ރާއްޖޭގައި ތިބި މީހުންގެ ކާޑުތައް ބޭރު ގައުމުތަކުގެ ޕީއޯއެސް މެޝިންތަކާއި އޭޓީއެމްތަކުގައި ބޭނުންކުރުން ހުއްޓުވަން ބޭންކް އޮފް މޯލްޑިވްސް (ބީއެމްއެލް) އިން އިމިގްރޭޝަނުގެ މައުލޫމާތު ހޯދަން ރުހުން އޮތް ކަމަށް ބަޔާންކޮށް އެ ބޭންކުގެ ކާޑުތަކުގެ ޝަރުތުތައް ކުއްލިއަކަށް ބަދަލުކޮށްފި އެވެ.
ބީއެމްއެލްގެ ޑެބިޓް ކާޑުތަކާއި ކްރެޑިޓު ކާޑުތަކުގެ "ޓާމްސް އެންޑް ކޮންޑިޝަންސް" ގައި އެ ބޭންކުން ބަދަލު ގެނައީ "ޑިސްކްލޯޝާ އޮފް އިންފޮމޭޝަން" މާއްދާއަށެވެ. މިއީ މައުލޫމާތު ހާމަކުރުމާއި ހިއްސާކުރުމާ ގުޅޭ މާއްދާ އެވެ.
މި މާއްދާގައި ކުރިން އޮންނަނީ ކާޑުގެ ވެރިފަރާތުން ބޭންކަށް ފޯރުކޮށްދީފައިވާ މައުލޫމާތެއްގެ ސައްހަކަން، ބޭންކަށް ފެންނަ ކޮންމެ ވަސީލަތެއް ނުވަތަ މަސްދަރެއް މެދުވެރިކޮށް ކަށަވަރުކުރުމުގެ އިހުތިޔާރު ބޭންކަށް ދެވިގެންވާ ކަމަށެވެ.
ޝަރުތުތަކަށް ގެނައި ބަދަލުގައި، މި މާއްދާއަށް ޖުމްލައެއް އިތުރުކޮށް ބުނެފައި އައިޑީ ކާޑު ޔުނިޓާއި އިމިގްރޭޝަން ހިމެނޭހެން، ސަރުކާރުގެ އިދާރާތަކުން ކާޑުގެ ވެރިފަރާތާ ގުޅޭ މައުލޫމާތު ހޯދުމަށާއި ކަށަވަވަރުކުރުމުގެ ފުރިހަމަ އިހުތިޔާރު ކާޑުގެ ވެރިފަރާތުން ބޭންކަށް ދީފައިވާ ކަމަށެވެ.
ރާއްޖޭގައި ތިބި މީހުންގެ ކާޑުތައް ބޭރުގައި ބޭނުންނުކުރެވޭ ގޮތް ހަދަން ބީއެމްއެލްއިން އިމިގްރޭޝަނާ ގުޅިއްޖެ
ބީއެމްއެލްއިން މި ފިޔަވަޅު އެޅީ، ކާޑުތަކުގެ ލިމިޓުތައް މަތިކުރި ފަހުން، އެކި މީސްމީހުންގެ ކާޑުތައް ހިފައިގެން ގޮސް އެ ކާޑުތައް ބޭނުންކުރާ މައްސަލަ ފާހަގަވިތާ މަސްތަކެއް ފަހުން، އިރާނު ހަނގުރާމައާ ހެދި ޑޮލަރު ތާށިކަން އިހުނަށް ވުރެ އިތުރުވެފައިވާ ދަނޑިވަޅެއްގައި.
ޑިސްކްލޯޝާ މާއްދާއަށް ގެނައި ބަދަލުން ފާހަގަވާ ގޮތުގައި އިމިގްރޭޝަން ފަދަ ތަންތަނުން މައުލޫމާތު ހޯދަން ރުހުން ދިނުމުގެ އިތުރުން، މި ގޮތަށް މައުލޫމާތު ހޯދައިގެން ކާޑުގެ ވެރިފަރާތުގެ އެކައުންޓާއި ޓްރާންސެކްޝަންތައް މެދުނުކެނޑި މޮނިޓާކުރަން ވެސް ރުހުންދޭން ޖެހެ އެވެ. އެ މާއްދާގެ އިބާރާތް ކުރިން އޮތް ގޮތުން މޮނީޓާކުރަނީ ކޮންމެވެސް ކަމަކާ ގުޅުވަ، މިސާލަކަށް ކާޑު އާ ކުރާއިރު، އެވެ.
މި ގޮތަށް މޮނީޓާކުރާ ބޭނުންތަކުގެ ގޮތުގައި އޮތީ ޑިއު ޑިލިޖެންސްގެ ބޭނުންތަކަށާއި ގަވާއިދުތަކަށް ބޯލެނބުމަށާއި، މަކަރާއި ހީލަތް ހުއްޓުވުމާއި، ހިރާސް މެނޭޖުކުރުމަށާއި، ކާޑުގެ ވެރިފަރާތުގެ އެކައުންޓާއި މުއާމަލާތްތައް "މެދުނުކެނޑި" މޮނިޓާކުރުމެވެ.
