ބޭންކް އޮފް މޯލްޑިވްސް (ބީއެމްއެލް) އިން ޑޮލަރު ދޫކުރުމުގެ ސިޔާސަތަށް ކުއްލި ގޮތަކަށް ގެނައި ބަދަލާއެކު، ދިވެހި އާއިލާތަކާއި ކުދި އަދި މެދު ފަންތީގެ ވިޔަފާރިތަކަށް ނުހަނު ބޮޑު ތަކުލީފުތަކަކާ ކުރިމަތިލާން ޖެހިފައިވާ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް މިރޭ ވިދާޅުވެއްޖެ އެވެ.
ފައްޔާޒް އެކްސް ގައި ކުރެއްވި ޕޯސްޓެއްގައި ވިދާޅުވީ ބީއެމްއެލް އިން ޑޮލަރުގެ ސިޔާސަތަށް ގެނައި ބަދަލާ ގުޅިގެން އިގްތިސާދީ ގޮތުން ދަތި ދަނޑިވަޅެއްގައި ރާއްޖޭގެ މާލީ ނިޒާމުގެ ތެރެއިން އާންމުންނަށް ލިބެން އޮތް މަދު ފުރުސަތުތައް އިތުރަށް ހަނިވެ، ގިނަ ބައެއްގެ ދިރިއުޅުމަށް ނުތަނަވަސްކަން ވެރިވެފައިވާ ކަމަށެވެ.
"މި ނިންމުމުގެ ސަބަބުން [ޑޮލަރު ލިމިޓްކުރުމުން] އެއަށް ބަރޯސާވެފައި ތިބި ކުދި އަދި މެދު ފަންތީގެ ވިޔަފާރިތަކާއި ރާއްޖެއިން ބޭރުގައި ކިޔަވަން ތިބި ދިވެހި ދަރިވަރުންނަށް ބޮޑު ގެއްލުމަކަށްވާނެ،" އޭނާ ވިދާޅުވި އެވެ.
ކުއްލި ކުއްލިއަށް ގެންނަ މިފަދަ ބަދަލުތަކުގެ ސަބަބުން މާލީ މުއާމަލާތްތައް ރޭވުމުގައި އާންމުންނަށް އޮތް އިތުބާރު ގެއްލި، މުޅި އިގްތިސާދަށް އޭގެ ނޭދެވޭ އަސަރު ދަނީ ކުރަމުންކަން ފައްޔާޒް ފާހަގަކުރެއްވި އެވެ.
ފައްޔާޒް ވިދާޅުވީ ބޭރު ފައިސާގެ ސިޔާސަތުތަކަށް ތަކުރާރުކޮށް ގެންނަމުންދާ ކުއްލި ބަދަލުތަކުން ހާމަވަނީ، ގައުމުގެ ހަގީގީ އިގްތިސާދީ ހާލަތު ވަޒަންކުރަން މާލީ އިދާރާތަކުގެ ވެރިންނަށް ނޭނގޭކަން ކަމަށެވެ.
މިނިވަން މުއައްސަސާއެއްގެ ގޮތުގައި އޮންނަންޖެހޭ ބީއެމްއެލްގެ ހިންގުން ބަލިކަށިވެ، ސަރުކާރުގެ ނުފޫޒުގެ ދަށުވެފައި އޮތުމަކީ ހާލަތު އިތުރަށް ގޯސްވާން މެދުވެރިވާ މައިގަނޑު ސަބަބު ކަމަށާއި ފުންކޮށް ނުވިސްނާ ނިންމާ މިފަދަ ނިންމުންތަކުގެ ސަބަބުން އާންމު ރައްޔިތުންގެ ޖީބަށް ބާރުބޮޑުވެ، ގައުމުގެ ޖުމްލަ އިގްތިސާދީ ދުވެލި މަޑުޖެހުމުގެ ބިރު ވަނީ ބޮޑުވެފައި ކަމަށް އޭނާ ވިދާޅުވި އެވެ.
ފައްޔާޒް ވިދާޅުވީ ރާއްޖޭގެ މާލީ ހާލަތު އިތުރަށް ގޯސްވިޔަނުދީ ހިފެހެއްޓުމަށްޓަކައި ބޭނުންވަނީ ކުއްލި ކުއްލިއަށް އަޅާ ރިއެކްޓިވް ފިޔަވަޅުތަކެއް ނޫން ކަމަށެވެ. އެގޮތުން އޭނާ ވިދާޅުވީ އޭގެ ބަދަލުގައި ބޭނުންވަނީ ހާލަތާ ގުޅޭ، ދިރާސާކުރެވިފައިވާ ހަރުދަނާ ސިޔާސަތުތަކެކެއް ކަމަށެވެ.
ދިވެހިން އެންމެ ގިނައިން ވިޔަފާރިކުރާ އީކޮމަސް ސައިޓުތަކުގެ ތެރޭގައި ޓީމޫ އާއީ ޝީން ފަދަ ސައިޓުތަކުން ބީއެމްއެލްގެ ދިވެހި ރުފިޔާ ކާޑުތައް ބޭނުންކޮށްގެން ވިޔަފާރިކުރުން މަދުކުރުމުގެ ގޮތުން ކޮންމެ ދުވަހަކަށް ބަޖެޓެއް އެ ބޭންކުން ވަނީ ކަނޑައަޅާފަ އެވެ.
