މިހާރު ކުރިއަށްދާ ބެޑްމިންޓަން އެސޯސިއޭޝަން ޗެމްޕިއަންޝިޕްގައި އިއްޔެ ކުޅުނު ކުއާޓާ ފައިނަލުގެ ތެރެއިން، ދެ ގައުމީ ޗެމްޕިއަންގެ ކުރިމަތިލުމުގައި، މުހައްމަދު އަޖުފާން ރަޝީދު ބަލިކޮށް ނިބާލް އަހުމަދު މުބާރާތުގެ ސެމީ ފައިނަލަށް ދަތުރުކޮށްފި އެވެ.
ފިރިހެން ސިންގަލްސް ކުއާޓާ ފައިނަލުގައި، އަޖުފާނާ ދެކޮޅަށް ކުޅުނު މެޗުން ނިބާލް މޮޅުވީ ސީދާ ދެ ސެޓުންނެވެ. މެޗުގެ ސެޓުތައް ދިޔައީ، 15-11، 15-12 އިންނެވެ. މި ދެ ކުޅުންތެރިން އެންމެ ފަހުން ކުޅުނު މެޗުން ވެސް މޮޅުވީ ނިބާލް އެވެ.
ސެމީ ފައިނަލުގައި ނިބާލް ކުޅެން ޖެހޭނީ އޭނާއާ އެކު ރިވައިވަލް ސްޕޯޓްސް އަށް ކުޅެމުން އަންނަ ހަަސަން ޒަޔާން މުހައްމަދުއާ ދެކޮޅަށެވެ. ހަސަން ޒަޔާން ސެމީ އަށް ދިޔައީ، ކުއާޓާގައި މުހައްމަދު ހިޝާމް ލަތީފް އަތުން 15-4، 15-11 އިން މޮޅުވެގެންނެވެ.
ފިރިހެން ސިންގަލްސްގެ އަނެއް ސެމީގައި ވެސް އޮތީ ރިވައިވަލްގެ ކުރިމަތިލުމެކެވެ. ޒަޔާން ޒަކީ ނުކުންނާނީ ހައިޝަމް އިބްރާހިމް އަލީއާ ދެކޮޅަށެެވެ. ޒަޔާން ޒަކީ ވަނި ކުއާޓާ ފައިނަލުގައި އައްޔޫބު އަޒްހަރު މުހައްމަދު އަތުން 15-5، 15-5 އިން މޮޅުވެފަ އެވެ. އަދި، ހައިޝަމް ވަނީ އަހުމަދު އަޒާން އާދަމް ފައިސަލް އަތުން 15-6، 15-5 އިން މޮޅުވެފަ އެވެ.
އަންހެން ސިންގަލްސް އަށް ބަލާއިރު، ރިވައިވަލްގެ ފާތިމަތު ނަބާހާ (ނަބާ) ވަނީ ކުއާޓާ ފައިނަލުގައި ލައިބާ އަހުމަދު މަހުލޫފް އަތުން 15-3، 15-4 އިން މޮޅުވެފަ އެވެ. ސެމީގައި ނަބާ ކުޅެން ޖެހެނީ ޔަލްވީ ހުސެއިން ޒުހުރީއާ އެވެ. އޭނާ ވަނީ، ކުއާާޓާ ފައިނަލުގަައި ކިޔާން އާދިލް މުހައްމަދު އަތުން 15-8، 15-12 އިން މޮޅުވެފަ އެވެ. އަނެއް ސެމި ފައިނަލުގައި އައިމިނަތު ނަބީހާ (ނަބީ) ކުޅޭނީ ޝުބާ މުހައްމަދު ޝަރީފްއާ އެވެ. ޝުބާ، ސެމީ ފައިނަލަށް ދިޔައީ، އައިމިނަތު އަމްނާ އަލީ އާމިރު އަތުން 13-15، 15-10 އަދި 15-12 އިން މޮޅުވެގެންނެވެ.
އެހެން އިވެންޓްތަކުގެ ސެމީ ފައިނަލަށް ދަތުރުކުރި ކުޅުންްތެރިން/ޕެއާ ތަކަށް ބަލާއިރު، މިކްސް ޑަބަލްސް ފުރަތަމަ ސެމީ ފައިނަލުގަައި އަޖުފާން އާއި އައިޝަތު ޔޫހާ އަހުމަދުގެ ޕެއާ އިން ކުޅޭނީ ނިބާލް އާއި ނަބީގެ ޕެއާއާ ދެކޮޅަށެވެ. އަދި، ނަބާ އާއި ޒަޔާން ޒަކީގެ ޕެއާ ކުޅޭނީ ހިޝާމް އާއި ނަފްހާ ނަސްރުﷲގެ ޕެއާއާ އެވެ.
އަންހެން ޑަބަލްސްްގެ ފުރަތަމަ ސެމީ ފައިނަލުގައި، ޔޫހާ އާއި އަމްނާގެ ޕެއާ އިން ކުޅޭނީ އައިމިނަތު ނަސީމާ އާއި ބުސައިނާ އަހުމަދު ރިޒާގެ ޕެއާއާ އެވެ. ދެ ވަނަ ސެމީ ފައިނަލުގައި ނަބާ އާއި ނަބީގެ ޕެއާ ނުކުންނާނީ، ފާތިމަތު އިމްތިޝާލް ސައުދުﷲ އާއި މަރިޔަމް ސަފާހަތުގެ ޕެއާއާ ދެކޮޅަށެވެ.
ފިރިހެން ޑަބަލްސްގެ ސެމީ ފައިނަލު ފުރަތަމަ މެޗުގައި ޒަޔާން އާއި ނިބާލްގެ ޕެއާ އިން ކުޅެނީ ހަމްޒާ އަބްދުލް ރަހުމާން އާއި ޔޫސުފް ނިޔާޒްގެ ޕެއާއާ އެވެ. އަދި، ދެ ވަނަ ސެމީގައި ހައިޝަމް އާއި މުހައްމަދު ހަލަފް އިިމްރާންގެ ޕެއާ އިން ކުޅޭނީ އަހުމަދު ތޯއިފް މުހައްމަދު އާއި ރިއާޒް މުހައްމަދުގެ ޕެއާއާ އެވެ.
މުބާރާތުގެ ސެމީ ފައިނަލް މެޗުތައް ފަށާނީ މިއަދު ހަވީރު 16:00 ގައި ކުޅިވަރު އެކުވެނި އިންޑޯ ކޯޓުގަ އެވެ.
