ބޭންކް އޮފް މޯލްޑިވްސް (ބީއެމްއެލް) ގައި މި ވަގުތު ޗީފް ފައިނޭންޝަލް އޮފިސަރު (ސީއެފްއޯ) ނެތް ނަމަވެސް އެ ބޭންކުގެ މާލީ ކަންކަން ބަލަހައްޓަމުންދަނީ އެ ކަމަށް ގާބިލު ފަންނީ އިލްމާއި ތަޖުރިބާ ލިބިފައި ތިބި މީހުން ކަމަށް އެ ބޭންކުން ބުނެފި އެވެ.
ބީއެމްއެލްއިން މިހެން ބުނީ އިގުތިސޯދު ނާޒުކު ފަައްތަރެއްގައި އޮތް ދަނޑިވަޅެއްގައި، ގައުމުގެ އެންމެ ބޮޑު ބޭންކުގައި ސީއެފްއޯއެއް ނެތް މައްސަލައިގައި މާލީ ތަޖުރިބާކާރުންގެ ހުރި ކަންބޮޑުވުންތަކަށް ޖަވާބުދާރީ ވަމުންނެވެ.
މިކަމާ ގުޅިގެން އަދަދު އިން ސުވާލުކުރުމުން ބީއެމްއެލްއިން ބުނީ އެ ބޭންކުގެ ފައިނޭންސް ޑިވިޝަންް ބަަލަހައްޓަނީ ތައުލީމީ ގާބިލު ޗާޓާޑް އެކައުންޓަންޓެއް ކަމަށެވެ. އަދި އެ ޑިވިޝަނުގައި ޖުމްލަ ހަތަރު ޗާޓާޑް އެކައުންޓަންޓުން މަސައްކަތް ކުރާ ކަމަށާއި އެ އެންމެންނަކީ ވެސް ދިވެހިން ކަމަށް އެ ބޭންކުން ބުންޏެވެ.
"[ބީއެމްއެލްގެ ފައިނޭންސް ބަލަހައްޓާ] ފަރާތަކީ ގައުމީ އަދި ބައިނަލްއަގުވާމީ ރެގިއުލޭޓަރީ މިންގަނޑުތަކާ އެއްގޮތަށް ބޭންކުގެ މާލީ ބަޔާންތައް ޝާއިއުކުރުމުގެ ހުއްދަ ދިނުމަށް ބޭނުންވާ ފަންނީ ސަނަދާއި ތަޖުރިބާ ލިބިފައިވާ ފަރާތެއް،" ބީއެމްއެލްއިން ބުންޏެވެ.
މި ނޫހަށް މައުލޫމާތު ދިން މީހުން ބުނި ގޮތުގައި ބީއެމްއެލްގެ ސީއެފްއޯގެ މަގާމާ ހަވާލުވަނީ ފައިނޭންސްގެ އިސްވެރިޔާ އެވެ. އޭނާ އެ މަގާމާ ހަވާލުނުވެވި ވަނީ، ގާނޫނުތަކާއި ގަވާއިދުތަކުން ލާޒިމުކުރާ ސަނަދެއް ފުރިހަމަކުރުމުގެ ގޮތުންނެވެ.
ބީއެމްއެލްގައި ސީއެފްއޯއެއް ނެތި ހަ މަސް، މާލީ މާހިރުން ކަންބޮޑުވެއްޖެ
ބީއެމްއެލްގައި އެންމެ ފަހުން ހުރި ސީއެފްއޯ، ނަންދަނަ ސެނަވިރަތުނެ އެ ބޭންކުން ވަކިވީ މިިދިޔަ އަހަރުގެ އޮކްޓޫބަރު 16، ގައި. އެ ފަހުން މިއަދާ ހަމައަށް އެ ބޭންކުން މަސައްކަތް ކުރަމުން އަންނަނީ "ސީ-ސޫޓް" ނުވަތަ އެންމެ މަތީ ފަންތީގެ މެނޭޖުމަންޓު ލެވަލްގައި ފައިނޭންޝަލް އޮފިސަރަކާ ނުލައި.
