ކޮންގޯ އާއި ޔޫގެންޑާގައި ފެތުރެމުންދާ އެބޯލާ ބަލިމަޑުކަމަކީ ބައިނަލްއަގުވާމީ ފެންވަރުގައި ސަމާލުކަން ދޭންޖެހޭ ސިއްހީ ކުއްލި ނުރައްކަލުގެ ހާލަތެއްގެ ގޮތުގައި ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ކަނޑައެޅުމުން ހާލަތު މޮނީޓާކުރަމުންދާ ކަމަށް ހެލްތު މިނިސްޓްރީން ބުނެފި އެވެ.
މި ބަލިމަޑުކަމަކީ ބަންޑިބުގްޔޯ ވައިރަހުގެ ސަބަބުން ފެތުރެމުންދާ ބައްޔެއް ކަމަށާއި، މިއީ މުޅި ދުނިޔެއަށް ފެތުރޭ ވަބާއެއްގެ މިންގަނޑަށް އަދި ނުފެތުނު ކަމުގައި ވިޔަސް، ކޮންގޯއާ ބޯޑަރު ހިއްސާކުރާ ގައުމުތަކަށް މި ބަލި ފެތުރުމުގެ ނުރައްކާ އިންތިހާއަށް ބޮޑުވެފައިވާ ކަމަށް ޑަބްލިއުއެޗްއޯ އިން ވަނީ އިންޒާރު ދީފަ އެވެ.
އެކަމާ ގުޅިގެން ހެލްތު މިނިސްޓްރީގެ މީޑިއާ އޮފިޝަލަކު ވިދާޅުވީ ހާލަތު މޮނީޓާކުރަމުންދާ ކަމަށާއި އިތުރު މައުލޫމާތު ލިބެމުންދާ ވަރަކަށް ހިއްސާކުރާނެ ކަމަށެވެ.
"ރެލެވެންޓް ސްޓޭކްހޯލްޑާޒް (ކަމާގުޅުން ހުރި ފަރާތްތައް) އާއެކު މި ވަގުތު ސިޗުއޭޝަން މޮނީޓާކުރަމުން ދަނީ،" ހެލްތު މިނިސްޓްރީގެ ރަސްމީ މީޑިއާ ގްރޫޕުގައި އޭނާ ވިދާޅުވި އެވެ.
އދ. ގެ ސިއްހީ އިދާރާއިން ނެރުނު ބަޔާނެއްގައި ހާމަކޮށްފައިވާ ގޮތުގައި، ހޮނިހިރު ދުވަހުގެ ނިޔަލަށް ކޮންގޯގެ އިޓޫރީ ޕްރޮވިންސްގެ ތިން ސަރަހައްދަކުން ބަލި ޖެހިގެން މަރުވި ކަމަށް ބެލެވޭ 80 މީހުން ވަނީ ރިޕޯޓްކޮށްފަ އެވެ. މީގެ އިތުރުން ލެބޯޓްރީ ތަހުލީލުތަކުން ބަލި ޖެހިފައިވާކަން ކަށަވަރުވެފައިވާ އަށް މީހުންނާއި، ބަލި ޖެހިފައިވާ ކަމަށް ޝައްކު ކުރެވޭ 246 މީހުން ފެނިފައިވާ ކަމަށް އެ އިދާރާއިން ބުނެ އެވެ.
ޑަބްލިއުއެޗްއޯ އިން ފާހަގަކުރި ގޮތުގައި މިހާރު ފެންނަން ހުރި ހިސާބުތަކަށް ވުރެ ބޮޑަށް ބަލި ފެތުރުމުގެ ފުރުސަތު އެބަ އޮތެވެ. ސަބަބަކީ ބަލި ހުރިތޯ ބެލުމަށް ހެދި ފުރަތަމަ ޓެސްޓުތަކުގެ ނަތީޖާ ޕޮޒިޓިވްވާ މިންވަރު މަތިވުމާއި، ބަލިޖެހިފައިވާ ކަމަށް ޝައްކުކުރެވޭ މީހުންގެ އަދަދު އިތުރުވަމުން ދިއުމެވެ. މި ބަލިމަޑުކަން ނުރައްކާތެރިވާ އަނެއް ސަބަބަކީ، އެބޯލާގެ އެހެން ބާވަތްތަކާ ހިލާފަށް، ބަންޑިބުގްޔޯ ވައިރަހަށް ހާއްސަ ފަރުވާއެއް ނުވަތަ ވެކްސިނެއް މިހާތަނަށް ހޯދިފައި ނެތުމެވެ.
މި ބަލިމަޑުކަން މިހާރު ވަނީ އެއް ގައުމުން އަނެއް ގައުމަށް ފެތުރެން ފަށާފަ އެވެ. ޔުގެންޑާގެ ވެރިރަށް ކަމްޕާލާ އިން ބަލި ޖެހިފައިވާ ދެ މީހަކު ފެނިފައިވާއިރު، އޭގެ ތެރެއިން އެކަކު ވަނީ މަރުވެފަ އެވެ. މި ދެ މީހުންނަކީ ވެސް ކޮންގޯ އިން ދަތުރުކުރި ދެ މީހުންނެވެ. ހަމައެއާއެކު، ކޮންގޯގެ ވެރިރަށް ކިންޝާސާ އިން ވެސް ބަލި ޖެހިފައިވާ މީހަކު ފެނިފައިވާ ކަމަށް ރިޕޯޓްކޮށްފައިވެ އެވެ.
ޑަބްލިއުއެޗްއޯ އިން ވަނީ ގައުމުތަކުގެ ކާރިސާ މެނޭޖްމަންޓް ނިޒާމުތައް ވަރުގަދަކޮށް، ބޯޑަރުތަކާއި މައި މަގުތަކުގައި ބަލި ހުރިތޯ ބެލުމުގެ އިންތިޒާމުތައް ހަމަޖެއްސުމަށް އިރުޝާދު ދީފަ އެވެ.
ބަލި ޖެހިފައިވާ މީހުންނާއި، ބަލި މީހުންނާ ބައްދަލުވެފައިވާ މީހުން ދަތުރުފަތުރު ނުކުރުމަށް ޑަބްލިއުއެޗްއޯ އިން ވަނީ އަންގާފަ އެވެ. އަދި ބަލި ޖެހިފައިވާކަން ކަށަވަރުވާ މީހުން ވަގުތުން އެކަހެރިކުރުމަށާއި، ބަލި މީހުންނާ ބައްދަލުވި މީހުން 21 ދުވަހުގެ މުއްދަތަށް މޮނިޓަރު ކުރުމަށް ވެސް ވަނީ ލަފާދީފަ އެވެ.
ނަމަވެސް، ބިރުވެރިކަމެއްގެ ތެރެއިން ގައުމުތަކުގެ ބޯޑަރުތައް ބަންދުކޮށް، ވިޔަފާރި އާއި ދަތުރުފަތުރަށް ހުރަސް ނޭޅުމަށް އެ ޖަމްއިއްޔާއިން އިލްތިމާސްކުރެ އެވެ. އެއީ ބޯޑަރުތައް ބަންދުކުރުމުން މީހުންނާއި މުދާ ނުރަސްމީ މަގުތަކުން ދަތުރުކުރަން ފަށައި، ބަލި ފެތުރުން ކޮންޓްރޯލް ކުރުމަށް އިތުރު ހުރަސްތަކެއް ކުރިމަތިވެދާނެތީ އެވެ.
