ޑާކާ، ބަންގްލަދޭޝް (ޑިސެމްބަރު 19) - ލެސްޓާ ސިޓީގެ މިޑްފީލްޑަރު، ހަމްޒާ ޗޯދުރީ، ބަންގްލަދޭޝް އަށް ކުޅުމުގެ ފުރުސަތު ދޭން ދުނިޔޭގެ މައި ފުޓްބޯޅަ އިދާރާ ފީފާ އިން ނިންމައިފި އެވެ.
ހަމްޒާ، 27، އަކީ ބަންގްލަދޭޝް ދަރިކޮޅަށް ނިސްބަތްވާ ކުޅުންތެރިއެކެވެ. އަދި އޭނާއާ އާއިލީ ގޮތުން އެފްރިކާގެ ގްރެނާޑާއާ ވެސް ގުޅުން އެބައޮތެވެ. ހަމްޒާ، ބަންގްލަދޭޝަށް ކުޅުވަން ކުރާ މަސައްކަތް އަވަސްކުރުމުގެ ގޮތުން، މިދިޔަ ޖޫން މަހު އޭނާ ވަނީ ލަންޑަންގައި ހުންނަ ބަންގްލަދޭޝްގެ އެމްބަސީ އަށް އެ ގައުމުގެ ޕާސްޕޯޓް ހައްދަން ހުށަހަޅައި، އެކަން މަސް ދުވަސް ތެރޭ ފުރިހަމަ ކޮށްފަ އެވެ.
ބަންގްލަދޭޝް ޓީމަށް ކުޅެން ހަމްޒާ އަށް މިހާތަނަށް އޮތް ހުރަހަކީ އޭނާ އިނގިރޭސި 21 އަހަރުން ދަށުގެ ޓީމަށް ހަތް މެޗު ކުޅެފައިވާތީ، އެ ގައުމުގެ ފުޓްބޯޅަ އެސޯސިއޭޝަނުން ބޭނުންވާ އިނގިރޭސި އެފްއޭގެ ނޯ އޮބްޖެކްޝަން ސެޓްފިކެޓް (އެންއޯސީ) ހޯދުމެވެ. އެ ގޮތުން، އެންއޯސީ ހޯދުމަށް ފަހު، ފީފާ ޓްރިބިއުނަލް އަށް ބަންްގްލަދޭޝް އިން އެ ލިޔުން ފޮނުވިއިރު، ފީފާ އިން މިއަދު ނިންމާފައިވަނީ ހަމްޒާ އަށް ބަންގްލަދޭޝަށް ކުޅުުމުގެ ފުރުސަތު ދޭށެވެ.
"ބަންގްލަދޭޝް ގައުމީ ޓީމަށް ކުޅޭ ހިތުން މިހުރީ ކެތްމަދުވެފައި،" ހަމްޒާ ބުންޏެވެ.
މިއާ އެކު، އަންނަ މާޗް މަހު، އޭޝިއަން ކަޕް ކޮލިފައިންގައި ބަންގްލަދޭޝް އިން އިންޑިއާއާ ކުޅޭ މެޗަކީ ހަމްޒާ ބަންގްލަދޭޝަށް ކުޅެދޭ ފުރަތަަމަ މެޗަށް ވުމުގެ ފުރުސަތު ބޮޑެވެ.
ދާދި ފަހުން އަނިޔާއިން ރަނގަޅުވެގެން ކުޅުމަށް އެނބުރި އައި ހަމްޒާ ވެގެންދާނީ ބަންގްލަދޭޝަށް ކުޅޭ އިނގިރޭސި ޕްރިމިއާ ލީގުގެ ފުރަތަމަ ކުޅުންތެރިޔާ އަށެވެ.
ލެސްޓާގެ ސީނިއާ ޓީމަށް 2017 ވަނަ އަަހަރު ކުޅެން ފެށި ހަމްޒާ ވަނީ، އެ ޓީމަށް 129 މެޗުން ދެ ގޯލު ޖަހައި ހަތަރު ގޯލު ޖަހަން ފުރުސަތު ތަނަވަސްކޮށްދީފަ އެވެ. ވަޓްފޯޑާއި ބާޓަން އަލްބިއަން އަށް ލޯން އެއްބަސްވުމެއްގެ ދަށުން ކުޅުނު ހަމްޒާ ވަނީ ލެސްޓާއާ އެކު، 2021 ވަނަ އަހަރުގެ އެފްއޭ ކަޕް ކާމިޔާބުކޮށްފަ އެެވެ.
