މޯލްޑިވްސް އިސްލާމިކް ބޭންކް (އެމްއައިބީ) ގެ އެސެޓް ވެލިއު އެއް ބިލިއަން ޑޮލަރަށް އަރައި، އެ ބޭންކްގެ މާލީ ތާރީހުގައި ފާހަގަކޮށްލެވޭ ބޮޑު ކާމިޔާބީއެއް ހޯދައިފި އެވެ.
ރާއްޖޭގައި އިސްލާމީ ބޭންކިންގެ ހިދުމަތް ތައާރަފުކުރި ފުރަތަމަ ބޭންކުގެ ގޮތުގައި މީގެ 15 އަހަރު ކުރިން މަސައްކަތް ފެށި އެމްއައިބީން މި ލަނޑުދަނޑި ހާސިލުކުރީ މިދިޔަ ތިން އަހަރުގެ ތެރޭގައި އެ ބޭންކުގެ ފައިދާ ތިން ގުނަ އިތުރުކޮށް، ކަސްޓަމަރުންގެ އަދަދު ދެގުނައަށް އިތުރު ކުރުމާއެކީގަ އެވެ.
މި ކާމިޔާބީއާއެކު އެމްއައިބީ ދެ ލައްކަ ކަސްޓަމަރުންނާއެކު މިހާރު ވެފައިވަނީ ރާއްޖޭގެ ބޭންކިން ދާއިރާގައި ދެވަނައަށް އެންމެ ބޮޑު ބޭންކަށެވެ.
މިދިޔަ އަހަރުގެ ތަފާސްހިސާބުތަކުން ދައްކާގޮތުގައި، އެ ބޭންކުގެ ޖުމްލަ އެސެޓް ވަނީ 16.65 ބިލިއަން ރުފިޔާއަށް އަރާފަ އެވެ. މިއީ ރާއްޖޭގެ ބޭންކިން ނިޒާމުގެ ޖުމްލަ އެސެޓްގެ ގާތްގަނޑަކަށް 16 ޕަސަންޓެވެ. އަދި ކަސްޓަމަރުން ބޭންކުގައި ބަހައްޓާފައިވާ ޑިޕޮސިޓްގެ މިންވަރު 5.14 ބިލިއަން ރުފިޔާއިން 13 ބިލިއަން ރުފިޔާއަށް ވަނީ އުފުލިފަ އެވެ. މިއީ 153 ޕަސަންޓުގެ ކުރިއެރުމެކެވެ.
އެމްއައިބީގެ މި ހަލުވި ކުރިއެރުމުގެ ފަހަތުގައިވަނީ ބޭންކުން ގެންގުޅޭ ހަރުދަނާ އުސޫލުތަކާއި ޒަމާނީ ޓެކްނޮލޮޖީ ކަމަށް އެ ބޭންކުން ފާހަގަކުރެ އެވެ.
އެ ބޭންކުގެ އޮޕަރޭޓިން އިންކަމް 897 މިލިއަން ރުފިޔާއަށް އަރާފައިވާއިރު، ފީ އާއި ކޮމިޝަނުން ލިބޭ އާމްދަނީ ވަނީ 300 އިންސައްތައަށްވުރެ އިތުރުވެފަ އެވެ. ހަމައެއާއެކު، ބޭންކުގެ އެސެޓްތަކުގެ ފެންވަރު ހިފެހެއްޓުމުގައިވެސް ބޮޑު ކުރިއެރުމެއް ވަނީ ހޯދާފަ އެވެ. އެގޮތުން ނުދައްކާ ހުރި ފައިނޭންސިން ނުވަތަ އެންޕީއޭ ރޭޝިއޯ ވަނީ 4.59 ޕަސަންޓުން 2.97 ޕަސަންޓަށް ދަށްކުރެވިފަ އެވެ.
ޑިޖިޓަލް ބޭންކިންގެ ދާއިރާއިން އެމްއައިބީން ވަނީ ރާއްޖޭގައި އިންގިލާބީ ބަދަލުތަކެއް ގެނެސްފައެވެ. އީ-ފާސް މެދުވެރިކޮށް ވަގުތުން އެކައުންޓް ހުޅުވޭ ހިދުމަތާއި، ފައިސާވިއާ ފަދަ ޒަމާނީ ވަސީލަތްތައް ތައާރަފުކުރުމުގެ ނަތީޖާއެއްގެ ގޮތުން، ބޭންކުގެ ކަސްޓަމަރުންގެ 90 ޕަސަންޓަށްވުރެ ގިނަ މީހުން މިހާރު ހިދުމަތް ހޯދަނީ ޑިޖިޓަލް ވަސީލަތްތައް މެދުވެރިކޮށެވެ.
ފައިނޭންސިންގެ ދާއިރާއަށް ބަލާއިރު، ކުރިން ހަމައެކަނި އާންމު ފަރުދުންނަށް ހާއްސަވެފައި އޮތް އޮތުން ބަދަލުކޮށް، ކޯޕަރޭޓް ފައިނޭންސިންގެ ދާއިރާއިން ބޭންކު ވަނީ ވަރަށް ބޮޑަށް ފުޅާވެފަ އެވެ.
މިގޮތުން އެމްއައިބީގެ ފައިނޭންސިން ޕޯޓްފޯލިއޯގެ 40 ޕަސަންޓަކީ ކޯޕަރޭޓް ދާއިރާ އެވެ. އޭގެ ތެރޭގައި ފަތުރުވެރިކަމާއި، އުމްރާނީ ތަރައްގީގެ ބޮޑެތި މަޝްރޫއުތައް ހިމެނެ އެވެ. ވަކިން ހާއްސަކޮށް ފަތުރުވެރިކަމުގެ ދާއިރާއަށް ދޫކުރި ފައިނޭންސިން ވަނީ 385 އިންސައްތަ އިތުރެވެ.
އެމްއައިބީގެ މި ކާމިޔާބީތައް ބައިނަލްއަގުވާމީ ފެންވަރުގައިވެސް ވަނީ ބަލައިގެންފައެވެ. އެގޮތުން މިދިޔަ އަހަރު އަހަރުގެ އައިއެފްއެފްއެސްއޭ އެވޯޑްސްގައި "އިސްލާމިކް ބޭންކް އޮފް ދަ ޑެކޭޑް" ގެ ޝަރަފުވެރި އެވޯޑާއި، އެންމެ މޮޅު ޑިޖިޓަލް ބޭންކިން އިސްނެގުމުގެ އެވޯޑް އެ ބޭންކަށް ވަނީ ލިބިފައެވެ.
އެމްއައިބީން ހޯދި ކާމިޔާބީއަކީ އިސްލާމީ ބޭންކިން ނިޒާމަކީ ކާމިޔާބު އަދި އިތުބާރު ހުރި ނިޒާމެއްކަން ސާބިތުކޮށްދިން ހެއްކެއް ކަމަށާއި ބޭންކުގެ އަމާޒަކީ ކުރިއަށް އޮތް ތަނުގައިވެސް ޑިޖިޓަލް ވަސީލަތްތައް އިތުރަށް ފުޅާކޮށް، ރާއްޖޭގެ އިގްތިސާދީ ތަރައްގީގައި މުހިންމު ބައިވެރިއެއްގެ ގޮތުގައި ދެމިއޮތުން ކަމަށް އެ ބޭންކުން ބުންޏެވެ.
