ރާއްޖެއިން ބޭސް ބޭނުންވާ މީހުންނަށް ބޭސް ނުލިބޭކަމުގެ ޝަކުވާ ބޮޑުވެފައި އޮތް ދަނޑިވަޅެއްގައި، ގައުމަށް ބޭސް ލިބުމުގައި އަދިވެސް ދަތިތަކެއް ހުރި ކަމަށް ހެލްތު މިނިސްޓަރު ގީލާ އަލީ ރޭ އެއްބަސްވެވަޑައިގެންފި އެވެ.
ޕީއެސްއެމްގެ "ރާއްޖެމިއަދު" ޕްރޮގްރާމުގައި ގީލާ ވިދާޅުވީ ރާއްޖެއަށް ބޭސް ގެނައުމަށް ސަރުކާރުން ގިނަ މަސައްކަތްތަކެއް ކުރަމުންދިޔަ ނަމަވެސް، ބޭސް ލިބުމަކީ އަދިވެސް ދަތިވެފައި އޮތް ކަމެއް ކަމަށެވެ.
އެއް ބޭހެއް ރާއްޖެއަށް އެކި ކުންފުނިތަކުން ގެނައުމަކީ ކުރެވޭނެ ކަމެއް ނޫންކަން ފާހަގަކުރައްވާ ގީލާ ވިދާޅުވީ ރާއްޖެއަށް އެއް ބަޔަކު ބޭސް ގެނެސްގެން ނޫން ގޮތަކަށް މައްސަލައަށް ހައްލެއް ނުލިބޭނެ ކަމަށެވެ.
"އެއް ބޭހެއް ތިން، ހަތަރު ފަރާތަކަށް ގެނައުމަކީ ކުރެވޭނެ ކަމެއް ނޫން. އެއް ފަރާތަކުން ނޫނީ އެއް ބަޔަކު މިކަމުގެ ތެރޭގައި އުޅެގެން ނޫނިއްޔާމުން ބޭނުންވާ އަދަދަށް ބޭސް ރާއްޖޭގައި އެވޭލަބަލްއެއް ނުކުރެވޭނެ،" ގީލާ ވިދާޅުވި އެވެ.
ތަފާތު އެކި މަސައްކަތްތައް ސިއްހީ ދާއިރާއިން ކުރަމުންގެންދޭ މިކަންކަމަށް ހައްލެއް ހޯދުމަށް. އެހެންނަމަވެސް ބޭސް ލިބުމަކީ އަދިވެސް ދަތިވެފައި އޮތް ކަމެއް. ދެން ބޭސް އުފައްދާ ފަރާތްތަކުން ހަމަ އޭގެ ނަފާ އެންމެ ބޮޑަށް ލިބޭ ގޮތަށް ބޭސް ވިއްކަމުންދާނީ."
ގީލާ ވިދާޅުވީ ރާއްޖެއަށް ބޭސް އެތެރެކުރާ ކުންފުނިތަކަށް ދިމާވާ އެންމެ ބޮޑު ގޮންޖެހުންތަކުގެ ތެރޭގައި ރާއްޖޭގެ އާބާދީ ކުޑަކަމުން ގެންނަން ޖެހޭ ބޭހުގެ އަދަދު މަދުވުންވެސް ހިމެނޭ ކަމަށެވެ.
އެކި ސަރަހައްދުތަކުން ސިއްހީ ހިދުމަތްތަކާއި ބޭސް ނުލިބޭކަމުގެ ޝަކުވާ ބޮޑުވެއްޖެ
އެކަމާ ހިތްހަމަނުޖެހުން ފާޅުކޮށް ހިޔާލުފާޅު ކުރަމުންދާ މީހުން ބުނަމުން ދަނީ އެންމެ އަސާސީ ބައެއް ބޭސްތައް ބޭސް އެތެރެކުރާ އެސްޓީއޯގެ ފިހާރަތަކުން ވެސް ލިބެން ނުހުންނަ ކަމަށެވެ.
"ރާއްޖެއަށް ބޭނުންވާ ބޭހުގެ ނިސްބަތަކީ ކުޑަ މިންވަރެއް. އަޅުގަނޑުމެންގެ އާބާދީ ކުޑަވުމާއެކުގައި އެއީ ދުނިޔޭގެ އެހެން އާބާދީތަކަށް ބަލާއިރުގައި ވަރަށް ކުޑަ މިންވަރެއް އެންޓިޓީއެއް ބަލާއިރުގައި. އެހެންވީމަ އެއީވެސް ވަރަށް ބޮޑު ގޮންޖެހުމެއް ބޭސް ވިޔަފާރިއެއްގެ ގޮތުގައި ކުރަމުންދާ ފަރާތްތަކަށް، އެ ފަރާތްތަކުން ރާއްޖެއަށް އެ އަދަދު އެ ކުޑަ މިންވަރަށް ބޭސް ފޯރުކޮށްދިނުން،" މިނިސްޓަރު ވިދާޅުވި އެވެ.
