ޗައިނާގެ ސަންޔާ، ހައިނާން އައިލެންޑްގައި ކުރިއަށްދިޔަ ހަ ވަނަ އޭޝިއަން ބީޗް ގޭމްސްގެ ބީޗްހޭންޑްބޯޅަ އިވެންޓުގައި ވާދަކުރި ރާއްޖޭގެ ގައުމީ ފިރިހެން ބީޗްހޭންޑްބޯޅަ ޓީމު ދެކުނު އޭޝިއާ ސަރަހައްދުގެ ގައުމުތަކަށް ބަލާއިރު ދެ ވަނަ ލިބިއްޖެ އެވެ.
މުޅި މުބާރާތުގެ ރޭންކިން އަށް ބަލާއިރު، ރާއްޖެ އަށް 14 ގައުމުގެ ތެރެއިން ލިބުނީ 10 ވަނަ އެވެ. ރާއްޖެ އަށް ވުރެން މަތިން މި ސަރަހައްދުން ރޭންކުކުރެވުނީ، ޕާކިސްތާން އެވެ. ރާއްޖެ އަށް ވުރެން ފަހަތުން ނިންމި މި ސަރަހައްދުގެ ގައުމުތަކަކީ، ބަންގްލަދޭޝާއި ސްރީ ލަންކާ އެވެ.
ރާއްޖޭން ފިރިހެން ބީޗްހޭންޑްބޯޅަ ޓީމު އެކަނި ވާދަކުރިއިރު، މި އިވެންޓުގަައި ޖުމްލަ އެކު، 14 ގައުމުން ވާދަކުރި އެވެ.
ބީޗްހޭންޑްބޯޅަ އިވެންޓުގައި ފިރިހެން ބައިން ރަން މެޑަލް ހޯދީ އިރާން އެވެ. ދެ ވަނަ އަށް ގަަތަރު ދިޔައިރު، ލޯ މެޑަލް ހޯދީ ތައިލެންޑް އެވެ. ހަތަރު ވަނައިގައި ބަހުރޭން އޮތްއިރު، ފަސް ވަަނައިގައި އޮތީ އޮމާން އެވެ. ހަ ވަނައިގައި ޖޯޑަން އޮތްއިރު، ހަތް ވަނައިގައި އޮތީ ޕާކިސްތާން އެވެ. ޗައިނާ އަށް ވަނައިގައި، ފިލިޕީންސް ނުވަ ވަނައިގައި އޮތްއިރު، 10 ގައި އޮތީ ރާއްޖެ އެވެ.
ފަހު ހަތަރަކަށް ބަލާއިރު، 11 ވަނައިގައި ބަންގްލަދޭޝް އޮތްއިރު، 12 ވަނައިގައި އޮތީ ހޮންގް ކޮންގް އެވެ. އަދި، އެ އަށް ފަހު ދެން އޮތީ ސްރީ ލަންކާ އާއި މޮންގޯލިއާ އެވެ.
އަފްގާނިސްތާންގެ ކޯޗު، ޒަބީއުﷲ އިސްލާމްޔާރުގެ އިރުޝާދުގެ ދަށުން ގައުމީ ބީޗްހޭންޑްބޯޅަ ޓީމުން ބީޗްގޭމްސް އަށް ތައްޔާރުވީ، ތައިލެންޑުގައި ޓްރެއިނިން ކޭމްޕެއް ފުރިހަމަކޮށްފަ އެވެ. މިއީ، ރާއްޖޭގެ ބީޗްހޭންޑްބޯޅަ ޓީމުގެ ތިން ވަނަ ބައިނަލްއަގުވާމީ މުބާރާތެވެ. އެންމެ ފުރަތަމަ މިދިޔަ، އަހަރުގެ އޭޝިއާ މުބާރާތުގައި އޮމާންގައި ވާދަކުރިއިރު، އޭގެ ފަހުން، ހދ. ކުޅުދުއްފުށީގައި ކޮމަންވެލްތު ބީޗްހޭންޑްބޯޅަ މުބާރާތެއް ހޯސްޓްކޮށް، ރާއްޖޭން ތިން ވަނަ ހޯދި އެވެ.
މި ފަހަރުގެ އޭޝިއަން ބީޗްގޭމްސްގައި ރާއްޖޭން ވަނީ ބަންގްލަދޭޝާއި މޮންގޯލިއާ އަތުން މޮޅުވެފަ އެވެ. އެކަމަކު، ގަތަރު، ޖޯޑަން، ތައިލެންޑް، އޮމާން އަދި ޕާކިސްތާން އަތުން ވަނީ ބަލިވެފަ އެވެ.
މޮންގޯލިއާ އަތުން ފަހަތުން އަރައި މޮޅުވިއިރު، ބަންގްލަދޭޝް އަތުން މޮޅުވީ 2-1 އިންނެވެ. ބަންގްލަދޭޝް މެޗުގެ ނަތީޖާ ދިޔައީ، 12-21، 23-22 އަދި 7-4 އިންނެވެ. މޮންގޯލިއާ މެޗުގެ ނަތީޖާ ނުކުތީ، 13-11، 9-13 އަދި 6-8 އިންނެވެ.
ބަލިވި މެޗުތަކަށް ބަލާއިރު، ޖޯޑަން އަތުން ބަލިވީ 14-06، 16-13 އިންނެވެ. އޮމާން އަތުން 22-10، 16-12 އިން ބަލިވިއިރު، ތައިލެންޑް އަތުން ބަލިވީ 22-12، 18-12 އިންނެވެ. ޕާކިސްތާން އަތުން 12-20، 12-18 އިން ބަލިވިއިރު، ވަރުގަދަ ގަތަރު އަތުން ބަލިވީ، 12-26، 12-18 އިންނެވެ.
އޭޝިއަން ބީޗް ގޭމްސްގެ ހަ ވަަނަ އެޑިޝަން ސަންޔާގައި ހޯސްޓްކުރަން ފުރަތަމަ ރޭވީ 2020 ވަނަ އަހަރު އެވެ. އެކި ސަބަބުތަކާ ހުރެ މުބާރާތް ލަަސްވެ، މި ފަަހަރު ބޭއްވުނުއިރު، ރާއްޖޭން ވާދަކުރީ ބީޗްހޭންޑްބޯޅަ ޓީމުގެ އިތުރުން، ސްވިމިން ގައުމީ އެތުލީޓުންނާއި ގައުމީ ބީޗްވޮލީބޯޅަ ޓީމުގެ އިތުރުން، އެތުލެޓިކްސް ގައުމީ ޓީމުންނެވެ.
ސަންޔާ ބީޗްގޭމްސްގައި މި ފަހަރު 45 ގައުމުން 1790 އެތުލީޓުން ވާދަކުރި ކަމަށް ގޭމްސް އިންތިޒާމްކުރާ ފަރާތުން މައުލޫމާތު ދީފައިވެ އެވެ. މި ފަހަރުގެ ގޭމްސްގައި ހިމެނުނީ، 14 ކުޅިވަރަކުން 15 ޑިސިޕްލިން އަދި 62 އިވެންޓެވެ.
