އެމެރިކާގެ ރައީސް ޑޮނަލްޑް ޓްރަމްޕް، ޖަރުމަނުވިލާތުގެ ޗާންސެލާ ފްރީޑްރިކް މާރްޒަށް ވަރަށް ބޮޑަށް ފާޑުވިދާޅުވެ، އިރާނާ ދެކޮޅަށް ކުރަމުންދާ ހަނގުރާމައަކީ ނިއުކްލިއާ ހަތިޔާރު އުފެއްދުން ހުއްޓުވުމަށް ކޮންމެހެން ކުރަންޖެހޭ ކަމެއް ކަމަށް ވިދާޅުވެއްޖެއެވެ.
ޓްރަމްޕް މިފަދައިން ވިދާޅުވީ، އެމެރިކާއާއި އިޒްރޭލުން ގުޅިގެން އިރާނާ ދެކޮޅަށް ކުރަމުންދާ ހަނގުރާމައަށް މާރްޒް ފާޑުވިދާޅުވުމާ ގުޅިގެންނެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އިރާނުން ނިއުކްލިއާ ހަތިޔާރު ހޯދުމަކީ މައްސަލައެއް ނޫން ކަމަށް ޖަރުމަނުގެ ޗާންސެލަރަށް ހީފުޅުވާ ކަމަށާއި، ނަމަވެސް އޭނާއަށް ވާނުވާ އެނގިވަޑައިނުގަންނަވާ ކަމަށެވެ.
އިރާނަށް ނިއުކްލިއާ ހަތިޔާރު ލިބިއްޖެނަމަ މުޅި ދުނިޔެ ރަހީނު ކުރާނެ ކަމަށާއި، އެހެން ރައީސުންނާއި ގައުމުތަކުން މާކުރިން ކުރަންޖެހިފައިވާ ކަމެއް މިހާރު އެމަނިކުފާނު ކުރައްވަމުން ގެންދަވާ ކަމަށް ޓްރަމްޕް ވިދާޅުވިއެވެ. އަދި ޖަރުމަނުގެ އިގްތިސާދީ ހާލަތު ދަށްވަމުންދަނީ މިފަދަ ސަބަބުތަކާ ހުރެ ކަމަށްވެސް ޓްރަމްޕް ތުހުމަތު ކުރެއްވިއެވެ.
ޖަރުމަނަކީ އެމެރިކާއާއި އިޒްރޭލާ ގާތް އެކުވެރިއެއް ނަމަވެސް، މާރްޒް ވަނީ އިރާނާ ދެކޮޅަށް ކުރާ ހަނގުރާމައަކީ ފުންކޮށް ނުވިސްނާ ކުރާ ކަމެއްގެ ގޮތުގައި ސިފަކުރައްވާފައެވެ. އަފްޣާނިސްތާނާއި އިރާގު ހަނގުރާމައިން ލިބުނު ފިލާވަޅުތަކަށް އިޝާރާތް ކުރައްވައި މާރްޒް ވިދާޅުވީ، ހަނގުރާމައަކަށް ވަނުމަކީ ފަސޭހަ ކަމެއް ނަމަވެސް އެއިން ސަލާމަތްވެގެން ނުކުތުމަކީ އުނދަގޫ ކަމެއް ކަމަށެވެ. މީގެ އިތުރުން، އިރާނުގެ ބަނދަރުތަކަށް އަޅާފައިވާ ހުރަސްތައް ނައްތާނުލަނީސް އެމެރިކާއާ މަޝްވަރާ ކުރަން އިރާނުން ދެކޮޅު ހެދުމަކީ ވޮޝިންގްޓަނަށް ލިބޭ ދެރައެއް ކަމަށްވެސް އޭނާ ވިދާޅުވިއެވެ.
މިދިޔަ މަހު މާރްޒް ވައިޓް ހައުސްއަށް ކުރެއްވި ޒިޔާރަތުގައި، ހަނގުރާމައާ ދެކޮޅު ހެދި ސްޕެއިނާ ދެކޮޅަށް ވިޔަފާރީގެ ދަތިކުރުމުގެ ފިޔަވަޅު އަޅާނެ ކަމުގެ އިންޒާރު ޓްރަމްޕް ދެއްވިއިރު، މާރްޒް ބަހެއް ވިދާޅެއް ނުވެ އެވެ. އެ ވަގުތު ޓްރަމްޕް ވަނީ ޖަރުމަނަކީ އިހުތިރާމް ލިބިގެންވާ ގައުމެއް ކަމަށާއި، މާރްޒްއާ އެކު އޮތީ ވަރަށް ރަނގަޅު ގުޅުމެއް ކަމަށް ވިދާޅުވެފައެވެ.
ޓްރަމްޕް މި ހަނގުރާމައަކީ ނިއުކްލިއާ ހަތިޔާރު ހުއްޓުވުމަށް ކުރާ ކަމެއް ކަމަށް ވިދާޅުވި ނަމަވެސް، އެމެރިކާގެ އިންޓެލިޖެންސް އިސްވެރިޔާ ތުލްސީ މިދިޔަ އަހަރު ކޮންގްރެސްގައި ވިދާޅުވެފައިވަނީ އިރާނުން ނިއުކްލިއާ ހަތިޔާރެއް ނުއުފައްދާ ކަމަށެވެ. އަދި މިއަހަރުގެ ފެބްރުއަރީ މަހު އަލުން ބޮން އަޅަން ފެށުމުގެ ކުރިން، ޓްރަމްޕް ވަނީ ޖޫން 2025ގައި ދިން ހަމަލާތަކުން އިރާނުގެ ނިއުކްލިއާ ޕްރޮގްރާމް އެއްކޮށް ހަލާކުކޮށްލާފައިވާ ކަމަށް ތަކުރާރުކޮށް ވިދާޅުވެފައެވެ.
