ރާއްޖޭގައި ބާނާ ކަނޑުމަސް ސްރީ ލަންކާއަށް ގެންގޮސް އެ ގައުމުގައި ބަންދު ކުރެވޭނެ ގޮތެއް ހޯދަން ދިވެހި ސަރުކާރުން މަޝްވަރާކޮށްފި އެވެ.
ސްރީ ލަންކާގެ ނިއުސް ފަސްޓުގައި ބުނެފައި ވަނީ ރާއްޖެއިން ބާނާ މަސް ލަންކާގައި ބަންދު ކުރުމާ ގުޅޭ މަޝްވަރާތައް ކުރިއަށްގެންދިޔައީ ދިވެހި ސަފީރު މަސްއޫދު އިމާދާއި ލަންކާގެ ފިޝަރީޒް މިނިސްޓަރު ރަމަލިންގަމް ޗަންދަރާސެކާރު ކަމަށެވެ.
ލަންކާގެ މަޖިލިސް ކުރާ ގޭގައި ބޭއްވި އެ ބައްދަލުވުމުގައި، ވެލިއު އެޑަޑް މަހުގެ ޕްރޮޑަކްޓުތައް މާކެޓަށް ނެރެން މަޝްވަރާ ކުރި އެވެ. ވެލި އެޑް ކުރުމަކީ ރޯ ކަނޑުމަސް ބޭރު ކުރުމުގެ ބަދަލުގައި ބަންދުކޮށްގެން ނުވަތަ އެނޫން ވެސް ގޮތަކަށް ބާޒާރަށް ނެރުމެވެ.
މަހުގެ ވިޔަފާރި ކުރާ ދައުލަތުގެ ކުންފުނި މިފްކޯ އާއި އެ މަސައްކަތް ކުރާ ޕްރައިވެޓް ކުންފުނިތަކުގެ ވަސީލަތްތައް ބޭނުންކޮށްގެން ދުވާލަކު 155 ޓަނުގެ މަސް ރާއްޖޭގައި ޕްރޮސެސް ކުރެވިދާނެ އެވެ. ލަންކާގައި ދުވާލަކު ބަންދު ކުރެވެނީ ގާތްގަނޑަކަށް 40،000 މަސްދަޅެވެ.
ރާއްޖެއިން ރޯމަސް ބޭރުކޮށްގެން ޗައިނާގައި ބަންދު ކުރަން މިފަހުން ވަނީ ފަށައިފަ އެވެ. މަސްވެރިކަމާ ބެހޭ ވަޒީރު އަހުމަދު ޝިޔާމް އެކަން ސިފަ ކުރެއްވީ ކާމިޔާބެއްގެ ގޮތުގަ އެވެ.
"ރާއްޖޭގައި ބޭނި މަހުން މަސް ދަޅުގެ ފުރަތަމަ ބެޗު ކާމިޔާބުކަމާއެކު ތައްޔާރު ކުރުމުން ވެއިހާއި ކިއުޒީ ބްލޫސީ ފުޑްސް އަދި ޖިންގްވައިޑޫ ބްރޭންޑަށް ވަރަށް ބޮޑަށް މަރުހަބާ،" ފިޝަރީޒް މިނިސްޓަރު އަހުމަދު ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވި އެވެ.
