ލޯކަލް ކައުންސިލް އިންތިހާބު އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބުގެ ވޯޓު އެއްވަރުވެގެން ކުރިއަށްގެންދާ ދެވަނަ ބުރުގެ ވޯޓުލުން މިއަދު ފަށައިފި އެވެ.
މިއަދު ހެނދުނު 8:00 އިން ފެށިގެން ހަވީރު 16:00 ޖެހުމުގެ ނިޔަލަށް ކުރިއަށްދާ ދެވަނަ ބުރުގައި ދެ ކައުންސިލަރަކާއި ޑަބްލިއުސީ ރައީސަކާއި ޑަބްލިއުޑީސީ ދެ މެންބަރަކު އިންތިހާބު ކުރަން ހަމަޖެހިފައިވެ އެވެ.
ދެވަނަ ބުރު ކުރިއަށްދާ ދާއިރާތައް:
- ބ. ދޮންފަނު ކައުންސިލަރު (އަންހެނުންނަށް ހާއްސަ ގޮނޑިއެއް)
- ފުވައްމުލައް ދަނޑިވަމު ދާއިރާގެ ކައުންސިލަރު (އަންހެނުންނަށް ހާއްސަ ގޮނޑިއެއް)
- ހއ. ކެލާ ޑަބްލިއުޑީސީ ރައީސް
- ހދ. ނޭކުރެންދޫ ޑަބްލިއުޑީސީ މެންބަރު
- ލ. މާވަށް ޑަބްލިއުޑީސީ މެންބަރު
ދެވަނަ ބުރު ކުރިއަށްދާ ފަސް ދާއިރާގައިވެސް ޕީއެންސީގެ ކެންޑިޑޭޓުން ހިމެނޭއިރު، އޭގެ ތެރޭގައި ދެން ހިމެނެނީ އެމްޑީޕީގެ ތިން ކެންޑިޑޭޓުންނާއި މިނިވަން ދެ ކެންޑިޑޭޓުންނެވެ.
ނިމިދިޔަ ކައުންސިލް އިންތިހާބުގައި ސަރުކާރު ހިންގާ ޕީއެންސީ ވަނީ އިދިކޮޅު އެމްޑީޕީ އަތުން ބަލިވެފަ އެވެ. އެގޮތުން ހުރިހާ ސިޓީއެއްގެ މޭޔަރުކަންވެސް އެމްޑީޕީން ހޯދާފައިވާއިރު، ކައުންސިލަރުންގެ ޖުމްލަ ގޮނޑިވެސް ކާމިޔާބުކުރީ އެމްޑީޕީންކަން ފާހަގަކުރެވެ އެވެ.
މީގެއިތުރުން ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން ސަރުކާރުން ހުށަހެޅި ހުށަހެޅުމާ ގުޅޭގޮތުން ރައްޔިތުންގެ މެދުގައި ނެގި ފެންނަ ނުފެންނަ ވޯޓުގައި ސަރުކަރުގެ ހުށަހެޅުމަށް 68 ޕަސަންޓު ރައްޔިތުން ވަނީ ނޫނެކޭ ބުނެފަ އެވެ.