ބީއެމްއެލްއިން ކަސްޓަމަރުންނާ މުއާމަލާތު ނުކޮށް ކާޑުތަކުގެ ޝަރުތުތަކަށް ބަދަލު ގެނައިއިރު، މިއީ އެ ޝަރުތުތަކުގައި އޮންނަ ގޮތުން ބޭންކުގެ އިހުތިޔާރުގައި އޮންނަ ކަމެކެވެ. މި ޝަރުތުތަކަށް އެއްބަސްނުވާނަމަ ކާޑު ބޭނުންކުރުން ހުއްޓާލައި، ބޭންކާ ހަވާލުކުރުމުގެ އިހުތިޔާރު ހުރިހާ ކަސްޓަމަރުންނަށް ލިބެ އެވެ.
ބީއެމްއެލްއިން މިކަން ކޮށްފައި މިވަނީ، އިމިގްރޭޝަނުން އެ ބޭންކާ މައުލޫމާތު ހިއްސާކުރުމާ ގުޅޭ ބޮޑު ބަހުސެއް ކުރިއަށް ދަނިކޮށެވެ. މިކަމާ ދެކޮޅު މީހުން ގަބޫލުކުރާ ގޮތުގައި އެއްވެސް މީހެއްގެ ޒާތީ މައުލޫމާތު އެ މީހެއްގެ ރުހުމަކާ ނުލާ ތިން ވަނަ ފަރާތަކާ ހިއްސާކުރުމަކީ ބޮޑު ގޯހެއް، އަދި ގާނޫނާ ހިލާފު ކަމަކެވެ.
ހުއްދަ ނުހޯދައި ޒާތީ މައުލޫމާތު ބީއެމްއެލްއާ ހިއްސާކުރާތީ އާންމުންގެ ކަންބޮޑުވުމާއި ފާޑުކިޔުން
ބީއެމްއެލްގެ ކާޑު ލިމިޓް ބޭނުންކުރެވޭނީ ރާއްޖޭން ބޭރަށް ފުރުމުން ކަމަށް ކަނޑައަޅައި، އިމިގްރޭޝަނާ ގުޅިގެން މީހުންގެ ދަތުރުފަތުރުގެ މައުލޫމާތު ބޭންކަށް ލިބޭ ގޮތް ހެދުމުން އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ. ގިނަ ބަޔަކު ގަބޫލުކުރާ ގޮތުގައި މިއީ ކަސްޓަމަރުންގެ ހުއްދައެއް ނެތި ޒާތީ މައުލޫމާތަށް އަރައިގަތުމެއް ކަމަށާއި، މި ބަދަލުގެ ސަބަބުން ބޭންކުގެ ކަސްޓަމަރުން ނޫން މީހުންގެ މައުލޫމާތު ވެސް ބޭންކަށް އެނގުމުގެ ފުރުސަތު އޮންނާނެ އެވެ.
އަދަދު އަށް މައުލޫމާތު ލިބިފައިވާ ގޮތުގައި ބީއެމްއެލް އާއި އިމިގްރޭޝަނުގެ މައުލޫމާތު ބަދަލުކުރުގެ ނިޒާމު ރާވާފައި ވަނީ ބޭރު ގައުމުގެ އޭޓީއެމްއެއް ނުވަތަ ޕީއޯއެސް މެޝިނަކުން ކާޑު ބޭނުންކުރުމުން، ބޭންކުގެ ސިސްޓަމްތަކުން އެ މީހާ ރާއްޖޭގައި ހުރިތޯ ނުވަތަ ނޫންތޯ ކަށަވަރުކުރަން އިމިގްރޭޝަނުގެ ސިސްޓަމަށް މެސެޖެއް ފޮނުވާ ގޮތަށެވެ. އެ ހިސާބުން އިމިގްރޭޝަނުން ކަށަވަރުކޮށްދެނީ އެ މީހާ ހުރީ ރާއްޖޭން ބޭރުގައި ނުވަތަ ރާއްޖޭގައި ކަމެވެ.
ބީއެމްއެލްއިން މި ފިޔަވަޅު އެޅީ، ކާޑުތަކުގެ ލިމިޓުތައް މަތިކުރި ފަހުން، އެކި މީސްމީހުންގެ ކާޑުތައް ހިފައިގެން ގޮސް އެ ކާޑުތައް ބޭނުންކުރާ މައްސަލަ ފާހަގަވިތާ މަސްތަކެއް ވޭތުވީ ފަހުން، އިރާނު ހަނގުރާމައާ ހެދި އިހުނަށް ވުރެ ޑޮލަރު ތާށި ބޮޑުވުމުންނެވެ.
