އެމެރިކާގެ އަސްކަރިއްޔާއަކީ އާޓިފިޝަލް އިންޓެލިޖެންސް ނުވަތަ އޭއައި އަށް އިސްކަންދޭ ބާރަކަށް ހެދުމަށްޓަކައި، ދުނިޔޭގެ އެންމެ ބޮޑެތި ޓެކްނޮލޮޖީ ކުންފުނިތަކާއެކު ޕެންޓަގަނުން އާ އެއްބަސްވުންތަކެއްގައި ސޮއިކޮށްފިއެވެ.
މި ނިންމުމާއެކު އެމެރިކާގެ ދިފާއީ ވުޒާރާއިން ވަނީ ގޫގުލް، އޯޕަން އޭއައި، އެމެޒޯން، މައިކްރޯސޮފްޓް، ސްޕޭސް އެކްސް، އޮރަކަލް، އެންވީޑިއާ އަދި ރިފްލެކްޝަން ކިޔާ ކުންފުންޏަކާއެކު އަށް އެއްބަސްވުމެއް ގާއިމުކޮށްފައެވެ.
ޕެންޓަގަނުން ހާމަކުރި ގޮތުގައި މި އެއްބަސްވުންތަކުގެ ދަށުން، ގާނޫނީ އިމުގެ ތެރެއިން ހިންގާ ހުރިހާ އަސްކަރީ އޮޕަރޭޝަންތަކެއްގައި އޭއައި ޓެކްނޮލޮޖީ ބޭނުންކުރުމުގެ ހުއްދަ މިހާރު އޮންނާނެއެވެ. މިއީ އެމެރިކާގެ އަސްކަރިއްޔާ އޭއައި އަށް ބިނާވެފައިވާ ފައުޖަކަށް ބަދަލުކުރުމަށް އެޅުނު މުހިންމު ފިޔަވަޅެއް ކަމަށް އެ އިދާރާއިން ސިފަކުރެއެވެ. މި މަޝްރޫއުގެ މަގުސަދަކީ އެމެރިކާގެ ޓެކްނޮލޮޖީގެ ކުރިއެރުންތައް ބޭނުންކޮށްގެން ހަނގުރާމައިގެ މައިދާނުގައި ސިފައިންނަށް ބޭނުންވާ އިތުބާރާއި ވަސީލަތްތައް ފޯރުކޮށްދިނުމެވެ.
މި ބޮޑު މަޝްރޫއުގައި މަޝްހޫރު އޭއައި ކުންފުނި އެންތްރޮޕިކް ބައިވެރިވެފައެއް ނުވެއެވެ. އެ ކުންފުނިން ބުނާ ގޮތުގައި ޕެންޓަގަނުން އޭއައި ބޭނުންކޮށްގެން ހަނގުރާމަތަކުގައި ނުވަތަ ގައުމުގެ އެތެރޭގެ ކަންކަމުގައި އަމަލުކޮށްފާނެ ގޮތަކާ މެދު އެ ކުންފުނިން ކަންބޮޑުވެއެވެ.
އެންތްރޮޕިކް އިން ވަނީ އެމެރިކާ ސަރުކާރާ ދެކޮޅަށް ދައުވާވެސް ކޮށްފައެވެ. އެ ކުންފުނިން ތުހުމަތުކުރާ ގޮތުގައި، އެއްބަސްވުމުގައި ހިމެނޭ ބައެއް މާއްދާތަކަށް އިއުތިރާޒު ކުރުމުން ސަރުކާރުން ވަނީ އެ ކުންފުންޏާ މެދު ބަދަލުހިފުމުގެ ފިޔަވަޅުތަކެއް އަޅާފައެވެ.
ޕެންޓަގަނުން ބުނީ ގިނަ ކުންފުނިތަކަކާއެކު މަސައްކަތް ކުރުމުގެ ބޭނުމަކީ ހަމައެކަނި އެއް ކުންފުންޏަކަށް ބަރޯސާވުން ހުއްޓުވުމެވެ. މިދިޔަ އަހަރު އޭއައި ޕްލެޓްފޯމް ތައާރަފުކުރި ފަހުން، ދިފާއީ ދާއިރާގެ މިލިއަނަކަށްވުރެ ގިނަ މުވައްޒަފުން އެ ވަސީލަތްތައް ބޭނުންކޮށްފައިވާ ކަމަށް ޕެންޓަގަނުން ބުނެއެވެ. މީގެ ސަބަބުން ކުރިން މަސްތަކެއް ނަގާ މަސައްކަތްތައް މިހާރު މަދު ދުވަސްކޮޅެއްގެ ތެރޭގައި ނިންމާލެވޭ ކަމަށްވެސް އެ އިދާރާއިން ފާހަގަކުރެއެވެ.
ޒަމާނީ ހަނގުރާމަތަކުގައި ކުރިހޯދުމަށްޓަކައި ބާރުގަދަ ޓެކްނޮލޮޖީއަކީ ކޮންމެހެން ބޭނުންތެރި އެއްޗަކަށް ވެފައިވާއިރު، އެމެރިކާއިން ދަނީ ފާއިތުވި އަހަރުތަކުގައި އޭއައިގެ ގާބިލުކަން އިތުރުކުރުމަށް ގިނަ މަސައްކަތްތަކެއް ކުރަމުންނެވެ. އެންތްރޮޕިކްގެ ކްލޯޑް ޗެޓްބޮޓް ފަދަ ވަސީލަތްތައް މިހާރުވެސް ބައެއް އިދާރާތަކުގައި ބޭނުންކުރަމުންދިޔަ ނަމަވެސް، އެ ކުންފުނީގެ ސީއީއޯ ވަނީ އޭއައި ބޭނުންކޮށްގެން މީހުންނަށް ފާރަލުމާއި އަމިއްލައަށް ހަމަލާދޭ ހަތިޔާރު އުފައްދާފާނެ ކަމުގެ ބިރު އޮތް ކަމަށް ވިދާޅުވެފައެވެ.
މި މައްސަލައިގައި ދިފާއީ ވަޒީރު ޕީޓް ހެގްސެތު ވަނީ އެންތްރޮޕިކް އަކީ ސަޕްލައި ޗެއިން އަށް އޮތް ނުރައްކަލެއްގެ ގޮތުގައި ކަނޑައަޅުއްވާފައެވެ. މިއާއެކު އެ ކުންފުނީގެ ވަސީލަތްތައް ސަރުކާރުގެ އިދާރާތަކުގައި ބޭނުންކުރުން ވަނީ ނުރައްކާތެރި ކަމެއްގެ ގޮތުގައި ބަލަން ފަށާފައެވެ. މި ނިންމުމާ ގުޅޭ ގާނޫނީ މައްސަލަ އަންނަ ސެޕްޓެމްބަރު މަހު ކޯޓަށް ހުށަހެޅޭނެ ކަމަށް ބެލެވެއެވެ. މި ދެބަސްވުންތަކުގެ ތެރެއިން، އޯޕަން އޭއައި ފަދަ އެހެން ކުންފުނިތަކަށް ވަނީ އަސްކަރިއްޔާއާއެކު ގާތުން މަސައްކަތް ކުރުމުގެ ފުރުސަތު ފަހިވެފައެވެ.
