ދެހާސް ތޭވީހުގައި ބޭއްވި އެމްޑީޕީގެ ރިޔާސީ ޕްރައިމަރީ ގާތްވެފައި ވަނީ، އޭރު ޕާޓީގެ ރައީސްއަކަށް ހުންނެވި މުހައްމަދު ނަޝީދަށް ތާއިދު ކުރާނެ ކަމަށް ބެލެވުނު 39،000 މެންބަރުން ޕާޓީގެ ދަފުތަރުން އުނިކުރި ކަމަށް ކުރި ތުހުމަތުތަކަށް މިހާރު އެ މަނިކުފާނު ސީދާ ސާފު ޖަވާބެއް ނުދެއްވައި ވާހަކަ ބަދަލުކޮށްލައިފި އެވެ.
ޖޫން 12، ގައި ބާއްވާ އެމްޑީޕީގެ ޗެއާޕާސަންގެ އިންތިހާބުގެ ކެމްޕޭނުގައި ނަޝީދު ވާދަކުރައްވާއިރު ޕާޓީގެ މެންބާޝިޕުން ގިނަ އަދަދެއްގެ ބަޔަކު ވަކިކުރި ކަމަށް ކުރަމުންދިޔަ ތުހުމަތުތަކާ ގުޅޭ ގޮތުން މެންބަރަކު ކުރިން ޕާޓީގެ ޗެއާޕާސަންއަކަށް ހުންނެވި ފައްޔާޒު އިސްމާއީލްއާ ސުވާލެއް ކުރެއްވީ ހޮނިހިރު ދުވަހުގެ ރޭ ކުޑަހުވަދޫގައި ބޭއްވި ބައްދަލުވުމުގަ އެވެ.
މިފަދަ ކަމެއް ކުރެއްވިންތޯ އެމްޑީޕީގެ މެންބަރަކު ފައްޔާޒުއާ ސުވާލު ކުރުމުން، އެ ސުވާލަށް ޖަވާބު ދެއްވުމަށް ފައްޔާޒު މައިކް ނެންގެވުމުގެ ކުރިން ނަޝީދު ވަނީ މައިކް ނަންގަވައި އެ ސުވާލަށް ޖަވާބު ދެއްވާނީ އެމަނިކުފާނު ކަމަށް ވިދާޅުވެފަ އެވެ.
ނަޝީދު މިހެން ވިދާޅުވުމުން ފައްޔާޒު ވަނީ "އަޅުގަނޑު ޖަވާބު ދޭނެ ކަމެއް ނެތް" ކަމަށް ވިދާޅުވެ ހީލާފަ އެވެ. ނަޝީދު "އާދެ" ވިދާޅުވުމަށް ފަހު ޖަވާބު ދެއްވަން ފެއްޓެވި އެވެ.
ތިރީސް ނުވަހާސް މެންބަރުން ވަކިކުރި ކަމަށް ކުރި ތުހުމަތަށް ސީދާ އާނއެކޭ ނުވަތަ ނޫނެކޭ ވިދާޅުވުމުގެ ބަދަލުގައި، ނަޝީދު ވިދާޅުވީ "އޭގެ ތެރޭގައި ދެތިން ކަމެއް ހިނގައިދިޔަ" ކަމަށެވެ. އެގޮތުން ސިޔާސީ ޕާޓީތަކުގެ ގާނޫނަށް އައި ބަދަލާ ގުޅިގެން މެންބަރުންގެ ފިންގާޕްރިންޓް ޖަހަންޖެހޭ ގޮތަށް އިލެކްޝަންސް ކޮމިޝަނުން އެންގުމުން، އެކަން ވަރަށް ބާރަށް އަދި ވަރަށް އަވަހަށް ނިމިގެންދިޔަ ކަމަށް އެމަނިކުފާނު ފާހަގަކުރެއްވި އެވެ.
ނަޝީދު އިތުރަށް ވިދާޅުވީ އެ މަރުހަލާގެ ތެރޭގައި ޕާޓީގެ ދަފުތަރުން ވަރަށް ގިނަ މީހުން ގެއްލިގެން ދިޔަ ކަމަށެވެ. ނަމަވެސް، އެއީ ވަކި ބަޔަކަށް ތާއިދުކުރާތީ ގަސްތުގައި ކުރި ކަމެއްތޯ ނުވަތަ ނޫންތޯ ސާފުކޮށްދެއްވުމުގެ ބަދަލުގައި، މުޅި މައުޟޫއު އަނބުރާލެއްވީ އިދާރީ ގޮތުން ދިމާވި ކަންތައްތަކެއްގެ މައްޗަށެވެ.
މިހާރު ސޯލިހަށް އަދި ފައްޔާޒު އަށް ތުހުމަތު ކުރެއްވުމުގެ ބަދަލުގައި މިހާރު ނަޝީދު ދެއްވި ޖަވާބުން ދޭހަވަނީ، ޕާޓީގެ ދަފުތަރަށް އައި ބަދަލުތަކަކީ ހަމައެކަނި ގާނޫނީ އިޖުރާއަތްތަކެއްގެ ސަބަބުން ދިމާވި ކަމެއްގެ ގޮތުގައި ދެއްކެވުމަށް މަސައްކަތް ކުރެއްވި ކަމެވެ.
މި މައްސަލައަށް ނަޝީދު މިހާރު ފިނި ޖަވާބެއް ދެއްވި ނަމަވެސް މިއީ ރިޔާސީ ޕްރައިމަރީ އަށް ފަހު ޕާޓީތެރޭގައި އުފެއްދުނު އެންމެ ބޮޑު މައްސަލަ އެވެ.
