީ ޒަމާނީ ޓެކްނޮލޮޖީގެ އެހީގައި ކަސްޓަމަރުންނަށް ލުއިފަސޭހަ އަދި ރައްކާތެރި ބޭންކިންގ ޚިދުމަތްތަކެއް ފޯރުކޮށްދިނުމަށެވެ.
