ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ސީއީއޯގެ މަގާމުން ފަރުހަތު ޝަހީރު މިއަދު އިސްތިއުފާ ދީފި އެވެ.
އޭނާ އެ މަގާމަށް އައްޔަނުކުރީ މީގެ އަހަރަކަށްވުރެ ގިނަ ދުވަސް ކުރިން މާޗު 2025، ގަ އެވެ. އޭނާ އެ މަގާމާ ހަވާލުވީ އެ ކުންފުންޏާ ހަވާލުވި ފުރަތަމަ ބޭރު ސީއީއޯ ކަމަށްވާ ޑރ. ވިޓަލީ ލިއުބިމޯވް ވަކިކުރުމުންނެވެ.
ފަރުހަތު ޝަހީރު އަކީ ކުރީގެ ރައީސް ނަޝީދުގެ ވެރިކަން މަގުމަތިން ބަދަލުކުރި އިރު އެމްއެންޑީއެފްގެ ވައިސް ޗީފް އޮފް ޑިފެންސް ފޯސް އެވެ. އެ މަގާމުގައި ހުންނެވީ ބްރިގޭޑިއާ ޖެނެރަލްގެ ރޭންކުގަ އެވެ. ވެރިކަން ބަދަލުވުމާއެކު، ހަމަ އެ އަހަރުގެ ފެބްރުއަރީ ތެރޭގައި އޭނާ އިސްތިއުފާ ދެއްވި އެވެ.
އޭގެފަހުން ރައީސް ޔާމީނުގެ ވެރިކަމުގައި ފަރުހަތު ޝަހީރު ހުންނެވީ އައިޖީއެމްއެޗުގެ ސީއީއޯގެ މަގާމުގަ އެވެ.
މި ސަރުކާރުގައި ބައެއް އެސްއޯއީތަކަށް ސަލާމަތީ ހިދުމަތްތަކުގެ އިސް ރޭންކުތަކުގައި ތިބި ބޭފުޅުން އައްޔަނުކުރި އެވެ. އޭގެ ތެރެއިން ފެނަކައިގެ ސީއީއޯ މުހައްމަދު ނަޖާހު މިފަހުން ވަކިކުރިއިރު އެމްޕީއެލްގެ ސީއީއޯ މުހައްމަދު ރިޝްވާން ވެސް ވަނީ އިސްތިއުފާ ދެއްވާފަ އެވެ.
ސަރުކާރުގެ މަސް ކުންފުނި ފިޝަރީޒް ޕްރޮޖެކްޓްސް އިމްޕްލިމެންޓޭޝަން ޑިޕާޓްމަންޓް (އެފްޕީއައިޑީ) ހިޔާނާތުގެ މައްސަލަ އަށް ފަހު، މިފްކޯ އުފެއްދީ 1993 ގަ އެވެ.