ސަނަދުތައް ހަމަވުމުން ސީއެފްއޯގެ މަގާމާ ހަވާލުވާ ގޮތަށް އެ މަގާމަށް މީހަކު ތަމްރީނުކުރަމުންދޭތޯ ސުވާލުކުރުމުން ބީއެމްއެލްއިން ސީދާ ޖަވާބެއް ނުދެ އެވެ. ނަމަވެސް އެ ބޭންކުން ދިން ޖަވާބުން ބޭންކުން މި ގޮތަށް ނިންމާފައިވާ ކަމަށް ބެލެވެ އެވެ.
"އަޅުގަނޑުމެން ބޭންކުގެ އިސްވެރިންގެ ފެންވަރު މަތިކޮށް، ހުނަރު ތަރައްގީކޮށް، މުހިންމު މަގާމުތަކުގައި ތިއްބަވާ ހުރިހާ ފަރާތްތަކަކީ ވެސް އެ ބޭފުޅުންގެ މަސްއޫލިއްޔަތުތައް ފުރިހަމައަށް އަދާކުރުމަށް ބޭނުންވާ ޝަރުތައް ފުރިހަމައަށް ހަމަވާ ފަރާތެއް ކަން ކަށަވަރުކުރަން،" ބީއެމްއެލްއިން ބުންޏެވެ.
ބީއެމްއެލްއިން އިތުރު ކަމެއްގެ ގޮތުގައި ފާހަގަކުރީ ސީއެފްއޯ ނެތް ނަމަވެސް، މިދިޔަ އަހަރު އެ ބޭންކުން ވަނީ ރެކޯޑު ފައިދާއެއް ހޯދައި، މާލީ ގޮތުން ބޮޑެތި ކުރިއެރުންތަކެއް ހޯދާފަ އެވެ. އަދި، މި އަހަރަކީ އެ ބޭންކުގެ މާލީ ރިޕޯޓުތައް އެންމެ އަވަހަށް ޝާއިއުކުރި އަހަރު ކަމަށް ވެސް އެ ބޭންކުން ބުންޏެވެ.
މިދިޔަ އަހަރު ބޭންކަށް ފައިދާ ބޮޑު ނަމަވެސް، އިރާނު ހަނގުރާމައާ ގުޅިގެން ޓޫރިޒަމް ސިނާއަތަށް އައި ހީނަރުކަމުގެ އަސަރު މުޅި އިގުތިސޯދަށްކޮށް، ބީއެމްއެލްއަށް ވެސް ވަނީ އުނދަގޫތަކަކާ ކުރިމަތިލާން ޖެހިފަ އެވެ. އެންމެ ބޮޑު އުނދަގުލަކަށް އޮތީ ޓޫރިސްޓުން މަދުވުމާއި ޓޫރިސްޓުން ހޭދަކުރާ މިންވަރު މަދުވުމުން ޑޯލަރު އާމްދަނީ ދަށްވުމެވެ.
މީގެ ސަބަބުން އެ ބޭންކަށް ވަނީ ޑޮލަރު މެނޭޖުކުރަން ފިޔަވަޅުތަކެއް އަޅަން މަޖުބޫރުވެފަ އެވެ. މި ފިޔަވަޅުތަކުގެ ތެރޭގައި ޓީޓީތަކަށް ޑޮލަރު ސަޕޯޓު ދިނުމުގައި ކޮންޓްރޯލްތަކެއް ގެންގުޅުމާއި އެންމެ ގިނައިން ވިޔަފާރިކުރާ އީކޮމާސް ސައިޓުތަކަށް ދުވަހުގެ ބަޖެޓެއް ކަނޑައަޅައި ވިޔަފާރި ލިމިޓުކުރުން ހިމެނެ އެވެ.