މީގެއިތުރުން ރާއްޖެއަށް އެތެރެކުރާ ބޭސް ބޮޑު އަގުގައި ވިއްކަމުންދާ މައްސަލައިގައި އާސަންދަ އިން ކުރަމުންދާ މަސައްކަތުގެ ދަށުން ބޭސް ވިއްކޭނެ އެންމެ ކުޑަ އަގު ކަނޑައެޅުމަށް މަސައްކަތް ހިމެނޭ ކަމަށް ގީލާ ވިދާޅުވި އެވެ.
'ބޭހުގެ އަގު، އޭގެ ޕްރޮފިޓް މާޖިން ވަރަށް ބޮޑަށް މަތިކޮށް ބޭސް ވިއްކުން ހުއްޓުވުމަށްޓަކައި އާސަންދައިން މަސައްކަތްތަކެއް ކުރަމުން އެބަ ގެންދޭ. އޭގެ މިނިމަމް ރީޓެއިލް ޕްރައިޒްއެއް ކަނޑައަޅައި، އެ ބޭހުގެ އަގު ކޮންޓްރޯލް ކުރުމަށްޓަކައި. ރައްޔިތުން އަތުންދާ ފައިސާ ނޫން ނަމަވެސް، ދައުލަތުން ރައްޔިތެއްގެ މައްޗަށް ކުރާ ހަރަދެއްގެ ގޮތުގައި އެ ފައިސާ ހަރަދުކުރާ ކަމަށްވަންޏާމުން، އެހެން ހިދުމަތްތަކަށް ކަނޑައެޅިފައި އޮންނަ ފައިސާއެއް ބޭނުން ކުރެވިގެން މިދަނީ،" މިނިސްޓަރު ވިދާޅުވި އެވެ.
ރާއްޖެއަށް ބޭނުންވާ ބޭހުގެ 30 ޕަސަންޓު މިވަގުތު އެތެރެކުރަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިންނެވެ. ބާކީ 70 ޕަސަންޓު ބޭސް ރާއްޖެއަށް އެތެރެކުރަނީ އަމިއްލަ ކުންފުނިތަކުންނެވެ.
ބޭސް ނުލިބުމުގެ ޝަކުވާ ބޮޑަސް، މިނިސްޓަރު ވިދާޅުވީ އެކަން ހައްލުވަމުންދާ ކަމަށް
ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ ބޭސް ލިބުމުގެ ދަތި ހައްލުކުރުމަށް އެޅި ގިނަ ފިޔަވަޅުތަކުން ލުއިތަކެއް ލިބެމުންދާ ކަމަށް.
މިގޮތުން ރާއްޖެއަށް ބޭސް ލިބުމުގައި ދިމަވާ ދަތިތައް ހައްލުކުރުމަށް އުފެއްދި ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން މެދުވެރިކޮށް ބޭސްތަކެއް މިހާރު ވަނީ ގެނެސްފަ އެވެ. އޭގެއިތުރުން އަވަށްޓެރި ގައުމުތަކާއިއެކު މަސައްކަތްކޮށް އިތުރު ބޭސްތައް ގެނައުމަށްވެސް ދަނީ މަސައްކަތް ކުރަމުންނެވެ.
ގީލާ ވިދާޅުވީ މިހާރު ކުރެވޭ މަސައްކަތްތަކުގެ ދަށުން ބޭސް ގެނައުމުގެ ނިޒާމަށް ދިމާވެފައިވާ މައްސަލަ ހައްލުކޮށް، ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން މެދުވެރިކޮށް ރާއްޖެއަށް ބޭނުންވާ ވަރަށް ބޭސް ފޯރުކޮށްދެވޭނެ ކަމަށް އުންމީދުކުރައްވާ ކަމަށެވެ.
ރައީސް މުހައްމަދު މުއިއްޒު ވިދާޅުވެފައިވާ ގޮތަށް ޔޫރަޕުން ބޭސް ގެނައުމަށްވުރެ މުހިންމީ، ކޮންމެ ގައުމަކުން ނަމަވެސް ކޮލިޓީ ބޭސް އެތެރެ ކުރުން ކަމަށް ކުރީގެ ހެލްތު މިނިސްޓަރު އަބްދުﷲ ނާޒިމް މިދިޔަ މާޗު މަހު ވިދާޅުވި އެވެ. އަދި ބޭސް ނުލިބުމުގެ ޝަކުވާ ކިތަންމެ ބޮޑަސް، އެ މައްސަލަ ހައްލުވަމުންދާ ކަމަށް މިދިޔަ ޖެނުއަރީ މަހު ނާޒިމް ވިދާޅުވި އެވެ.
ރާއްޖޭގައި 445 ފާމަސީއެއް މިދިޔަ އަހަރުގެ ނިިޔަލަށް އޮޕަރޭޓް ކުރަމުންދިޔަ އެވެ. އޭގެ ތެރެއިން 170 ފާމަސީ މާލޭގައި އޮޕަރޭޓްކުރާއިރު، އަތޮޅު ތެރޭގައި އޮޕަރޭޓުކުރަނީ 270 ފާމަސީ އެވެ.
ރާއްޖޭގައި މުޅި އަލަށް ވިއްކަން މިދިޔަ އަހަރު 594 ބޭހެއް ރަޖިސްޓްރީކުރަން ހުށަހެޅިއިރު، އޭގެތެރެއިން 363 ބޭހެއް ވިއްކުމަށް ހުއްދަ ދީފައިވެ އެވެ.
