ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްގެ މަގާމުން އިސްތިއުފާ ދިން މުހައްމަދު އަނަސް ސަރުކާރުގެ މަސް ކުންފުނި، މިފްކޯގެ ސީއީއޯ އަދި މެނޭޖިން ޑިރެކްޓަރުގެ މަގާމަށް އައްޔަނުކޮށްފި އެވެ.
އަނަސް ޕީސީބީގެ ރައީސްގެ މަގާމަށް އައްޔަނު ކުރީ މާޗު 13، 2025 ގަ އެވެ. އޭނާ އެ މަގާމުން އިސްތިއުފާ ދިނީ މިއަދުގެ ވަގުތެއްގަ އެވެ.
މިއީ މިފްކޯއަށް މި ސަރުކާރުގައި އައްޔަނުކުރި ހަތަރުވަނަ ސީއީއޯ އެވެ. މީގެ ކުރިން އަހުމަދު ޝަމާހު، ޑރ. ވިޓަލީ ލިއުބިމޯވް އަދި ފަރުހަތު ޝަހީރު ވަނީ މީގެކުރިން އެ ކުންފުނީގެ އެންމެ އިސް މަގާމު ފުރުއްވާފަ އެވެ.
ސަރުކާރުން ކުރިން ހިންގި މަސް ކުންފުނި ފިޝަރީޒް ޕްރޮޖެކްޓްސް އިމްޕްލިމެންޓޭޝަން ޑިޕާޓްމަންޓް (އެފްޕީއައިޑީ) ހިޔާނާތުގެ މައްސަލަ އަށް ފަހު، މިފްކޯ އުފެއްދީ 1993 ގަ އެވެ.
