މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަނަކު ހޮވުމަށް ބާއްވާ އިންތިހާބާ ގުޅޭގޮތުން އެ ޕާޓީން ނެރެފެފައިވާ އިންތިހާބުގެ ތާވަލު (ޓައިމްލައިން) ބާތިލުކުރުމަށް ގާނޫނީ ވަކީލު އަބްދުﷲ ޝާއިރު ސިވިލް ކޯޓަށް ހުށަހެޅި މައްސަލައަކީ ކުރީގެ ރައީސް މުހައްމަދު ނަޝީދުގެ ފަރާތުން ހުށަހެޅުއްވި މައްސަލައެއް ނޫން ކަމަށް އެމަނިކުފާނުގެ ކެމްޕެއިން ޓީމުން ބުނެފި އެވެ.
ޗެއާޕާސަން އިންތިހާބަށް ނަޝީދު ކަނޑައަޅުއްވާފައިވާ ތަރުޖަމާނު އަބްދުﷲ ވަހީދު އެކްސް ގައި ވިދާޅުވީ ސިވިލް ކޯޓަށް ހުށަހެޅި މައްސަލައަކީ ނަޝީދުގެ ފަރާތުން ހުށަހެޅި މައްސަލައެއް ކަމަށް ބުނެ ފަތުރަމުންދާ ވާހަކައަކީ ކަނޑައެޅިގެން ދޮގު ވާހަކައެއް ކަމަށެވެ.
"އެމްޑީޕީގެ މައްޗަށް ދައުވާކޮށް ސިވިލް ކޯޓަށް މިއަދު ހުށަހެޅި މައްސަލައަކީ ރައީސް މުހައްމަދު ނަޝީދުގެ ކެމްޕެއިންގެ ފަރާތުން ހުށަހެޅި މައްސަލައެއް ކަމަށް ބުނެ ފަތުރަމުންދާ ވާހަކަތަކަކީ ކަނޑައެޅިގެން ދޮގެއް. އެބާވަތަށް ދޮގު ހަބަރު ފެތުރުން ކުށްވެރިކުރަން،" އޭނާ ވިދާޅުވި އެވެ.
މިފަދަ ދޮގު ވާހަކަ ފެތުރުމަކީ، ވަހީދު ވިދާޅުވި ގޮތުގައި، އެ ޕާޓީގެ އެތެރޭގެ އިންތިހާބުތަކަށް އޮންނަ އިތުބާރު ގެއްލި، އެތެރޭގެ މަސްލަހަތަށް ހިޔަނި އެޅޭނެ ކަމެއް ކަމެކެވެ. އަދި، މި ކަމުގައި ނަޝީދުގެ ކެމްޕެއިން ޓީމުން ގެންގުޅޭ ސްޓޭންޑް ސާފުކޮށްދެއްވަމުން އޭނާ ވިދާޅުވީ، އެ މީހުން އެދެނީ ވީހާވެސް އަވަހަށް އިންތިހާބުގައި ވޯޓުލުމުގެ ފުރުސަތު ލިބުމަށް ކަމަށެވެ.
ސިވިލް ކޯޓަށް ހުށަހެޅި މައްސަލާގައި ބުނެފައިވާ ގޮތުގައި ޗެއާޕާސަން އިންތިހާބު ބޭއްވުމަށް ކުރި އިއުލާނަކީ ނަޝީދުގެ ކެމްޕޭން ހަރަކާތްތަކަށް ހުރަސްއެޅޭ ގޮތަށް ކޮށްފައިވާ އިއުލާނެކެެވެ. އަދި އެއީ ޕާޓީގެ އަސާސީ ގަވާއިދުގެ 46 ވަނަ މާއްދާއާ ސީދާ ހިލާފު އިއުލާނެއް ކަމަށް މައްސަލާގައި ބުނެފައިވެ އެވެ.
އެމްޑިޕީ ޗެއާޕާސަން އިންތިހާބުގެ ޓައިމްލައިން ބާތިލުުކުރަން ސިވިލް ކޯޓަށް މައްސަލައެއް
އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބުގެ އިއުލާނާއި ތާވަލު، ޕާޓީގެ އަސާސީ ގަވާއިދާ ހިލާފު ކަމަށް ބުނެ ބާތިލުކުރުމަށް ސިވިލް ކޯޓަށް މައްސަލައެއް ހުށަހަޅައިފިއެވެ. ގާނޫނީ ވަކީލު އަބްދުالله ޝާއިރު ހުށަހެޅި މި މައްސަލާގައި ބުނެފައިވަނީ، އިންތިހާބުގެ ކަންކަން ހިންގަންވާނީ އަސާސީ ގަވާއިދުގައިވާ ގޮތުގެ މަތިން އިސްތިއުނާފް ފަނޑިޔާރުންގެ މަޖިލީހުގެ ރައީސްގެ ބެލުމުގެ ދަށުން ކަމަށެވެ.
އެ މާއްދާގައި ބުނާ ގޮތުން ޗެއާޕާސަން އިންތިހާބުގެ އެންމެހާ ކަމެއް ކުރަން ޖެހެނީ އެ ޕާޓީގެެ އިސްތިއުނާފު ފަނޑިޔާރުންގެ މަޖިލީހުގެ ރައީސްގެ ބެލުމުގެ ދަށުންނެވެ. މައްސަލާގައި އެދިފައި ވަނީ ވެސް އިންތިހާބާ ގުޅޭ އެންމެހައި ކަންކަން ރާވައި ހިންގުމުގެ މަސްއޫލިއްޔަތު އޮންނަންވާނީ ޕާޓީގެ އިސްތިއުނާފް ފަނޑިޔާރުންގެ މަޖިލީހުގެ ރައީސަށް ކަމަށް ކަނޑައަޅައިދިނުމަށެވެ.
މީގެ ކުރިން 2017 އަދި 2021 ވަނަ އަހަރު ބޭއްވުނު އިންތިހާބުތަކުގައިވެސް ޗެއާޕާސަން އިންތިހާބުގެ ކަންކަން ހިންގުމުގެ ބާރު އޮތީ އިސްތިއުނާފް ފަނޑިޔާރުންގެ މަޖިލީހުގެ ރައީސަށް ކަމަށް ދައުވާގައި ބަޔާންކޮށްފައިވެ އެވެ.
މިފަދަ މައްސަލައެއް ސިވިލް ކޯޓަށް ވައްދާފައިވައިރު އެ ޕާޓީގެ އިންތިހާބާ ބެހޭ ކޮމިޓީގެ ފަރާތުން ވަނީ ޗެއާޕާސަންގެ މަގާމަށް ވާދަކުރާ ތިން ކެންޑިޑޭޓުންގެ ނަން ތަރުތީބު ކުރުމަށް ފަހު އިއުލާންކޮށްފަ އެވެ.
އެ ޕާޓީގެ އިންތިހާބާ ބެހޭ ކޮމިޓީން ޝަރުތު ހަމަވާކަމަށް ކަނޑައެޅީ ކުރީގެ ރައީސް މުހައްމަދު ނަޝީދު އާއި ގަލޮޅު ދެކުނު ދާއިރާގެ މެންބަރު މީކާއިލް ނަސީމް އަދި ލ. ފޮނަދޫއަށް ނިސްބަތްވާ އިބްރާހިމް މުހައްމަދު (ވާޑު) އެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ ދައުރަކީ ފަސް އަހަރު ދުވަހު އެވެ.
