ޑާކާ، ބަންގްލަދޭޝް (އޭޕްރީލް 10) - ރާއްޖެ އާއި އަފްގާނިސްތާނަށް ސާފް ޗެމްޕިއަންޝިޕްގައި ކޯޗުކޮށްދިން ކްރޮއޭޝިއާގެ ކޯޗު، ޕީޓަ ސެގާޓް، ހުސްވެފައިވާ ބަންގްލަދޭޝްގެ ގައުމީ ފުޓްބޯޅަ ޓީމުގެ ކޯޗުގެ މަގާމަށް އައުމަށް ޝައުގުވެރިކަން ފާޅުކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
ސެގާޓް، 59، ވަނީ، 2015 ވަނަ އަހަރުގެ ސާފް ޗެމްޕިއަންޝިޕްގެ ފައިނަލަށް އަފްގާނިސްތާން ގެންގޮސްދީ، 2018 ވަނަ އަހަރުގެ ސާފް ޗެމްޕިއަންޝިޕްގެ ޗެމްޕިއަންކަން، ރާއްޖެ އަށް ހޯދައިދީފަ އެވެ. ރާއްޖޭގެ ކޯޗުކަމުން، 2019 ވަނަ އަހަރުގެ ސައުތު އޭޝިއަން ގޭމްސްގެ ނާކާމިޔާބީ އަށް ފަހު ވަކިކުރިއިރު، ސެގާޓް އެ ފަހުން ވަނީ، ތަޖިކިސްތާން ގައުމީ ޓީމާ ހަވާލުވެ، އެ ޓީމަށް 2024 ވަނަ އަހަރުގެ އޭޝިއަން ކަޕްގެ ދެ ވަނަ ބުރުން ޖާގަ ހޯދައިދީފަ އެވެ.
ބަންގްލަދޭޝްގެ ކޯޗަކަށް ހުރި ސްޕެއިނުގެ ހަވިއޭ ކަބްރޭރާއާ އެކު، އެ ޓީމުން ހަދާފައި އޮތް އެއްބަސްވުން މި މަހުގެ ނިޔަލަށް ހަމަވާއިރު، އޭނާ އަށް އާ ކޮންޓްރެކްޓެއް ނުދޭން ބަންގްލަދޭޝް ފުޓްބޯޅަ ފެޑެރޭޝަން (ބީއެފްއެފް) އިން ވަނީ ނިންމައިފަ އެވެ. އަދި، އާ ކޯޗެއް ހޯދަން ބީއެފްއެފް އިން އިއުލާނުކޮށްފައިވާއިރު، ޝައުގުވެރިކަން ފާޅުކުރި އެއް ކޯޗަކީ، މި ސަރަހައްދުގެ ފުޓްބޯޅައިގެ ތަޖުރިބާހުރި ސެގާޓް އެވެ.
ޔުއެފާ ޕްރޯ ލައިސަންސް ހޯދާފައިވާ ސެގާޓް ވަނީ، ޖޯޖިއާގެ 21 އަހަރުން ދަށުގެ ޓީމަށް ވެސް ކޯޗުކޮށްދީފަ އެވެ. އަފްގާނިސްތާނަށް 10 މެޗުގައި ކޯޗުކޮށްދިންއިރު، ރާއްޖެ އަށް 11 މެޗުގައި އަދި ތަޖިކިސްތާނަށް 23 މެޗުގައި އިރުޝާދުދިނެވެ. ތަޖިކިސްތާނުން މީގެ ދެ އަހަރު ކުރިން ވަކިވި، ސެގާޓް އެ ފަހުން ހުރީ ރަސްމީކޮށް ޓީމަކާ ހަވާލުނުވެ އެވެ.
