މެންޗެސްޓާ (މެއި 13) - އިނގިރޭސި ފުޓްބޯޅައިގައި ވީޑިއޯ އެސިސްޓަންޓް ރެފްރީ (ވީއޭއާރް) ގެ ކަންކަން ކުރިއަށްދާ ގޮތަކީ އެއްވެސް އިރެއްގައި އޭނާ އަށް ކަމުދިޔަ ކަމެއް ނޫން ކަމަށާއި އެއީ ހަމައެއް ވެސް ނެތް ގޮތަށް ހިނގާ ކަމެއް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ގާޑިއޯލާ މިހެން ބުނެފައިވަނީ، މިދިޔަ އާދިއްތަ ދުވަހު އިނގިރޭސި ޕްރިމިއާ ލީގުގައި އާސެނަލުން 1-0 އިން ކުރީގައި އޮއްވައި، ވެސްޓް ހޭމް ޔުނައިޓެޑުން ފަހު ވަގުތު ލަނޑު ޖަހައި އެއްވަރުކުރިއިރު، އެ ގޯލު ބަލައިނުގަންނަން ވީއޭއާރް އިން ނިންމި ނިންމުމާ ގުޅޭގޮތުން އަމާޒުވި ސުވާލަށް ދިން ޖަވާބުގަ އެވެ. އެ މެޗުން، އާސެނަލް ބަލިވިނަމަ، މިރޭ އަމިއްލަ ދަނޑުގައި ކްރިސްޓަލް ޕެލަސް ބަލިކޮށް ސިޓީ އަށް އިނގިރޭސި ޕްރިމިއާ ލީގުގެ އެއް ވަަނަ އަށަް ޖެހިލުމުގެ ފުރުސަތު އޮތެވެ. އެކަމަކު، އެ މެޗުން އާސެނަލް މޮޅުވުމުން، އެ ޓީމަށް ލީގު ހޯދުމުގެ ފުރުސަތު ވަނީ ބޮޑުވެފަ އެވެ.
ގާޑިއޯލާ ބުނީ، އެފްއޭ ކަޕްގެ ފައިނަލުން 2024 އާއި 2025 ވަނަ އަހަރު ސިޓީ ބަލިވުމުގައި ވެސް ރެފްރީންގެ ނިންމުންތަކުގެ ދައުރެއް އޮތް ކަމަށެވެ.
"އަހަރެމެން އެފްއޭ ކަޕްގެ ދެ ފައިނަލުން ބަލިވީ ވީއޭއާރްގެ އެހީ ބޭނުންކޮށްގެން ވެސް ރެފްރީން އެ މީހުންގެ ޒިންމާ އަދާނުކުރީމަ. އަަހަރެމެންނަށް އޮތް ޒިންމާ އަކީ ކަންކަން ވީއޭއާރްއާ ހަމައަށް ނުދާނެ ގޮތަކާ މެދު ވިސްނުން. އަހަރެން ދެކޭގޮތުގައި ވީއޭއާރަކީ ހަމައެއް އޮތް ކަމެއް ނޫން. އެއީ، އެ އަށް ބަރޯސާވެގެން ކަމެއް ވާނެ ކަމަށް ވިސްނައިފިނަމަ، ކަންކަން ނިމޭއިރު އަމިއްލަ ނަފްސު ގޯސްކުރެވޭ ހާލަތަކަށް ވެސް އެބަދޭ،" ގާޑިއޯލާ ބުންޏެވެ.
ލީގުގެ ތާވަލު މި ވަގުތު ފެންނަން އޮތް ގޮތުން ސިޓީ އަށް ލީގު ޗެމްޕިއަންކަން ހޯދުމުގެ އަމިއްލަ ބާރު ނެތް ކަަން ފާހަގަކޮށް ގާޑިއޯލާ ބުނީ، އެ ޓީމުގެ ވިސްނުމަކީ ފަހު ވަގުތާހަމައަށް ވެސް ރަނގަޅު ގޮތުގައި މަސައްކަތް ކުރުން ކަމަށެެވެ.
"އަހަރެމެންނަށް ކުރެވޭނެ ކަަމަކީ އަމިއްލަ އަތްމަތީގައި އޮތް ކަންތައް ރަނގަޅު ގޮތުގައި ކުރިއަށްގެންދިއުން،" ގާޑިއޯލާ ބުންޏެވެ.
ސިޓީ އާއި ޕެލަސް ބައްދަލުކުރާ މެޗު ފަށާނީ މިރޭ 00:00 ގައެވެ.
