ޑާކާ، ބަންގްލަދޭޝް (މެއި 9) - ހުސްވެފައިވާ ބަންގްލަދޭޝްގެ ގައުމީ ފުޓްބޯޅަ ޓީމުގެ ކޯޗުކަން، 2016 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ސެމީ ފައިނަލަށް ވޭލްސް ގެންގޮސްދިން ކޯޗު، ކްރިސް ކޯލްމަންއާ ހަވާލުކުރަން މަޝްވަރާ ކުރަމުން އަންނަ ކަމަށް މީިޑިއާތަކުން ރިޕޯޓްކޮށްފި އެވެ.
ވޭލްސް ގައުމީ ޓީމަށް ކުރިން ކުޅުނު ކޯލްމަން، 55، އާ އެކު ބަންގްލަދޭޝްގެ ފުޓްބޯޅަ ފެޑެރޭޝަން (ބީއެފްއެފް) އިން މަޝްވަރާކުރަމުން އަންނަ ކަމަށް ބަންގްލަދޭޝްގެ ނޫސްތަކުން ރިޕޯޓްކުރި ނަމަވެސް ރަސްމީކޮށް އެއްވެސް އިދާރާ އަކުން މި ކަމާ ގުޅޭގޮތުން ވާހަކަ ދައްކާފައިނުވެ އެވެ.
ސެގާޓް، ބަންގްލަދޭޝްގެ ކޯޗުކަމަށް ޝައުގުވެރިވެއްޖެ: ރިޕޯޓް
ރާއްޖެ އާއި އަފްގާނިސްތާނަށް ސާފް ޗެމްޕިއަންޝިޕްގައި ކޯޗުކޮށްދިން ކްރޮއޭޝިއާގެ ކޯޗު، ޕީޓަ ސެގާޓް، ހުސްވެފައިވާ ބަންގްލަދޭޝްގެ ގައުމީ ފުޓްބޯޅަ ޓީމުގެ ކޯޗުގެ މަގާމަށް އައުމަށް ޝައުގުވެރިކަން ފާޅުކޮށްފައިވާ ކަމަށް މީޑިއާ ރިޕޯޓްތައް ބުނޭ،
ބަންގްލަދޭޝްގެ ކޯޗަކަށް ހުރި ސްޕެއިނުގެ ހަވިއޭ ކަބްރޭރާއާ އެކު، އެ ޓީމުން ހަދާފައި އޮތް އެއްބަސްވުން މިދިޔަ މަހުގެ ނިޔަލަށް ހަމަވާއިރު، އޭނާ އަށް އާ ކޮންޓްރެކްޓެއް ނުދޭން ބީއެފްއެފް އިން އޮތީ ނިންމައިފަ އެވެ. އަދި، އާ ކޯޗެއް ހޯދަން ބީއެފްއެފް އިން އިއުލާނުކޮށްފައިވާއިރު، ޝައުގުވެރިކަން ފާޅުކުރި ކޯޗުންގެ ތެރޭގައި، ކޯލްމަންގެ އިތުރުން، ރާއްޖެ އާއި އަފްގާނިސްތާން އަދި ތަޖިކިސްތާންގެ ކުރީގެ ކޯޗު، ކްރޮއޭޝިއާގެ ޕީޓަ ސެގާޓް އާއި އިންޑިއާގެ ކުރީގެ ކޯޗު، ކްރޮއޭޝިއާގެ އީގޯ ސްޓިމަކް ވެސް ހިމެނެ އެވެ.
ޔުއެފާ ޕްރޯ ލައިސަންސް ހާސިލްކޮށްފައިވާ ކޯލްމަން، ކޯޗިން ކެރިއަރު ފެށީ 2003 ވަނަ އަހަރު އިނގިރޭސި ޕްރިމިއާ ލީގުގެ ފުލަމް އިންނެވެ. އެ ޓީމަށް 2007 އާ ހަމައަށް ކޯޗުކޮށްދިން ކޯލްމަން ވަނީ ރެއާލް ސޮސިއެޑާޑްގައި ވެސް އެއް ސީޒަން ހޭދަކޮށްފަ އެވެ.
ވޭލްސް ގައުމީ ޓީމަށް 2012 އިން 2017 އަށް ކޯޗުކޮށްދިން ކޯލްމަންގެ ކޯޗުކަމުގައި އެ ޓީމުން 2016 ވަނަ އަހަރު ފްރާންސްގައި ބޭއްވި ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި ކުޅުނެވެ. އިނގިރޭސި ޕްރިމިއާ ލީގުގެ ސަންޑަލެންޑަށް ވެސް ކޯޗުކޮށްދިން ކޯލްމަން، މިދިޔަ އަހަރު ހުރީ ގްރީސްގެ ކްލަބެއް ކަމަށްވާ އަސްޓެރާސް ޓްރިޕޯލިސްގެ ކޯޗަކަށެވެ.
ބަންގްލަދޭޝް ފުޓްބޯޅަ ފެޑެރޭޝަނުން އާ ކޯޗެއް ހަމަޖެއްސުމުގެ މަސައްކަތް ވަރަށް އަވަހަށް ނިންމާލާނެ ކަމަށް ދާދި ފަހުން ވެސް ވަނީ ބުނެފަ އެވެ. އެއީ، އެ ޓީމުން އަންނަ މަހު، 1-10 އަށް މާލޭގައި ބާއްވާ ޑައިމަންޑް ޖުބިލީ އިންޓަނޭޝަނަލް މުބާރާތުގެ އިތުރުން، އަންނަ މަހު ފަސް ވަނަ ދުވަހު ސެން މެރީނޯއާ ދެކޮޅަށް ކުޅޭ މެޗަށް ތައްޔާރީތައް ފެށުމުގެ ގޮތުންނެވެ.
އެ ގޮތުން، ބަންގްލަދޭޝް އިން ވަނީ އާ ކޯޗެއްގެ ބެލުމުގެ ދަށުން ބޮޑު ޕްރިލިމިނަރީ ސްކޮޑެއް ނަގައި، ސެން މެރީނޯ އާއި ރާއްޖެ އަށް ވެސް ސީނިއާ ގައުމީ ސްކޮޑެއް ފޮނުވަން ނިންމައިފަ އެވެ.
