މޯލްޑިވްސް އިސްލާމިކް ބޭންކް (އެމްއައިބީ) ގެ އެންމެ ފަހުގެ މޯބައިލް އެޕް، ފައިސާ މޯބައިލް އެކްސް އިން ވަކި ވަކި ފަރުދުންގެ އިތުރުން ކުންފުނިތަކާއި ވިޔަފާރިތަކަށް މޯބައިލް ބޭންކިންގައި އެތަކެއް ލުއި ފަސޭހަތަކެއް ލިބޭނެ މަގު ތަނަވަސްކޮށްދީފި އެވެ.
އެމްއައިބީ އިން ބުނީ ފައިސާ މޯބައިލް އެކްސްގެ ބަލްކް ޓްރާންސްފާ ފީޗާ މެދުވެރިކޮށް ކޯޕަރޭޓްތަކަށް ބޮޑެތި ޓްރާންސެކްޝަން ފަސޭހަކަމާއެކު ހެދޭނެ ކަމަށެވެ. އޭގެ ސަބަބުން ގިނަ ޕޭމަންޓްތައް އެއްފަހަރާ ދައްކަންޖެހޭ ކުންފިތަކަށް ލިބޭނެ ބޮޑު ލުޔެއްކަން އެ ބޭންކުން ފާހަގަކުރެ އެވެ.
"ބަލްކް ޓްރާންސްފާ ފީޗާ މެދުވެރިކޮށް ކުންފުނިތަކުގެ މުވައްޒަފުންނަށް މުސާރަ ޖަމާކުރެވޭނެ. މި ގޮތަށް މުސާރަ ޖަމާކުރާއިރު ބޭންކަށް އިތުރު ލިޔެކިޔުމެއް ފޮނުވާކަށް ނުޖެހޭނެ. އެހެންކަމުން ބޭންކު ބަންދު ދުވަސް ދުވަހުވެސް ފަސޭހަކަމާއެކު މުސާރަ ޖަމާކޮށްލެވޭނެ،" ރާއްޖޭގައި އޮޕަރޭޓުކުރަން ފެށި ފުރަތަމަ އިސްލާމިކް ބޭންކުން ބުންޏެވެ.
މި އެޕްލިކޭޝަން މެދުވެރިކޮށް ވިޔަފާރިތަކުން އެޕްރޫވް ކުރަން ޖެހޭ ޓްރާންސެކްޝަންތަށްވެސް ވެބް އެޕްލިކޭޝަނަށް ނުވަދެ އެޕްރޫވްކުރުމާއި، ރާއްޖޭން ބޭރަށް ޓީޓީ ކުރުންފަދަ ކަންކަން ކުރެވެ އެވެ. އަދި އެޕްލިކޭޝަންގައި ކޯޕަރޭޓް އެކައުންޓްތަކަށް ހާއްސަކޮށްގެން މަލްޓި ލެވެލް ޓްރާންސެކްޝަން އޮތޮރައިޒޭޝަން ވެސް ހެދޭގޮތްވެސް ވަނީ ހިމަނާފަ އެވެ.
އެއް ފަހަރު ސެޓަޕް ކޮށްލައިގެން ރިކަރެންޓް ޓްރާންސްފާ ވެސް ހެދޭ ގޮތައް މި އެޕްގައި ފީޗާއެއް ހިމަނާފައިވާއިރު، ކޮންމެ ތާކު ހުއްޓަސް އެއްވެސް ދަތިކަމާކާ ނުލާ ވިޔަފާރީގެ މުއާމާލާތްތައް ހިންގާލެވޭނެކަމުގެ ޔަގީންކަން މި އެޕް މެދުވެރިކޮށް ކަސްޓަމަރުންނަށް ލިބެ އެވެ.
މި އެޕަކީ އެމްއައިބީގެ ކުރީގެ ފައިސާ މޮބައިލް އެޕްގެ އަޕްގްރޭޑަޑް ވާޝަނެވެ. މި އެޕު މެދުވެރިކޮށް ކަސްޓަމަރުންގެ ހުރިހާ އެކައުންޓުތަކެއް ފަސޭހަކަމާއެކު އެއް ޕްލެޓްފޯމަކުން މެނޭޖްކޮށްލެވޭނެ ކަމަށް އެ ބޭންކުން ބުންޏެވެ.
އެމްއައިބީގެ ބްރާންޗަކަށް ޒިޔާރަތް ނުކޮށް އެކައުންޓު ހުޅުވައި، މޯބައިލް ބޭންކިންއާއި އިންޓަނެޓް ބޭންކިން މެދުވެރިކޮށް ކޮންމެ ތާކު ހުރިކަމުގައިވިޔަސް ފައިސާގެ މުއާމަލާތްކުރެވެ އެވެ. އެ ބޭންކުން ދަނީ މުޅިން އައު ހިދުމަތްތައް ތައާރަފްކޮށް، ހިދުމަތްތައް އިތުރަށް ފުޅާކުރަމުންކަންވެސް ފާހަގަކޮށްލެވެ އެވެ.
