މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ފަސްމީރު ބްރޭންޑުގެ އުފެއްދުންތައް ސްރީލަންކާއަށް ތައާރަފުކޮށްފި އެވެ.
ފަސްމީރު ބްރޭންޑުގެ އުފެއްދުންތައް ލަންކާއަށް ތައާރަފްކުރީ މުހައްމަދު މުއިއްޒު އެ ގައުމަށް ކުރައްވާ ރަސްމީ ދަތުރުގެ ތެރެއިން ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި ދެ ގައުމުގެ އިސްވެރިން ބައިވެރިވެވަޑައިގެންނެވި އެވެ.
ރަސްމިއްޔާތުގައި ވާހަކަދައްކަވަމުން މިފްކޯގެ ސީއީއޯ އަދި އެމްޑީ މުޙައްމަދު އަނަސް ވިދާޅުވީ މިއީ ކުންފުނީގެ ވިޔަފާރި ބައިނަލްއަގުވާމީ ބާޒާރުގައި ފުޅާކުރުމަށް ކަނޑައަޅާފައިވާ އިސްތިރާޖީގެ ދަށުން ހޯދުނު މުހިންމު ކާމިޔާބީއެއް ކަމަށެވެ.
އޭނާ ވިދާޅުވީ ލަންކާއަށް ފަސްމީރު ބްރޭންޑް ތައާރަފުކުރުމަކީ ރާއްޖޭގެ ކަނޑުމަހުގެ އުފެއްދުންތައް ބޭރުގެ ބާޒާރުތަކަށް އިތުރަށް ފުޅާކުރުމަށާއި، ރާއްޖެއިން ކުރަމުންދާ ތިމާވެއްޓާ ރައްޓެހި މަސްވެރިކަން އިޝްތިހާރުކުރުމަށް ކުރެވޭ މުހިންމު މަސައްކަތެއް ކަމަށެވެ.
ލަންކާއަށް ފަސްމީރު ބްރޭންޑުގެ އުފެއްދުންތައް ރަސްމީކޮށް ތައާރަފުކުރީ ޑިވެލޮޕްމަންޓް އިންޓަރޕްލޭން ސިލޯން ޕްރައިވެޓް ލިމިޓެޑް (ޑީއައިސީއެލް) އާއެކު ވެފައިވާ އެއްބަސްވުމެއްގެ ދަށުންނެވެ.
މި އެއްބަސްވުމުގެ ދަށުން، ލަންކާގެ ހޮޓާ، ރެސްޓޯރެންޓް އަދި ކޭޓަރިން ދާއިރާއަށް ފަސްމީރު ގެ އުފެއްދުންތައް ފޯރުކޮށްދިނުމާއި، ރީޓެއިލް އަދި ހޯލްސޭލް ބާޒާރަށް ފަސްމީރުގެ އުފެއްދުންތައް ނެރޭނެ އެވެ.
