އިލެކްޝަންސް ކޮމިޝަނަށް ސަރުކާރުގެ ފަރާތުން ފޯރުވާ ނުފޫޒު ބޮޑުވެގެން އެ ކޮމިޝަނުގެ ރައީސް މުހައްމަދު ޒާހިދު މިއަދު އިސްތިއުފާ ދެއްވައިފި އެވެ.
އިލެކްޝަންސް ކޮމިޝަނުން އިސްތިއުފާ ދެއްވިކަން އަދަދު އަށް ވަނީ ކަށަވަރުވެފަ އެވެ. މި ނޫހާ ވާހަކަ ދެއްކި މަސްދަރަކުން ބުނީ ޒާހިދު އިސްތިއުފާ ދެއްވިއިރު، އިލެކްޝަންސް ކޮމިޝަނަށް ސަރުކާރުގެ ފަރާތުން ވަރަށް ބޮޑެތި ނުފޫޒު ފޯރުވަމުންދިޔަ ކަމަށެވެ.
"އެހާ ބޮޑު ޕްރެޝަރެއް ސަރުކާރުން ކުރިމަތިވަމުންދާ ދަނޑިވަޅެއްގައި ޒާހިދު ކޮމިޝަނުގައި މަސައްކަތް ކުރަން ބޭނުން ނުވީ،" އަދާ ކުރާ ވަޒީފާގެ ސަބަބުން ނަން ހާމަ ކުރަން ޝަރުތުކޮށް މި ނޫހާ ވާހަކަ ދެއްކި މަސްދަރުން ބުންޏެވެ.
މި ހަބަރަށް ކޮމެންޓެއް ހޯދުމަށް ޒާހިދުއަށް މި ނޫހުން ގުޅި ނަމަވެސް މިވަގުތު ފޯނަށް ޖަވާބު ނުދެއްވާތީ އޭނާގެ ބަހެއް ނުލިބުނެވެ. އިލެކްޝަންސް ކޮމިޝަނުގެ ރައީސްގެ މަގާމަށް ޒާހިދު އައްޔަން ކުރީ ޖެނުއަރީ، 2025، ގަ އެވެ.
މި ނޫހަށް އެނގިފައިވާ ގޮތުގައި، މި ދުވަސްވަރު އެންމެ ބޮޑު ޕްރެޝަރެއް ސަރުކާރުގެ ފަރާތުން ކުރިމަތިވަނީ އިދިކޮޅު ސިޔާސީ ޕާޓީތަކަށް ފިޔަވަޅު އެޅުމަށެވެ. އަދި ނިމިދިޔަ ލޯކަލް ކައުންސިލްތަކުގެ އިންތިހާބާއި ފެންނަ ނުފެންނަ ވޯޓުން ސަރުކާރުން ބަލިވުމުން ވެސް ޕްރެޝަރުތަކެއް ކުރިމަތިވި އެވެ.
ޒާހިދު މަގާމުން އިސްތިއުފާ ދެއްވިއިރު، ޒާހިދު ވަނީ ރައީސް މުހައްމަދު މުއިއްޒާއެކު ޑިސެމްބަރު، 2025، ގައި ސިއްރު ބައްދަލުވުމެއް ބާއްވައިފަ އެވެ. އޭގެ ކުރިން، އިދިކޮޅު އެމްޑީޕީ އިން ބޭއްވި މުޒާހަރާތަކަކަ ދެކޮޅަށް ވެސް ކޮމިޝަނުން ބަޔާނެއް ނެރުނެވެ.
އިލެކްޝަންސް ކޮމިޝަނުގެ ރައީސް މަގާމުން އިސްތިއުފާ ދޭން ބޭނުން ނަމަ އެކަން ސިޓީއަކުން ހުށަހަޅަންޖެހެނީ ރައީސުލްޖުމްހޫރިއްޔާއަށެވެ. އެއީ މި ސަރުކާރުން ގާނޫނަށް ގެނައި އިސްލާހެކެވެ.
އޭގެ އިތުރުން، އިލެކްޝަންސް ކޮމިޝަނުގެ ރައީސް އާއި ނައިބު ރައީސްއަކީ ސީދާ ރައީސުލްޖުމްހޫރިއްޔާ އައްޔަން ކުރާ މަގާމުތަކެއްގެ ގޮތުގައި ވެސް މި ސަރުކާރުން ވަނީ ހަމަޖައްސައިފަ އެވެ. އެކަމަކު، ކޮމިޝަނުގެ ރައީސް މަގާމަށް އައްޔަން ކުރުމަށްފަހު މަޖިލީހުގެ ރުހުން ހޯދަންޖެހެ އެވެ.
ގާނޫނުގައި ކުރިން އޮންނަ ގޮތުން އިލެކްޝަންސް ކޮމިޝަނުގެ ރައީސް އާއި ނައިބު ރައީސް ކުރަންޖެހޭނީ ކޮމިޝަނުގެ މެންބަރުންގެ ތެރެއިން ނަގާ ވޯޓަކުންނެވެ.
