މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރަސްމީ ވެބްސައިޓަށް ދިމާވި މައްސަލަތައް ހައްލުކޮށް، އެ ސައިޓުގެ ހިދުމަތްތައް އަލުން އާންމު ހާލަތަށް ގެނެސްފި އެވެ.
ރާއްޖޭގެ މަރުކަޒީ ބޭންކުން މިއަދު ބުނީ ވެބްސައިޓަށް ދިމާވި ވަގުތީ މައްސަލަ މިހާރު އެއްކޮށް ހައްލުކުރެވިފައިވާ ކަމަށާއި، އާންމުންނަށް ކުރިއެކޭވެސް އެއްފަދައިން ވެބްސައިޓުގެ ހިދުމަތްތައް ލިބޭނެ ކަމަށެވެ.
އެމްއެމްއޭ އިން ހާމަކުރި ގޮތުގައި، މި ހާދިސާގައި ބަދަލުތަކެއް އައިސްފައިވަނީ ހަމައެކަނި ވެބްސައިޓުގެ މައި ސަފުހާ ނުވަތަ ހޯމްޕޭޖަށެވެ. އަދި މިއީ ސައިބާ ހަމަލާއެއްގެ ސަބަބުން ދިމާވި ކަމެއްކަމަށް ބެލެވުނު ނަމަވެސް، އެއްވެސް މައުލޫމާތަކަށް ގެއްލުން ނުލިބޭ ކަމަށް އެ އިދާރާއިން ބުނެ އެވެ.
އެގޮތުން، އެމްއެމްއޭގެ ވެބްސައިޓަކީ އެއްވެސް ފަރާތެއްގެ އަމިއްލަ ނުވަތަ ރައްކާތެރިކުރަންޖެހޭ ސިއްރު މައުލޫމާތުތައް ބަލަހައްޓާ ސައިޓަކަށް ނުވާތީ، އެފަދަ އެއްވެސް މައުލޫމާތަކަށް ގެއްލުމެއް ލިބިފައި ނުވާކަމަށް އެ އިދާރާއިން ބުނެ އެވެ.
މި ހާދިސާ ހިނގަން މެދުވެރިވި ސަބަބުތައް ދެނެގަތުމުގެ މަސައްކަތް މިހާރު ދަނީ ކުރަމުންނެވެ. އެމްއެމްއޭ އިން ބުނީ ކުރިއަށް އޮތް ތަނުގައި މިފަދަ ކަމެއް ތަކުރާރުވިޔަ ނުދިނުމަށްޓަކައި އަޅަންޖެހޭ ސަލާމަތީ ފިޔަވަޅުތައް ވަރުގަދަކުރުމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ.
މަރުކަޒީ ބޭންކުގެ ވެބްސައިޓަކީ ރާއްޖޭގެ އިގްތިސާދީ އަދި މާލީ ދާއިރާގެ ގިނަ މައުލޫމާތުތަކާއި ތަފާސްހިސާބުތައް އާންމުކުރާ މުހިންމު ވަސީލަތެކެވެ.
