މިއަދު ނިމުނު ބެޑްމިންޓަން އެސޯސިއޭޝަން ޗެމްޕިއަންޝިޕްގެ ސިންގަލްސް ބައިގެ ޗެމްޕިއަންކަން، ރިވައިވަލް ސްޕޯޓްސް ކްލަަބްގެ ޒަޔާން ޒަކީ އާއި ފާތިމަތު ނަބާހާ (ނަބާ) ހޯދިއިރު، މިކްސް ޑަބަލްސް ޗެމްޕިއަންކަން، އައިމިނަތު ނަބީހާ (ނަބީ) އާއި ނިބާލް އަހުމަދު ހޯދައިފި އެވެ.
އޯޕަން ޑްރޯގެ ފަސް ފައިނަލުގައި ވެސް ރިވައިވަލް އަށް ކުޅެމުން އަންނަ ގައުމީ ޓީމުގެ ކުޅުންތެރިން ކުޅެފައިވެ އެވެ.
ކުޅިވަރު އެކުވެނި އިންޑޯ ކޯޓުގައި މިއަދު ހަވީރު އެންމެ ފުރަތަމަ ކުޅެފައިވަނީ މިކްސް ޑަބަލްސް ފައިނަލެވެ. ތިން ސެޓަށް ދިޔަ މި މެޗުން، ރާއްޖޭގެ އެއް ވަަނަ މިކްސް ޑަބަލްސް ޕެއާ، ޒަޔާން އާއި ނަބާ ވަނީ ބަލިވެފަ އެވެ.
މިއީ، ފާއިތުވި އަށް ވަރަަކަށް އަހަރު ތެރޭ ގައުމީ ލެވަލްގެ މުބާރާތެއްގެ މިކްސް ޑަބަލްސް އިވެންޓަކުން ޒަޔާން އާއި ނަބާގެ ޕެއާ ބަލިވި ފުރަތަމަ ފަހަރެެވެ. މި މެޗުގެ ފުރަތަމަ ސެޓު، ޒަޔާން އާއި ނަބާގެ ޕެއާ އިން 12-15 އިން ގެންދިޔަ އެވެ. އެކަމަކު، ނަބީ އާއި ނިބާލްގެ ޕެއާ ވަނީ 15-12 އާއި 15-11 އިން ފަހު ދެ ސެޓު ގެންގޮސް މެޗުން މޮޅުވެފަ އެވެ.
ހަތް އަހަރު ކުރިން، 2019 ވަނަ އަހަރުގެ އެސޯސިއޭޝަން ޗެމްޕިއަންޝިޕް ފައިނަލުގައި ކުޅުނު ނިބާލް އާއި ޒަޔާން މި ފަހަރު ވެސް ވާދަކުރަން ޖެހުނުއިރު، ތިން ސެޓަށް ދިޔައިރު، ފަހު ސެޓުގައި އަނިޔާގެ މައްސަލަ ނިބާލަށް ވަރަށް ބޮޑަށް ދިމާވި އެވެ. މި މެޗުން ފުރަތަމަ ސެޓު ޒަޔާނަށް 15-11 އިން ލިބުނުއިރު، ނިބާލް 9-15 އިން ދެ ވަނަ ސެޓު ގެންދިޔަ އެވެ. ނަތީޖާ ނެރުނު ސެޓުގައި ނިބާލަށް އަނިޔާގެ މައްސަލަ ދިމާވިއިރު، ޒަޔާން ވަނީ ރަނގަޅު ހިތްވަރެއް ކޮށްފައި، 17-15 އިން ސެޓު ގެންގޮސް މެޗުން މޮޅުވެފަ އެވެ.
އަންހެން ސިންގަލްސްގައި ނަބީ އާއި ނަބާގެ ކުރިމަތިލުމުގައި ކުރިހޯދީ ނަބާ އެވެ. އެއް ވަނަ އަށް ސީޑުކޮށްފައި އޮތް ނަބާ ސެޓުތައް ގެންދިޔައީ، 15-07، 18-16 އިންނެވެ. އަންހެން ޑަބަލްސް ޗެމްޕިއަނަކީ، ނަބީ އާއި ނަބާގެ ޕެއާ އެވެ. އެއީ، ފަސޭހަކަމާ އެކު، 15-2، 15-17 އިން އައިމިނަތު ނަސީމާ އާއި ބުސައިނާ އަހުމަދު ރިޒާ ބަލިކޮށްފަ އެވެ.
ފިރިހެން ޑަބަލްސްގައި، ޒަޔާން އާއި ނިބާލްގެ ޕެއާ ކުޅެން އެރިއިރު ވެސް ނިބާލް ހުރީ އަނިޔާގަ އެވެ. ކުޅެވޭނެ ކަމުގެ ކުޑަ އުންމީދެއް އޮތުމުން، ނިބާލް ވެސް ބޭނުންވީ ހިތްވަރެއް ކުރުމަށެވެ. އެކަމަކު، އަހުމަދު ތޯއިފް މުހައްމަދު އާއި ރިއާޒް މުހައްމަދުގެ ޕެއާއާ އެކު ކުޅުނު މެޗު ފަށައިގެން، 4-3 އިން ޕޮއިންޓް އޮއްވައި، ނިބާލްގެ އަނިޔާ އިތުރަށް ގޯސްވެދާނެތީވެ، މެޗު ދޫކޮށްލަން ނިންމީ އެވެ.
