ރިޔާދު، ސައުދީ އަރަބިއްޔާ (އޭޕްރީލް 22) - ސައުދީ އަރަބިއްޔާގެ ޕްރޮފެޝަނަލް ލީގު (ޕްރޯ ލީގު) ގެ އަލް ނަސްރުގެ ސީނިއާ ޓީމަށް، 16 އަހަރުގެ ކްރިސްޓިއާނޯ ރޮނާލްޑޯ ޖޫނިއާ ޕްރޮމޯޓްކުރުމަށް އެ ކްލަބްގެ ކޯޗިން ޓީމުން މަޝްވަރާ ކުރަމުން އަންނަ ކަމަށް ރިޕޯޓްތައް ބުނެފި އެވެ.
އަލް ނަސްރުގެ ޔޫތު ޓީމުގަައި ރޮނާލްޑޯ ޖޫނިއާ އަންނަނީ ރަނގަޅު ކުޅުމެއް ދައްކަމުންނެވެ.
ސައުދީގެ މީޑިއާ ރިޕޯޓްތައް ބުނާގޮތުން، އަންނަ ސީޒަނުގައި، އަލް ނަސްރުގެ ސީނިއާ ޓީމަށް ނަގާ ޒުވާން ކުޅުންތެރިންގެ ތެރޭގައި، ރޮނާލްޑޯ ޖޫނިއާ ހިމެނުމުގެ ފުރުސަތު ބޮޑެވެ. މާނަ އަކީ، އުމުރުން 41 އަހަރުގެ ކްރިސްޓިއާނޯ ރޮނާލްޑޯ، އާއި އޭނާގެ ދަރިފުޅު، ރޮނާލްޑޯ ޖޫނިއާ އެއް ދަނޑުން ފެނުމުގެ ފުރުސަތު ބޮޑުވީ އެވެ.
ކްރިސްޓިއާނޯ ރޮނާލްޑޯ، މީގެ ތިން އަހަރު ކުރިން އަލް ނަސްރަށް ބަދަލުވުމާ އެކު، އޭނާއާ އެކުގައި، ރޮނާލްޑޯ ޖޫނިއާ ވެސް އަލް ނަސްރާ ގުޅުނެވެ. ރޮނާލްޑޯ ޖޫނިއާ އަންނަނީ ޕޯޗުގަލްގެ އުމުރުފުރާ ގައުމީ ޓީމުތަކަށް ކުޅެމުންނެވެ.
އެކަމަކު، ފީފާގެ އުސޫލުތަކާއި އެކި ގައުމުތަކުގައި ރަށްވެހިކަން ލިބޭ ގާނޫނުތަކަށް ބަލާއިރު، ފަސް ގައުމެއްގެ ތެރެއިން ބޭނުން ގައުމެއް ތަމްސީލްކުރުމުގެ ފުރުސަތު ރޮނާލްޑޯ ޖޫނިއާ އަށް އެބައޮތެެވެ.
އެ ގޮތުން، މި ވަގުތު ކުޅެމުން އަންނަ ޕޯޗުގަލްގެ ސީނިއާ ޓީމަށް ކުޅެން މި ވަގުތު ވެސް ރޮނާލްޑޯ ޖޫނިއާ އަށް ނިންމިދާނެ އެވެ.
އޭގެ އިތުރުން، އޭނާ އުފަންވެފައިވަނީ، އެމެރިކާގެ ކެލިފޯނިއާ އަށް ކަމަށްވާއިރު، އެ ގައުމުގެ ރަށްވެހިކަން ހޯދައި، އެ ޓީމަށް ކުޅުމުގެ ފުރުސަތު އެބައޮތެވެ. ސްޕެއިން ގައުމީ ޓީމަށް ކުޅުމުގެ ފުރުސަތު، ރޮނާލްޑޯ ޖޫނިއާ އަށް ހުޅުވިފައި އޮތީ ކްރިސްޓިއާނޯ ރޮނާލްޑޯ، ރެއާލް މެޑްރިޑަށް ކުޅުނުއިރު، ސްޕެއިނުގައި ތިން އަހަރަށް ވުރެން ދިގު މުއްދަތެއްގައި އުޅެފައިވާތީ، އެ ގައުމުގެ ރަށްވެހިކަން ހޯދައިގެންނެވެ.
އިންގްލެންޑް ގައުމީ ޓީމަށް ކުޅެން ނިންމުމުގެ އިހުތިޔާރު، ރޮނާލްޑޯ ޖޫނިއާ އަށް އޮތީ 2021-2023 އަށް މެންޗެސްޓާ ޔުނައިޓެޑަށް ރޮނާލްޑޯ ކުޅުނުއިރު، އެ ގައުމުގެ ގްރާސްރޫޓު ލެވަލްގައި ކުޅެ، އެ ގައުމުގެ ރަށްވެއްސަކަށް ވުމަށް ހުށަހަޅައި ކަންކަން ފުރިހަމަކުރެވޭނެތީ އެވެ.
ކްރިސްޓިއާނޯ ރޮނާލްޑޯގެ މަންމަ، މާރިއާ ޑޮލޯރެސް އުފަންވެފައިވަނީ، ކޭޕް ވާޑް އަށް ކަމަށްވާތީވެ، އެ ގޮތުން، ރޮނާލްޑޯ ޖޫނިއާ އަށް، އެ ގައުމުގެ ދަރިފަސްކޮޅަށް ނިސްބަތްވާތީ، ކޭޕް ވާޑް އަށް ކުޅެން ވެސް ނިންމުމުގެ ފުރުސަތު އޮތީ ހުޅުވިފަ އެވެ.
