ރިވައިވަލް ސްޕޯޓްސް އޭދަފުށިން ކުރިއަށްގެންދާ، ރިވައިވަލް ސްޕޯޓްސް އޭދަފުށި ޖޫނިއާ އޯޕަން 2026 ގައި ބައިވެރިވުމުގެ ފުރުސަތު ހުޅުވާލައިފި އެވެ.
މިއީ، ރިވަައިވަލް ސްޕޯޓްސް އޭަދަފުށްޓާއި ރިވައިވަލް ސްޕޯޓްސް އިން ގުޅިގެން މި މުބާރާތް ބާއްވާ ތިން ވަނަ ފަހަރެވެ. އަހަރަކަށް ފަހު އަހަރެއް ފޯރިގަދަވަމުން އަންނަ މި މުބާރާތް މި ފަހަރު ވެސް ކުރިއަށްދާނީ އޭދަފުށީ ޔޫތު ސެންޓަރުގަ އެވެ. އެއީ، އަންނަ މަހުގެ 22-25 ވަނަ ދުވަހުގެ ނިޔަލަށެވެ.
މުބާރާތުގައި ބައިވެރިވުމުގެ ފުރުސަތު ހުޅުވާލައިފައި އޮތީ އަންނަ މަހުގެ އަށް ވަނަ ދުވަހުގެ ނިޔަލަށެވެ. އަދި، މުބާރާތުގައި ވާދަކުރެވޭނެ އެންމެ ދަށް އުމުރުފުރާ އަކީ، މި އަހަރުގެ ޑިސެމްބަރު މަހުގެ 31 ގެ ކުރިން، އުމުރުުން ހަ އަހަރު ފުރޭ ކުޅުންތެރިންނެވެ. މުބާރާތުގެ އެންޓްރީ ފީގެ ގޮތުގައި، ކޮންމެ ކުޅުންތެރިއަކު އަތުން، ސިންގަލްސް އަދި ޑަބަލްސް އިވެންޓް ވަކިން، 100 ރުފިޔާގެ ފީ އެއް ނެގުމަށް ވަނީ ހަމަޖެހިފަ އެވެ.
މި ފަހަރުގެ މުބާރާތުގައި އިވެންޓްތައް ކުރިއަށްގެންދާނެ ކެޓަގަރީތަކެއް ކަނޑައަޅާފައިވާއިރު، އަންހެން އަދި ފިރިހެން ސިންގަލްސް ކެޓަގަރީ އޮންނާނީ، 9، 11، 13، 15، 17 އަދި 19 އަަހަރުން ދަށުގެ އުމުރުފުރާތަކަށެވެ. އަދި، ޑަބަލްސް އިވެންޓްސްތައް އޮންނާނީ، 11، 13، 15، 17 އަދި 19 އަަހަރުން ދަށުގެ އުމުރުފުރާ ތަކަށެވެ.
މުބާރާތުގެ މެޗުތައް ކުޅޭ ގޮތަށް ހަމަޖެހިފައިވަނީ، ފެދާ ޝަޓްލްސް އިންނެވެ. މުބާރާތުގެ އިވެންޓްތަކުން ޗެމްޕިއަންކަން ހޯދާ ކުޅުންތެރިންނަށް ޓްރޮފީ އާއި މެޑަލް ދޭ ގޮތަށް ހަމަޖެހިފައިވާއިރު، ރަނަރަޕް އާއި ތިން ވަނަ އަށް ދާ ކުޅުންތެރިންނަށް ލިބޭނީ މެޑަލް އެވެ.
ފާއިތުވި ދެ އަހަރުގެ ތަޖުރިބާ އަށް ބަލާއިރު، ރިވައިވަލް ސްޕޯޓްސް އޭދަފުށި ޖޫނިއާ އޯޕަން އަކީ ކާމިޔާބު އިވެންޓެކެވެ. ރާއްޖޭގެ އެކި ކަންކޮޅުތަކުން ގިނަ އަދަދެއްގެ ކުޅުންތެރިން މި މުބާރާތުގައި ވާދަކޮށްފައިވާއިރު، މި މުބާރާތުގައި ކުޅެ ކާމިޔާބު ހޯދި ކުޅުންތެރިން ގައުމީ ޖޫނިއާ ޓީމުން ވެސް ޖާގަ ހޯދާފައިވެ އެވެ.
މި ފަަހަރުގެ މުބާރާތުގައި ބައިވެރިވުމަށް އެދޭ ފޯމު މި ލިންކުން ޑައުންލޯޑް ކުރެވޭނެ އެވެ.
