އެމެރިކާގެ ރައީސް ޑޮނަލްޑް ޓްރަމްޕްގެ ފުރާނައަށް ނުރައްކާވާ ފަދަ އިންޒާރެއް ދިން ކަމުގެ ތުހުމަތުގައި، އެފްބީއައިގެ ކުރީގެ ޑިރެކްޓަރު ޖޭމްސް ކޯމީގެ މައްޗަށް ރަސްމީކޮށް ދައުވާ އުފުލައިފި އެވެ. މި ދައުވާ އުފުލާފައިވަނީ މީސްމީޑިއާގައި އޭނާ ހިއްސާކުރި ފޮޓޯއަކާ ގުޅިގެންނެވެ.
މިދިޔަ އަހަރު އޭނާ އިންސްޓަގްރާމްގައި އާންމުކުރި އެ ފޮޓޯއިން ފެންނަނީ އަތިރިމަތީގައި ހުރި ބޮލިތަކަކުން "86 47" މި ނަންބަރުތައް ޖަހާފައިވާ މަންޒަރެވެ. "އެއިޓީ-ސިކްސް" (86) އަކީ އެއްޗެއް ބޭރުކޮށްލުން ނުވަތަ ނައްތާލުމަށް ނުރަސްމީކޮށް ބޭނުންކޮށް އުޅޭ ބަހެކެވެ.
އެ ފޮޓޯގައިވާ ނަންބަރުތަކުގެ މާނައެއް އެނގިވަޑައިނުގަންނަވާ ކަމަށް ކޯމީ ވިދާޅުވި ނަމަވެސް، ރައީސް ޓްރަމްޕާއި ސަރުކާރުގެ އިސް ބޭފުޅުން ވިދާޅުވަނީ އެއީ އެމެރިކާގެ 47 ވަނަ ރައީސަށް ދިން އިންޒާރެއް ކަމަށެވެ.
މި ދައުވާތަކަށް ރައްދު ދެއްވަމުން ކޯމީ ވިދާޅުވީ، އޭނާއަކީ އަދިވެސް ކުށެއް ނެތް މީހެއް ކަމަށާއި، އެއްވެސް ބިރެއް ނެތް ކަމަށެވެ. އަދި މިނިވަން ޝަރުއީ ނިޒާމަށް އަދިވެސް އިތުބާރު ކުރައްވާ ކަމަށް އޭނާ ވިދާޅުވި އެވެ.
ދައުވާތައް އިއުލާން ކުރުމަށް ބޭއްވި ނޫސްވެރިންގެ ބައްދަލުވުމުގައި އެފްބީއައިގެ މިހާރުގެ ޑިރެކްޓަރު ކާޝް ޕަޓޭލް ވިދާޅުވީ، ކޯމީއަކީ އެ އިދާރާގެ ކުރީގެ ޑިރެކްޓަރަށް ވީތީ، އެފަދަ ފޮޓޯއެއް އާންމުކުރުމުން ނުކުމެދާނެ ނަތީޖާއާއި އޭގެ ސަބަބުން ސަމާލުކަން ހުއްޓޭނެ މިންވަރު އޭނާއަށް ވަރަށް ރަނގަޅަށް އެނގިވަޑައިގަންނަވާނެ ކަމަށެވެ.
ކާޝް ޕަޓޭލް އިތުރަށް ވިދާޅުވީ، ޖޭމްސް ކޯމީ ވަނީ ވަރަށް ދަށު ދަރަޖައަކަށް ވެއްޓި، ރައީސް ޓްރަމްޕްގެ ފުރާނައަށް ނުރައްކާވާ ފަދަ އިންޒާރަކަށް ހިތްވަރުދީ، މުޅި ދުނިޔެއަށް ފެންނާނެހެން އެ ފޮޓޯ އިންސްޓަގްރާމްގައި އާންމުކޮށްފައި ކަމަށެވެ.
ދެހާސް ސޯޅަވަނަ އަހަރުގެ އެމެރިކާގެ ރިޔާސީ އިންތިޚާބަށް ރަޝިއާއިން ނުފޫޒު ފޯރުވި ކަމަށް ބުނާ މައްސަލަ ތަހުގީގު ކުރަން ފެއްޓެވުމާ ގުޅިގެން، ޓްރަމްޕްގެ ފުރަތަމަ ދައުރުގައި ކޯމީ މަގާމުން ވަކިކުރެއްވި އެވެ.
އޭގެ ފަހުން ޓްރަމްޕް ގެންދަވަނީ ތަކުރާރުކޮށް ކޯމީގެ މައްޗަށް ދައުވާ ކުރުމަށް ގޮވާލައްވަމުންނެވެ. އަންގާރަ ދުވަހު އުފުލި މި ދައުވާތަކަކީ މި ސަރުކާރުން އޭނާގެ މައްޗަށް ދައުވާ ކުރަން ކުރި ދެވަނަ މަސައްކަތެވެ.
ގާނޫނީ ބައެއް މާހިރުން ވިދާޅުވާ ގޮތުގައި މި ދައުވާތަކުގައި އެއްވެސް ބުރަދަނެއް ނެތެވެ. އަދި މިއީ ޓްރަމްޕްގެ ސިޔާސީ ވާދަވެރިންނަށް އަމާޒުކޮށްގެން ޖަސްޓިސް ޑިޕާޓްމަންޓުން ކުރާ މަސައްކަތެއް ކަމަށް ބުނެ ސުވާލުތައް ވަނީ އުފެދިފަ އެވެ.
މިދިޔަ ސެޕްޓެމްބަރު މަހުގެ ފަހުކޮޅުވެސް ފެޑަރަލް ގްރޭންޑް ޖޫރީއަކުން ވަނީ ކޯމީގެ މައްޗަށް ދައުވާ އުފުލާފަ އެވެ. އެ ފަހަރު ދައުވާ ކުރީ 2020 ވަނަ އަހަރުގެ ސެޕްޓެމްބަރު މަހު ކޮންގްރެސްގައި ހެކިބަސް ދެއްވަމުން ދޮގު ހެއްދެވި ކަމަށާއި، ކޮންގްރެސްގެ މަސައްކަތަށް ހުރަސް އެޅުއްވި ކަމަށް ބުނެ އެވެ.
އެ ދައުވާތައް އުފުލީ، ކޯމީ ހިމެނޭހެން ޓްރަމްޕްގެ ސިޔާސީ ވާދަވެރިންގެ މައްސަލަތައް ވަރުގަދައަށް ތަހުގީގު ކުރުމަށް ގައުމުގެ އެންމެ އިސް ގާނޫނީ އޮފިޝަލަށް ޓްރަމްޕް ގޮވާލެއްވިތާ މަދު ދުވަސްކޮޅެއްގެ ތެރޭގަ އެވެ.
އޮކްޓޯބަރު މަހު ބޭއްވި ކުރު އަޑުއެހުމެއްގައި ކޯމީ ވަނީ އެ ދައުވާތަކަށް އިންކާރު ކުރައްވާފަ އެވެ. އެ މައްސަލަ ނޮވެމްބަރު މަހު ވަނީ ބޭރުކޮށްލާފަ އެވެ.
