ބޭންކް އޮފް މޯލްޑިވްސް (ބީއެމްއެލް) ގެ ކާޑުން ޑޮލަރު ނުކެނޑިގެން އުޅެނީ ބޭންކުގައި ހުރި ޑޮލަރު ސަރުކާރަށް ދިނުމުން ކަމަށް ކުރީގެ ރައީސް މުހައްމަދު ނަޝީދު ރޭ ވިދާޅުވެއްޖެ އެވެ.
ބޮޑު ބަދަލުގެ ނަމުގައި ދަނޑިކޮށީގައި ބޭއްވި ޖަލްސާގައި ނަޝީދު ވިދާޅުވީ ބީއެމްއެލްގައި ހުރި ރައްޔިތުންގެ ޑޮލަރު ސަރުކާރުގެ ދަރަނި ދެއްކުމަށް ބޭންކުން ސަރުކާރަށް ދީފައިވާ ކަމަށެވެ. އެމަނިކުފާނު ވިދާޅުވީ ބީއެމްއެލްއަށް 300 މިލިއަން ޑޮލަރުގެ ލޯނެއް ނަގަން މަސައްކަތް ކުރަމުންދަނީ ސަރުކާރަށް ދިން ފައިސާ ފޫބެއްދުމަށް ކަމަށެވެ.
"ވެމިދިޔަ ގޮތަކީ ދައުލަތުގެ ދަރަނި ދައްކާން ވެގެން ބޭންކުގައި ހުރި ރައްޔިތުންގެ ފައިސާ، ޑޮލަރު ސަރުކާރަށް ދިނީ. ދިނީމާ މިހާރު އަޅުގަނޑުމެންގެ ކާޑަކުން ނުކެނޑޭ ޑޮލަރެއް. އަޅުގަނޑުމެންނަށް އެބަ ސާފުވޭ ބޭންކް އޮފް މޯލްޑިވްސްއަށް ދަތިތަކެއް ކުރިމަތިވަމުން އަންނަކަން،" ނަޝީދު ވިދާޅުވި އެވެ.
"އެބޭފުޅުން 300 މިލިއަން ޑޮލަރުގެ ލޯނެއް ނެގުމަށް ނިންމާ އެކަމުގެ މަސައްކަތް ކުރަމުން އެގެންދަނީ ބޭންކުގައި ހުރި އަޅުގަނޑުމެންގެ ފައިސާކޮޅު ސަރުކާރަށް ދީ، ސަރުކާރުން ވަނީ އެ ފައިސާ ސަރުކާރުގެ ލޯނު އަނބުރާ ދައްކަން ހޭދަކޮށްފައި."
ނަޝީދު ވިދާޅުވީ ސަރުކާރުން ލޯނު އަނބުރާ ދައްކަން ބީއެމްއެލް އިން ފައިސާ ނެގުމުގެ ބަދަލުގައި ކުރަންވީ ކަމަކީ ބޭކާރު ހަރަދުކުރުން ހުއްޓުވުން ކަމަށެވެ. އެގޮތުން ރަށްރަށުގައި ގިނަ އަދަދެއްގެ ޒުވާނުން މަސައްކަތެއް ނެތި ވަޒީފާތަކަށް ނަގާފައިވާކަން އެމަނިކުފާނު ފާހަގަކުރެއްވި އެވެ.
"ހަގީގަތުގައި އެ ލޯނު އަނބުރާ ދައްކަން ސަރުކާރުން ކުރަންވީ ކަމަކީ ބޭކާރު ހަރަދު ކުޑަކުރުން. އެހެނެއް ނުހެއްދެވި. މަސްދޯނިފަހަރު މަހަށް ނުފުރޭ މިންވަރަށް ރާއްޖޭގެ ރަށްތަކުގައި ތިބި ޒުވާނުން ސަރުކާރުގެ ކަމެއް ނެތް މަގާމުތަކަށް ވައްދާ އެމީހުން އެތަންތަނުގައި އިށީނދެގެން އެބަ ތިބޭ ދިހަ ބާރަ ހާސް ރުފިޔާ ކަމެއް ނުކޮށް ރަށުގައި ތިބެ ލިބޭތީ،" ނަޝީދު ވިދާޅުވި އެވެ.
