އޯކިޑްމަގުގައި ހުންނަ އެމްއެސްއެލް ބިލްޑިންގައި މޯލްޑިވްސް އިސްލާމިކް ބޭންކް (އެމްއައިބީ) އިން 24 ގަޑިއިރު ހިދުމަތް ލިބޭ އާ އޭޓީއެމްއެއް ހުޅުވައިފި އެވެ.
ދިވެހި ރުފިޔާއާއި ޑޮލަރު ޖަމާކޮށް، އަދި ނެގޭ މި އޭޓީއެމް ހުޅުވައިދެއްވީ އެމްއައިބީގެ ޑެޕިއުޓީ ޗީފް އެގްޒެކެޓިވް އޮފިސަރު، އަހްމަދު ރިޒާއެވެ.
އެމްއައިބީން ބުނީ މިއީ އާބާދީ ބޮޑު މާލޭ ސިޓީގައި އެ ބޭންކުގެ ހިދުމަތްތައް ފުޅާކުރުމުގެ މަސައްކަތުގެ ތެރެއިން ކުރެވުނު މުހިންމު މަސައްކަތެއް ކަމަށެވެ.
"މި އޭޓީއެމްގެ ސަބަބުން، ބޮޑެތި އޮފީސް ބްލޮކްތަކުން ވަށާލެވިފައިވާ މި ސަރަޙައްދުގައި މަސައްކަތްކުރާ ފަރާތްތަކަށް ފަސޭހަކަމާއެކީ އެމްއައިބީގެ އެކައުންޓް މެދުވެރިކޮށް ފައިސާގެ މުއާމަލާތްތައް ކުރެވޭނެ،" އެމްއައިބީން ބުންޏެވެ.
މީގެއިތުރުން އޭޓީއެމް ހުޅުވި ސަރަހައްދަކީ ޖެޓީއާ ކައިރި ސަރަހައްދަކަށްވުމުން ފަތުރުވެރިންނަށް ވެސް ބޭންކު މެދުވެރިކޮށް ފަސޭހައިން ބޭނުންކުރެވިގެންދާނެ ކަމަށް އެމްއަބީން ފާހަގަކުރެ އެވެ.
އެމްއައިބީގެ ބްރާންޗަކަށް ޒިޔާރަތް ނުކޮށް އެކައުންޓު ހުޅުވައި، މޯބައިލް ބޭންކިންއާއި އިންޓަނެޓް ބޭންކިން މެދުވެރިކޮށް ކޮންމެ ތާކު ހުރިކަމުގައިވިޔަސް ފައިސާގެ މުއާމަލާތްކުރެވެ އެވެ. އެ ބޭންކުން ދަނީ މުޅިން އައު ހިދުމަތްތައް ތައާރަފްކޮށް، ހިދުމަތްތައް އިތުރަށް ފުޅާކުރަމުންނެވެ.
