އަދަދު ނޫހުގެ އޮފީހަށް ފުލުހުން ވަދެ އެ ނޫހުގެ މަސައްކަތްތަކަށް ހުރަސްއަޅައި، ނޫސްވެރިންނަށް ބިރުދައްކަމުން ދަނީ ބަދަލުހިފުމުގެ ގޮތުން ކަމަށާއި ބޭނުމަކީ ނޫސްވެރިކަން ކުށަކަށް ހެދުން ކަމަށް ރިޕޯޓާސް ވިތައުޓް ބޯޑާސް އިން ބުނެފި އެވެ.
އެ ޖަމިއްޔާއިން މިއަދު ސޯޝަލްމީޑިއާގައި އާންމުކުރި ކުރު ބަޔާނެއްގައި ބުނީ ފުލުހުން އަދަދު ނޫހަށް ވަދެފައި ވަނީ ރައީސުލްޖުމްހޫރިއްޔާގެ މައްޗަށް، ރައީސް އޮފީހުގައި ކުރިން މަސައްކަތް ކުރި އަންހެން މުވައްޒަފަކު ކުރާ ތުހުމަތުތަކެއްގެ މައްޗަށް ތައްޔާރުކޮށް ޑޮކިއުމެންްޓްރީއެއް ގެނެސްދިންތާ މާގިނަ ދުވަހެއް ނުވަނީސް ކަމަށެވެ.
"މިއީ ބަދަލު ހިފުމުގެ ގޮތުން ނޫސްވެރިކަން ކުށަކަށް ހެދުން. މިކަން ވަގުތުން ވަގުތަށް ހުއްޓާލަންޖެހޭ،" އާރުއެސްއެފްގެ ބަޔާނުގައި ބުންޏެވެ.
ބައިނަލްއަގުވާމީ ޖަމިއްޔާތަކުން ދަނީ މި މައްސަލައިގައި ދިވެހި ސަރުކާރަށް ފާޑުކިޔަމުންނެވެ. ނޫސްވެރިކަމުގެ މިނިވަންކަމަކީ ގާނޫނުއަސާސީން ކަށަވަރުކޮށްދީފައިވާ ހައްގަކަށްވާއިރު، ސަރުކާރަށް ފާޑުކިޔާ މީޑިއާތަކަށް އަމާޒުކޮށް މިފަދަ ފިޔަވަޅުތައް އެޅުމަކީ ރާއްޖޭގެ ނޫސްވެރިކަމުގެ މިނިވަންކަމުގެ ދަރަޖަ ދަށަށް ދިޔުންކަމަށް ގިނަ ބަޔަކު ވަނީ ސިފަކޮށްފަ އެވެ.
ރިޕޯޓާސް ވިތައުޓް ބޯޑާސްއަކީ ނޫސްވެރިކަމާއި ނޫސްވެރިންގެ ހައްގުގައި މަސައްކަތްކުރާ ބައިނަލްއަގުވާމީ ޖަމިއްޔާއެކެވެ. ކޮންމެ އަހަރަކު ނެރޭ ވޯލްޑް ޕްރެސް ފްރީޑަމް އިންޑެކްސްއަކީ އެ ޖަމިއްޔާއިން ތައްޔާރުކުރާ އެއްޗެކެވެ.
