ވައިޓް ހައުސް ކައިރިން ހަތިޔާރު އަޅައިގެން ހުރި "ޝައްކުކުރެވޭ މީހަކު" ފެނިގެން އެމެރިކާގެ ސީކްރެޓް ސާވިސްގެ އޮފިސަރުން އެމީހާއާ ކުރިމަތިލާފައިވާ ކަމަށާއި، އެމީހާ އޮފިސަރުންނަށް ބަޑިން ހަމަލާދިނުމަށްފަހު ފިލަން އުޅެނިކޮށް ސަލާމަތީ ބާރުތަކުން ބަޑިޖަހައި އޭނާ ޒަހަމްކޮށްލާފައިވާ ކަމަށް އެ އިދާރާއިން ހޯމަ ދުވަހު ބުނެފި އެވެ.
މި ހާދިސާއާ ގުޅިގެން ވައިޓް ހައުސް ވަގުތީ ގޮތުން ބަންދުކުރި އެވެ.
ވައިޓް ހައުސް ކޮމްޕްލެކްސްގެ ބޭރު ބަލަހައްޓަމުންދިޔަ އެޖެންޓުންނަށް ފެނުނު އެ މީހާއަކީ، ސީކްރެޓް ސާވިސްގެ ޑެޕިއުޓީ ޑައިރެކްޓަރު މެތިއު ކުއިން ވިދާޅުވި ގޮތުގައި "އަތުގައި ބަޑިއެއް ގެންގުޅޭ ކަމަށް ޝައްކުކުރެވުނު މީހެކެވެ."
އެ މީހާ ފެނުނު ވަގުތު އޭނާގެ އަމަލުތައް ހުރި ގޮތުން ޝައްކު ކުރެވިގެން ބެލިއިރު، އޭނާގެ އަތުގައި ބަޑިއެއް އޮތްކަން ފާހަގަކުރެވުނު ކަމަށް ކުއިން ނޫސްވެރިންނަށް މައުލޫމާތު ދެއްވި އެވެ.
ސީކްރެޓް ސާވިސްގެ އޮފިސަރުން އެ މީހާއާ ކައިރިވުމުން، އޮފިސަރުންނާ ދިމާލަށް ބަޑިޖެހުމަށްފަހު ފިލަން މަސައްކަތްކޮށްފައިވާ ކަމަށް ނޫސްވެރިންގެ ބައްދަލުވުމެއްގައި ކުއިން ވިދާޅުވި އެވެ.
ކުއިން އިތުރަށް ވިދާޅުވީ، ސީކްރެޓް ސާވިސްގެ އޮފިސަރުން ރައްދުގައި ދިން ހަމަލާތަކުގައި ތުހުމަތުކުރެވޭ މީހާގެ ގަޔަށް ވަޒަން އަރައި ޒަހަމްވުމާ ގުޅިގެން، އޭނާއަށް މިހާރު ހޮސްޕިޓަލުގައި ފަރުވާދެމުންދާ ކަމަށެވެ.
މި ހާދިސާ ހިނގުމުގެ ކުޑަވަގުތުކޮޅެއް ކުރިން އެމެރިކާގެ ނައިބު ރައީސް ޖޭޑީ ވެންސްގެ މޮޓޯކޭޑް އެ ސަރަހައްދުން ދަތުރުކުރި ކަމަށް ކުއިން ވިދާޅުވި އެވެ. ނަމަވެސް، ތުހުމަތުކުރެވޭ މީހާ ނައިބު ރައީސްގެ މޮޓޯކޭޑަށް ހަމަލާދޭން އުޅުނުކަމުގެ އެއްވެސް ނިޝާނެއް ފެންނަން ނެތް ކަމަށް ސީކްރެޓް ސާވިސްގެ ޑެޕިއުޓީ ޑައިރެކްޓަރު ފާހަގަކުރެއްވި އެވެ.
މީގެ އިތުރުން، ތުހުމަތުކުރެވޭ މީހާ ފޮނުވާލި ވަޒަނެއް އެ ސަރަހައްދުގައި ހުރި ކުޑަކުއްޖެއްގެ ގަޔަށް އަރާފައިވާ ކަމަށާއި، އެ ކުއްޖާއަށް ލިބުނު އަނިޔާތަކަކީ ފުރާނައަށް ނުރައްކާވާ ފަދަ އަނިޔާތަކެއް ނޫން ކަމަށް ކުއިން ވިދާޅުވި އެވެ. އެ ކުއްޖާއަށް މިހާރު ދަނީ ހޮސްޕިޓަލުގައި ފަރުވާ ދެމުންނެވެ.
ކުއިން ވިދާޅުވި ގޮތުގައި އެ މީހާ ހުރީ ވައިޓް ހައުސް ކޮމްޕްލެކްސްގެ އެތެރޭގެ ސަރަހައްދެއްގައެއް ނޫނެވެ.
ވައިޓް ހައުސް ކޮރެސްޕޮންޑެންޓްސް އެސޯސިއޭޝަންގެ ރޭގަނޑުގެ ފަރިއްކޮޅުގެ ތެރޭގައި މިދިޔަ މަހުގެ ފަހުކޮޅު ހިނގި ބަޑިޖެހުމުގެ ހާދިސާއަކާ ގުޅިގެން މީހަކު ހައްޔަރުކޮށްފައިވާއިރު، އެމެރިކާގެ ވެރިރަށުގެ ސަލާމަތީ ބާރުތައް މި ދުވަސްވަރު އޮތީ ވަރަށް ބޮޑަށް ވަރުގަދަކޮށްފަ އެވެ.
ހޯމަ ދުވަހުގެ މި ހާދިސާއަކީ ރައީސް ޑޮނަލްޑް ޓްރަމްޕް އަވަހާރަކޮށްލަން ފަހަކަށް އައިސް ކުރަމުންދާ "އެހެން މަސައްކަތްތަކާ" ގުޅުންހުރި ކަމެއްތޯ ކުއިންއާ ސުވާލުކުރެވުނެވެ. މި ހާދިސާ ހިނގިއިރު ޓްރަމްޕް ހުންނެވީ ވައިޓް ހައުސްގެ އެތެރޭގަ އެވެ.
"މިއީ ސީދާ ރައީސަށް އަމާޒުކޮށްގެން ދިން ހަމަލާއެއް ކަމެއް ނުވަތަ ނޫން ކަމެއް އަދި ނޭނގޭ، ނަމަވެސް އަޅުގަނޑުމެން އެކަން ހޯދާނަން،" ކުއިން ވިދާޅުވި އެވެ.
ސީކްރެޓް ސާވިސްގެ ޑެޕިއުޓީ ޑައިރެކްޓަރު ވަނީ ޝައްކުކުރެވޭ މީހާގެ އަތުން ހަތިޔާރެއް ފެނިފައިވާކަން ކަށަވަރުކޮށްދެއްވާފަ އެވެ. ނަމަވެސް އެއީ ކޮން ކަހަލަ ހަތިޔާރެއް ކަމުގެ ތަފްސީލެއް ނުދެއްވަ އެވެ.
