ނިމިދިޔަ ލޯކަލް ކައުންސިލް އިންތިހާބާއި ރައްޔިތުންގެ މެދުގައި ނެގި ފެންނަ ނުފެންނަ ވޯޓު އެކީގައި ބޭއްވުމުން ފެންނަ ނުފެންނަ ވޯޓަށް ހިޔަނި އެޅުނުނު ކަމަށް ރައީސް އޮފީހުގެ ތަރުޖަމާން މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
ދައުރު ނޫހުން ގެނެސްދިން ޕޮޑްކާސްޓެއްގައި މުންދު ވިދާޅުވީ ކައުންސިލް އިންތިހާބާއި ފެންނަ ނުފެންނަ ވޯޓަކީ މުޅިން ތަފާތު ދެ އިންތިހާބަކަށް ވެފައި، އެ ދެ އިންތިހާބު އެކީގައި ބޭއްވުމުން އޭގެ ހިޔަނި ފެންނަ ނުފެންނަ ވޯޓަށް އެޅުނު ކަމަށެވެ.
"އަޅުގަނޑު ގަބޫލު ކުރަމޭ [ހިޔަނި އެޅުނު ކަމަށް]. އަޅުގަނޑު ގަބޫލު ކުރާ ގޮތުގައި މީގައި ހުރި، ޖުމްލަ ގޮތެއްގައި އިންތިހާބުތަކުގައި ހުރި ރައްޔިތުންގެ އަރިހުން އަޅުގަނޑުމެން އޮޅުންފިލުވަން ޖެހޭ އެއްޗަކާއި، މީގައި ކޮންމެ ގޮތަކަށް އިބާރާތް އޮތަސް، އޮޅުންފިލުވަން ޖެހޭ އެއްޗަކާ އެއީ ދެ އެއްޗެއް،" މުންދު ވިދާޅުވި އެވެ.
މުންދު ވިދާޅުވީ ވޯޓާސް ރަޖިސްޓްރޭޝަނާއި ސިވިކް އެޑިއުކޭޝަންގެ ޒަރިއްޔާއިން އެކަނި ބެލި ކަމުގައިވިޔަސް އިންތިހާބުގައި ގިނަ އަދަދެއްގެ މީހުން ބާތިލު ވޯޓު އެޅުމަކީ ކަންބޮޑުވާ ކަމެއް ކަމަށެވެ. އޭގެ އިތުރުން އޭނާ ވިދާޅުވީ އިންތިހާބުގައި ވޯޓުލާ ކަރުދާސް މީހުންނަށް ވެގެންދިޔައީ މުޅިން އައު ކަރުދާހަކަށް ކަމަށެވެ.
"އެއަށްވުރެ ބޮޑަށް އަޅުގަނޑު ކަންބޮޑުވިކަމެއް ޕާސަނަލީ އަނެއްކާވެސް ސިޔާސީ ތޮފި އަޅާފައި މި ދަންނަވަނީ ވަރަށް އާ އެއްޗަކަށްވި އެ ކަރުދާސް. އަޅުގަނޑުމެން ރާއްޖެއަކީ ގިނަ ގައުމުތައްހެނެއް އެއް ބެލެޓް ޝީޓެއްގައި ސުވާލުތަކެއްކޮށް އެތައް ބައިވަރު ބަޔަކު ވަކިން ހޮވާ،" މުންދު ވިދާޅުވި އެވެ.
"ވަރަށް ބައިވަރު ހުއްޓޭ ބައްލަވާ. މީގައި ވޯޓާ ރަޖިސްޓްރޭޝަނާއި ވޯޓާ ރަޖިސްޓްރޭޝަނާއި ސިވިކް އެޑިއުކޭޝަންގެ ނަޒަރިއްޔާ އެކަނި ބައްލަވާލެއްވިޔަސް އަޅުގަނޑު ކަންބޮޑުވޭ އެހާ ގިނަ އަދަދެއްގެ މީހުން ބާތިލުވެފައި އޮތީމަ."
މީގެ އިތުރުން އިލެކްޝަންސް ކޮމިޝަނުން ރައްޔިތުން ހޭލުންތެރިކުރުމަށް އެކަށީގެންވާ މަސައްކަތްތައް ކޮށްފައި ނުވާ ކަމަށާއި އޭގެ ރަނގަޅަށް މީހުން ހޭލުންތެރިކުރުމުގެ ޒިންމާ ޕާޓީތަކުންވެސް ނަގަން ޖެހޭ ކަމަށެވެ.
"ކުރަންވީ ވަރަކަށް ނުކުރެވޭ [އިލެކްޝަނަކަށް]. އަސްލު އެއަށްވުރެ މާ ތިރިކޮށް. ބައްލަވާ މި ރާއްޖޭގައި އާގޮތަކަށޭ މި އަންނަނީ ކަރުދާސް. އާންމުކޮށް ތިބޭފުޅުން ޒަމާނުއްސުރެ އާދަވެފައި އޮތް ކާފު ޖަހާފައި ނިންމާލާ އުސޫލަކުން ނޫނޭ. އޭގެ ޒިންމާ އޮންނާނެ ޕާޓީތަކުގައި ވެސް. އެ ފަރާތްތަކުގައި ވެސް،" އޭނާ ވިދާޅުވި އެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ފެންނަ ނުފެންނަ ވޯޓުގައި ސަރުކާރުގެ ހުށަހެޅުމާ ދެކޮޅަށް 68.7 ޕަސަންޓު މީހުން ވޯޓު ދިންއިރު، އެއީ ޖުމްލަ 148،859 މީހުންގެ ވޯޓެވެ.
މުހައްމަދު މުއިއްޒު ވިދާޅުވީ ފެންނަ ނުފެންނަ ވޯޓުން ބޮޑު ތަފާތަކުން ސަރުކާރު ބަލިވީ އެވަރަށް މަސައްކަތް ނުކުރެވުމުންނާއި ވާނުވާ އޮޅުންނުފިލުވާ ތިބެ ރައްޔިތުން ވޯޓު ދިނުމުން ކަމަށެވެ.
އެމަނިކުފާނު ވިދާޅުވީ ދެ އިންތިހާބު އެއްކޮށްލުމުގެ މައުލޫ ޕީއެންސީގެ ކެމްޕެއިން ޓީމުތަކަށް ނުކިޔައިދެވުނު ނަމަވެސް އެމަނިކުފާނު އެ ވާހަކަ ވަރަށް ރަނގަޅަށް ރައްޔިތުންނަށް ކިޔައިދީފައިވާނެ ކަމަށެވެ.