އިރާނު ހަނގުރާމައިގެ ސަބަބުން ރާއްޖޭގެ ޓޫރިޒަމް ސިނާއަތަށް ކުރިމަތިވެފައިވާ ނޭދެވޭ އަސަރުތަކުން ސަލާމަތްވުމަށް އެހީތެރިވުމުގެ ގޮތުން، ބައިނަލްއަގުވާމީ މާލީ ބާޒާރަށް ސުކޫކެއް ވިއްކައިގެން ފަންޑު ހޯދުމަށް ބީއެމްއެލް އިން އިންވެސްޓަރުންނާ ދަނީ ބައްދަލުކުރަމުންނެވެ.
މާލީ އަދި އިގުތިސޯދީ ހަބަރުތައްް ގެނެސްދޭ ބްލޫމްބާގުގައި ބީއެމްއެލްގެ ޑައިރެކްޓާ ފޯ ފައިނޭންޝަލް ސްޓްރެޓެޖީ އެންޑް ޕްލޭނިން އަބްދުﷲ ހަސަންއާ ހަވާލާދީ ރިޕޯޓުކޮށްފައިވާ ގޮތުގައި، އެ ބޭންކުން އަންނަނީ އޭޝިއާ، މެދުއިރުމަތި އަދި ޔޫރަޕްގެ ފަންޑް މެނޭޖަރުންނާ ބައްދަލުކޮށް، ޑޮލަރު ހޯދަން ވިއްކާ ސުކޫކަކާ ގޮތުން ހިޔާލު ހޯދަމުންނެވެ.
ބީއެމްއެލްއިން މަސައްކަތް ކުރަމުން އަންނަނީ 300 މިލިއަން ޑޮލަރު ހޯދުމަށެވެ. އެއީ ދިވެހި ސަރުކާރުން ގެރެންޓީ ދޭގޮތަށް ވިއްކާ ސުކޫކެކެވެ. އަދި، އިންވެސްޓަރުންނާ ބައްދަލުކުރުމުގެ ކަންކަން އިންތިޒާމްކުރަނީ ދުބާއީގެ މަޝްރިގް ބޭންކް މެދުވެރިކޮށެވެ.
އިރާނު ހަނގުރާމައިގެ ސަބަބުން އެ ބޭންކަށް ކާޑުތަކުން ޑޮލަރު ވަންނަ ވަރު ތިން ބައި ކުޅަ އެއްބައި މަދު ވެފައިވާ ކަމަށެވެ. އެގެ ސަބަބުން ބޭންކުން އަންނަނީ ޑޮލަރު ބޭރުވާ މިންވަރު މަދުކުރަން ފިޔަވަޅުތަކެއް އަޅަމުންނެވެ. އެ ފިޔަވަޅުތަކުގެ ތެރޭގައި ވިޔަފާރިތަކުން ހަދާ ޓީޓީއަށް ޑޮލަރު ފޯރުކޮށްދިނުމުގައި ބައެއް ކޮންޓްރޯލްތައް ގެންގުޅުމާއި ބައެއް އީކޮމާސް ސައިޓުތަކަށް ޑެއިލީ ބަޖެޓެއް ކަނޑައެޅުން ހިމެނެ އެވެ.
މިކަމާ ގުޅިގެން ކާޑުތަކުން ވިޔަފާރި ނުކުރެވި، އުނދަގޫތަކާ ކުރިމަތިވަމުން އަންނަ ކަމުގެ ޝަކުވާ އާންމުން އަންނަނީ ކުރަމުންނެވެ. ނަމަވެސް ބޭންކުން ވަނީ މިހާރު ލިމިޓުތައް ކަނޑައަޅާފަ ހުރި ސައިޓުތަކަުން ނޫނީ މި މައްސަލަ ދިމާނުވާނެ ކަމަށް ބުނެފަ އެވެ.
