ލަންޑަން (މެއި 2) - އާސެނަލްގެ އިނގިރޭސި މިޑްފީލްޑަރު، ޑެކްލަން ރައިސް، ރެފްރީ އަށް ފާޑުކިޔާފައިވާތީވެ، އޭނާ އަށް ޔުއެފާގެ އަދަބެއް އައުމުގެ ފުރުސަތު އެބައޮތް ކަމަށް މީޑިއާތަކުން ރިޕޯޓްކޮށްފި އެވެ.
ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި އެތުލެޓިކޯ މެޑްރިޑާ 1-1 އިން އެއްވަަރުވި މެޗަށް ފަހު ރައިސް ވަނީ ރެފްރީގެ ނިންމުންތަކަށް ފާޑުކިޔައިފަ އެވެ. އެ ގޮތުން، ރައިސް ހިތްހަމަނުޖެހުން ފާޅުކުރީ، އާސެނަލްގެ އެބެރެޗީ އެޒޭ އަށް ދެ ވަނަ ހާފުގައި އެތުލެޓިކޯގެ ޑޭވިޑް ހެންކޯ ކުރި ފައުލަށް ޕެނަލްޓީ ނުދޭން ނިންމުމުންނެވެ. ފުރަތަމަ ޕެނަލްޓީ ދޭން ނިންމި ނަަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން، ވީޑިއޯ މޮނީޓަރުން ބެލުމަށް ފަހު، ޕެނަލްޓީ ނުދޭން ނިންމީ އެވެ.
މެޗަށް ފަހު ދިން އިންޓަވިއުއެއްގައި ރައިސް ބުނީ، ޔުއެފާ މުބާރާތްތަކުގައި ރެފްރީން ކަންކަން ބަލާގޮތް ތަފާތު ކަމަށެެވެ. އަދި، ފައުލެއް ކަނޑައަޅަން ޖެހޭނީ ކޮންމެ ތަނެއްގައި ހިނގި ކަމުގަައި ވިޔަސް އެއް ވިސްނުމެއްގައި ކަމަށާއި އޭރިއާތެރޭގައި ފައުލެއް ހިނގުމަކުން ތަފާތު ގޮތަކަށް ބަލަން ޖެހޭ ސަބަބެއް ނެތް ކަމަށް ވެސް ރައިސް ވަނީ ބުނެފަ އެވެ.
"އަހަންނަށް ނޭނގެ އެ ޕެނަލްޓީ ނުދޭން ނިންމީ ކީއްވެކަމެއް. އެނގޭ ކަމަކީ، (އެތުލެޓިކޯގެ) ސަޕޯޓަރުންގެ އަޑުގަދަވެ، އެ ނިންމުމަށް އަސަރުކޮށް، ރެފްރީގެ ނިންމުން ބަދަލުވިކަމަށް ބެލެވޭނެ ޖާގަ އޮތްކަން،" ރައިސް ބުންޏެވެ.
ރައިސް ބުނީ، ޗެމްޕިއަންސް ލީގުގައި ރެފްރީން ވަަރަށް އަވަހަށް ކަށިގަނޑު ފުމުމަށް ފަހު ނިންމުން ނިންމާ ކަމަށެވެ. އަދި، ޔޫރަޕްގައި ބައެއް ނިންމުންތަކުގެ އަސަރު ވަރަށް ބޮޑު ކަމަށް ވެސް ރައިސް ބުނެފައިވެ އެވެ.
ދަ ޓައިމްސް އިން ރިޕޯޓްކުރާގޮތުގައި، ޔުއެފާ އިން ބަލަމުން އަންނަނީ މެޗު ރިޕޯޓަށެވެ. އެ ރިޕޯޓުގައި ރައިސްއާ މެދު ފިޔަވަޅު އަޅަން ޖެހޭ ކަމަށް ހިމަނާފައިވާނަމަ، ޔުއެފާ އިން އެ މައްސަލަ ބަލާނެ އެވެ. މައްސަލަ ބަލައިފިނަމަ، ރައިސް އަށް ސަސްޕެންޝަނެއް އައުމުގެ ފުރުސަތު އެބައޮތެވެ.
މީގެ ކުރިން، ވެސްޓް ހޭމް ޔުނައިޓެޑަށް ކުޅެމުން ރައިސް ވަނީ ޔޫރަޕްގެ މުބާރާތެއްގެ ތެރެއިން ރެފްރީންގެ ނިންމުމަށް ފާޑުކިޔައިފަ އެވެ. އެ ފަހަރު ރައިސް އަށް ސަސްޕެންޝަނެއް ވެސް އަ އެވެ. އެހެންކަމުން، މި ފަހަރު ރައިސްގެ މައްސަލަ ބަަލައިފިނަމަ، އެއް ކުށެއް ތަކުރާރުވުމުން އަޅާ ފިޔަވަޅު ބޮޑުވުމުގެ ފުރުސަތު އެބައޮތެވެ.
