އެމެރިކާގެ އަސްކަރީ މަރުކަޒުތަކަށް ހަމަލާދޭން ހިތްވަރުދެއްވައި ރައީސުލްޖުމްހޫރިއްޔާ މުހައްމަދު މުއިއްޒު ދެއްކެވި ވާހަކަ، އެމެރިކާ ސަރުކާރުން ދެކުނާއި މެދުތެރޭ އޭޝިއާގެ ގައުމުތަކަށް ކަނޑައަޅާފައި ހުންނަވާ ހާއްސަ މަންދޫބު، ސާޖިއޯ ގޯ އަށް ދިވެހި ސަރުކާރުން ތަފުސީލުކޮށްދީ ސާފުކޮށްދީފި އެވެ.
ބިއުރޯ އޮފް ސައުތު އެންޑް ސެންޓްރަލް އޭޝިއާ (އެސްސީއޭ)ގެ ރަސްމީ އެކައުންޓުން ރޭ އެކްސްގައި ކުރި ޕޯސްޓެއްގައި ބުނީ ދިވެހިރާއްޖޭގެ ފޮރިން މިނިސްޓަރު، އިރުތިޝާމް އާދަމް އާއި ގޯ އަދި، އެސްސީއޭގެ ޑެޕިއުޓީ އެސިސްޓެންޓް ސެކްރެޓްރީ، ބެތަނީ މޮރިސަންއާ ފޯނުން ވާހަކަ ދައްކަވާފައިވާ ކަމަށެވެ.
އެ ކޯލުގައި، މިފަހުން މުއިއްޒު އެމެރިކާއާ ގުޅުވައި ދެއްކެވި ވާހަކަތައް އެ ބޭފުޅުންނަށް އިރުތިޝާމް އިތުރަށް ކިޔައިދެއްވައި ދޭހަކޮށްދެއްވި ކަމަށް އެ ޕޯސްޓުގައި ބުންޏެވެ.
"މި ފޯނު ކޯލުގައި ދިވެހިރާއްޖޭގެ ރައީސުލްޖުމްހޫރިއްޔާ ދާދި ފަހުން ދައްކަވާފައިވާ ބައެއް ވާހަކަތައް ފޮރިން މިނިސްޓަރު ވަނީ ސާފުކޮށްދެއްވައިފަ،" އެ ޕޯސްޓުގައި ބުންޏެވެ.
އަރަބި ގައުމުތަކުގައި އެމެރިކާއިން ގާއިމުކޮށްފައިވާ އަސްކަރީ ބޭސްތަކަށް ހަމަލާދޭން ރައީސް ހިތްވަރު ދެއްވައިފި
"މި ހަނގުރާމަ ކުރާ ދެ ފަރާތަށް، އިރާނަށް ހަމަލާ ދޭ އެމެރިކާ އާއި އިޒްރޭލުގެ ތަންތަނަށް އެ ސަރަހައްދުގެ މުސްލިމުންނަށް ގެއްލުން ނުވާ ގޮތަށް އެކަން ހިނގުމަކީ ކަން ނޭނގެ މިކަން ވާން ޖެހޭނެ ގޮތަކީ. އެއީ ދިވެހި ސަރުކާރުގެ ސިޔާސަތަކީ،" ރައީސް މުއިއްޒު ވިދާޅުވި އެވެ.
މަންދޫބު ގޯއަކީ އެމެރިކާއިން އިންޑިއާއަށް ކަނޑައަޅާފައި ހުންނަވާ ސަފީރު ވެސް މެ އެވެ. އޭގެ އިތުރުން އޭނާއަކީ ޓްރަމްޕުގެ އެޑްވައިޒަރެކެވެ. އެމެރިކާގެ މީޑިއާތަކުގައި ލިޔެފައި ހުރި ވާހަކަތަކަށް ބަލާއިރު ގޯއަކީ ޓްރަމްޕު ސަރުކާރުގެ އެންމެ ނުފޫޒުގަދަ އެއް ލީޑަރެވެ.
އެމެރިކާއިން ގަލްފުގެ އަރަބި ގައުމުތަކުގައި ގާއިމުކޮށްފައިވާ އަސްކަރީ ބޭސްތަކަށް އިރާނުން ހަމަލާ ދިނުމަށް ރައީސް މުހައްމަދު މުއިއްޒު ހިތްވަރުދެއްވީ މިދިޔަ މަހުގެ 23 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގަ އެވެ.
