އިޒްރޭލާއި އީރާނާ ދެމެދު ކުރަމުންދާ ހަނގުރާމައިގެ ތެރެއިން، މެދުއިރުމަތީގެ ބައިވެރިންނަށް 8.6 ބިލިއަން ޑޮލަރުގެ ހަތިޔާރު ވިއްކުމަށް އެމެރިކާ އިން ހުއްދަ ދީފި އެވެ.
މި ހަތިޔާރުތައް ވިއްކުމަށް ނިންމާފައިވަނީ، އެމެރިކާގެ ކޮންގްރެސްގެ ހުއްދައާ ނުލައި، ކުއްލި ހާލަތްތަކަށް ރިއާޔަތްކޮށް ހަތިޔާރު ބަދަލުކުރުމުގެ ކަންކަން އަވަސްކުރުމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އެދިވަޑައިގަތުމާ ގުޅިގެންނެވެ.
ފެބްރުއަރީ މަހުގެ ފަހުކޮޅު ހަނގުރާމަ ފެށުނީއްސުރެ، އިޒްރޭލާއި ގަލްފުގެ ގައުމުތަކަށް އީރާނުން ދެމުންދާ މިސައިލް އަދި ޑްރޯން ހަމަލާތަކުގެ ސަބަބުން، އެ ގައުމުތަކުގައި ހުރި އެމެރިކާގެ ހަތިޔާރުގެ ރަސްމީ ރިޒާވް ހުސްވެ، ވައިގެ ދިފާއީ ނިޒާމުތަކަށް ވަނީ ބާރުބޮޑުވެފަ އެވެ.
މި މުއާމަލާތުގެ ދަށުން 992 މިލިއަން ޑޮލަރުގެ އެޑްވާންސް ޕްރެސިޝަން ކިލް ވެޕަން ސިސްޓަމް އާއި އެއާ ގުޅޭ ސާމާނު އިޒްރޭލަށް ފޯރުކޮށްދިނުމަށް ވަނީ ހަމަޖެހިފަ އެވެ. އަދި ކުވެއިތުން 2.5 ބިލިއަން ޑޮލަރުގެ ބެޓްލް ކޮމާންޑް ސިސްޓަމްތައް ގަތުމަށް ވެސް ވަނީ ނިންމާފަ އެވެ.
މީގެ އިތުރުން، ގަތަރުން އޭޕީކޭޑަބްލިއުއެސް ގަތުމަށާއި އެ ގައުމުގެ ޕެޓްރިއަޓް އެއާ އެންޑް މިސައިލް ޑިފެންސް ސިސްޓަމްތައް އަލުން ގާއިމްކުރުމަށް ގާތްގަނޑަކަށް 5 ބިލިއަން ޑޮލަރުގެ ހުއްދަ ދީފައިވާއިރު، ޔުނައިޓެޑް އަރަބް އެމިރޭޓްސް (ޔޫއޭއީ) އަށް 148 މިލިއަން ޑޮލަރުގެ އޭޕީކޭޑަބްލިއުއެސް ގަތުމުގެ ހުއްދަ ވަނީ ދީފަ އެވެ.
މިދިޔަ މާޗް މަހު ވެސް ސްޓޭޓް ޑިޕާޓްމަންޓުން ވަނީ ޔޫއޭއީ، ކުވެއިތު އަދި އުރުދުންއަށް 16.5 ބިލިއަން ޑޮލަރުގެ ހަތިޔާރު ވިއްކުމަށް ވަކިވަކިން ހުއްދަ ދީފަ އެވެ.
އެ ފަހަރުގެ އެއްބަސްވުންތަކުގެ ތެރޭގައި ޔޫއޭއީއަށް ބޭނުންވާ ޑްރޯން، މިސައިލް، ރާޑަރު ސިސްޓަމް އަދި އެފް-16 މަތިންދާބޯޓުތަކުގެ އިތުރުން، ކުވެއިތުގެ ވައިގެ އަދި މިސައިލް ދިފާއީ ރާޑަރު ސިސްޓަމްތައް ހިމެނެ އެވެ.
