އީރާނުގެ ރިވޮލިއުޝަނަރީ ގާޑުން ދިން އިންޒާރުތަކަށް ނުކިޔަމަންތެރިވެ، ދަތުރު ހުއްޓާލުމަށް ދެކޮޅު ހެދުމުން، ހޮރްމުޒް ކަނޑުއޮޅީގައި އެމެރިކާގެ ކަނޑުގެ ސިފައިންގެ މަނަވަރަކަށް ދެ މިސައިލް ހަމަލާ ފޮނުވާފައިވާ ކަމަށް އީރާނުގެ ފާރްސް ނިއުސް އެޖެންސީން ރިޕޯޓްކޮށްފި އެވެ.
މި ހަމަލާ ދީފައިވާ ކަމަށް ރިޕޯޓްތައް ބުނާއިރު، ހޮރްމޫޒް ކަނޑުއޮޅީގައި ތާށިވެފައިވާ އުޅަނދުފަހަރަށް މަގުދައްކައި އެ ސަރަހައްދުން ނެރުމަށްޓަކައި "ޕްރޮޖެކްޓް ފްރީޑަމް" ގެ ނަމުގައި ހާއްސަ ހަރަކާތެއް ފަށާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ވިދާޅުވެފަ އެވެ.
އެމެރިކާގެ ސެންޓްރަލް ކޮމާންޑުން ބުނި ގޮތުގައި، މި މަސައްކަތުގައި އެމެރިކާގެ އަސްކަރިއްޔާގެ 15،000 ސިފައިންނާއި، އެއްގަމާއި ކަނޑުގައި ބޭނުންކުރާ 100 އަށްވުރެ ގިނަ މަތިންދާބޯޓުގެ އިތުރުން، ހަނގުރާމަމަތީ މަނަވަރުތަކާއި ޑްރޯންތައް ބައިވެރިވާނެ އެވެ.
ހޮރްމޫޒް ކަނޑުއޮޅިން ދަތުރުކުރި އެމެރިކާގެ މަނަވަރަށް އީރާނުން ހަމަލާދިން ކަމަށް އިއުލާން ކުރުމަކީ، އެމެރިކާ އާއި އީރާނާ ދެމެދު އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން ނިމުމަކަށް އައުންތޯ ސުވާލުކުރުމުން، ތެހެރާންގައި ހުންނަވައި އަލްޖަޒީރާއަށް މައުލޫމާތު ދެއްވަމުން އެނަލިސްޓް ފުއާދު އިޒާދީ ވިދާޅުވީ އެ އެއްބަސްވުން މާ ކުރިން ވެސް ނިމުމަކަށް އައިސްފައިވާ ކަމަށެވެ.
ތެހެރާން ޔުނިވާސިޓީގެ ޕްރޮފެސަރެއް ކަމަށްވާ އިޒާދީ ވިދާޅުވީ އޭޕްރީލް އަށްވަނަ ދުވަހު އެމެރިކާއިން އީރާނުގެ ބަނދަރުތައް ބަންދުކޮށް ހިސާރުކުރުމުން އެ އެއްބަސްވުން ވަނީ ނިމުމަކަށް އައިސްފައި ކަމަށެވެ، އޭނާ ފާހަގަކުރެއްވި ގޮތުގައި ބައިނަލްއަގުވާމީ ގާނޫނުތަކާއި އެމެރިކާގެ ގާނޫނުތަކުގެ ދަށުން ވެސް ބަނދަރުތައް ހިސާރުކުރުމަކީ ހަނގުރާމައިގެ އަމަލެކެވެ.