އެ ބައްދަލުވުމުގައި ވާހަކަދައްކަވަމުން މުއިއްޒު ވިދާޅުވީ، އެމަނިކުފާނު ދެކެވަޑައިގަންނަވާ ގޮތުގައި އަރަބި ގައުމުތަކުގެ ރައްޔިތުންނަށް ގެއްލުންނުވާ ގޮތަށް އެ ގައުމުތަކުގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށް އިރާނުން ހަމަލާދިނުމަކީ އެމަނިކުފާނު ތާއީދު ކުރައްވާ ސިޔާސަތެއް ކަމަށެވެ.
"މި ހަނގުރާމަ ކުރާ ދެ ފަރާތަށް، އިރާނަށް ހަމަލާ ދޭ އެމެރިކާ އާއި އިޒްރޭލުގެ ތަންތަނަށް [އަސްކަރީ ބޭސްތަކަށް] އެ ސަރަހައްދުގެ މުސްލިމުންނަށް ގެއްލުން ނުވާ ގޮތަށް އެކަން ހިނގުމަކީ ކަން ނޭނގެ މިކަން ވާން ޖެހޭނެ ގޮތަކީ. އެއީ ދިވެހި ސަރުކާރުގެ ސިޔާސަތަކީ،" ރައީސް މުއިއްޒު ވިދާޅުވި އެވެ.
މުއިއްޒު އެ ވާހަކަތައް ދެއްކެވިއިރު، ގޯ އޮތީ މުއިއްޒުއާ ބައްދަލުކުރައްވަން އެޕޮއިންޓްމެންޓެއް ހަމަޖައްސައިފަ އެވެ. ނަމަވެސް، އެމެރިކާގެ އަސްކަރީ މަރުކަޒުތަކަށް ހަމަލާދޭން ހިތްވަރުދެއްވައި މުއިއްޒު ވާހަކަދެއްކެވުމާއެކު، ގޯ ވަނީ އެޕޮއިންޓްމެންޓް ކެންސަލް ކުރެއްވުމަށްފަހު ރާއްޖެއިން ފުރާވަޑައިގެންފަ އެވެ.
ބަހުގެ ހަމަލާތަކެއް ދިނުމުން މުއިއްޒުގެ ބައްދަލުވުން ކެންސަލް ކުރެއްވުމަށްފަހު ޓްރަމްޕުގެ މަންދޫބު ރާއްޖެއިން ފުރާވަޑައިގެންފި
ގޯ ފުރާވަޑައިގަތީ ހާރިޖީ ވަޒީރު އަބްދުﷲ ހަލީލު އަދި ޑިފެންސް މިނިސްޓަރު ޣައްސާން މައުމޫންއާ ބައްދަލު ކުރެއްވުމަށްފަހު. ރައީސް މުއިއްޒުއާ ބައްދަލު ކުރައްވަން ވެސް އޭނާ އެޕޮއިންޓްމެންޓެއް ހަމަޖެއްސެވި. އެކަމަކު، ގޯ ފުރާވަޑައިގަތީ އެ ބައްދަލުވުން ކެންސަލް ކުރެއްވުމަށްފަހު.
ރާއްޖެއިން ފުރާވަޑައިގެންނެވިއިރު އޭނާ ރާއްޖޭގައި ހުންނަވަނިކޮށް މަރާލަން ގޮވާލި މައްސަލައެއް ވެސް ފެންމަތިވި އެވެ. ގޯ މަރާލަން ގޮވައިލީ ސޯޝަލް މީޑިއާ ޕްލެޓްފޯމް ފޭސްބުކްގައި ހުސެއިން އަހުސަންގެ ނަމުގައި ހިންގާ އެކައުންޓަކުންނެވެ. ގޯ މަރާލަން ޖެހޭ ކަމަށް އެ އެކައުންޓުން ބުނީ ރާއްޖެއަށް ކުރައްވާ ދަތުރު އިއުލާނު ކުރި ދުވަހު އެވެ.
"އެންމެން ނުކުމެ ރަޖަމްކޮށް މަރާލަންވީ. ސާޖިއޯ ގޯ އެބަ ރާއްޖެ އާދޭ ދިވެހި ސަރުކާރާ ބައްދަލު ކުރަން. އޭނާއަކީ އެމެރިކާ މީހެއް،" އިނގިރޭސިން ކުރި ޕޯސްޓެއްގައި އެ އެކައުންޓުން ބުނެފައިވެ އެވެ.
އެސްސީއޭއިން މިރޭ ކުރި ޕޯސްޓުގައި ބުނީ، ދިވެހިރާއްޖެއިން އެމެރިކާއާއެކު ބަދަހި ގުޅުމެއް ބާއްވަން މުއިއްޒު ބޭނުންވެވަޑައިގަންނަވާ ކަމަށް އިރުތިޝާމް ވިދާޅުވި ކަމަށެވެ.
