ޗައިނާގެ ސަންޔާ، ހައިނާން އައިލެންޑްގައި ކުރިއަށްދާ، ހަ ވަނަ އޭޝިއަން ބީޗް ގޭމްސްގެ ބީޗްހޭންޑްބޯޅަ އިވެންޓުގައި ރާއްޖޭގެ ބީޗްހޭންޑްބޯޅަ ޓީމުން ކުޅުނު ފުރަތަމަ މެޗުން ބަންގްލަދޭޝް އަތުން މޮޅުވެއްޖެ އެވެ.
ބީޗް ހޭންޑްބޯޅަ އިވެންޓުގައި، ރާއްޖެ ހިމެނެނީ ގްރޫޕް ބީގަ އެވެ. އެއީ، އޮމާން، ޕާކިސްތާން، ޖޯޑަން، ބަންގްލަދޭޝް، ތައިލެންޑް، ގަތަރު އަދި މޮންގޯލިއާއާ އެކުގަ އެވެ.
ގްރޫޕް ސްޓޭޖުގައި ރާއްޖޭން ކުޅުނު ފުރަތަމަ މެޗުގައި ޕެނަލްޓީ ޖަހައިގެން ބަންގްލަދޭޝް ބަލިކުރީ 2-1 އިންނެވެ. މި މެޗުގެ ފުރަތަމަ ސެޓުގެ ކުރީކޮޅުގައި، ބަންގްލަދޭޝް އާއި ރާއްޖޭގެ ފަރާތުން، ހަމަހަމަ ކުޅުމެއް ފެނުނު ނަމަވެސް، އެ ސެޓްގެ ފަހުކޮޅުގައި ބަންގްލަދޭޝްއިން ވަނީ ލީޑު ނަގައި، ލީޑު ފުޅާވެސް ކޮށްފަ އެވެ. ނަތީޖާއެއްގެ ގޮތުން އެ ސެޓު ބަންގްލަދޭޝްއިން ކާމިޔާބުކުރީ 12-21 އިންނެވެ. ފުރަތަމަ ސެޓު ރާއްޖެ އަތުން ދިޔަ ނަމަވެސް ދެ ވަނަ ސެޓުގައި ތަފާތު ދެއްކި އެވެ. އެ ސެޓު ރާއްޖޭން 26-23 އިން ގެންގޮސްފައިވާ އިރު، ޓީމުގައި ހުރި އެންމެ ތަޖުރިބާކާރު އެއް ކުޅުންތެރިޔާ، ފަތުހުﷲ އާދަމް ވަނީ 10 ގޯލް ޖަހައިފަ އެވެ. އަދި، މުހައްމަދު ޝަމްނޫޒް ނައީމް ވަނީ 14 ގޯލް ޖަހައިފަ އެވެ. މެޗު ޕެނަލްޓީ އަށް ގޮސް މޮޅުވީ 7-4 އިންނެވެ. ޕެނަލްޓީގައި ރާއްޖޭގެ ކީޕަރު އަހުމީމް އަލީ ވަނީ މޮޅު ސޭވްތަކެއް ކޮށްފައެވެ.
މިދިޔަ އަހަރު ހދ. ކުޅުދުއްފުށި ސިޓީގައި ކުރިއަށްދިޔަ، ކޮމަންވެލްތު ބީޗް ހޭންޑްބޯޅަ މުބާރާތުން ރާއްޖޭން ލޯ މެޑަލް ހޯދީ ތިން ވަނަ ހޮވި މެޗުގައި ބަންގްލަދޭޝް އަތުން ފަހަތުން އަރައި 2-1 އިން މޮޅުވެެގެންނެވެ. އެ މުބާރާތުގެ ލީގު ބުރުގައި ޕެނަލްޓީ ޝޫޓްއައުޓަށް ގޮސްގެން ބަންގްލަދޭޝް އަތުން ބަލިވިއިރު، ތިން ވަނަ ހޮވި މެޗުގައި ރާއްޖޭން ބަންގްލަދޭޝް ބަލިކުރީ ފަހަތުން އަރައި، ޝޫޓްއުޓަށް ގޮސްގެންނެވެ.
ރާއްޖެ ގަނޑިން މިއަދު 14:00 ގައި، ގްރޫޕްގަައި ކުޅޭ ދެ ވަނަ މެޗުގައި، ގައުމީބީޗްހޭންޑްބޯޅަ ޓީމުން ޖޯޑަންއާ ބައްދަލުކުރާނެ އެވެ.
ރާއްޖެ ހިމެނޭ ގްރޫޕްގަައި ބީޗްހޭންޑްބޯޅައިގެ އެންމެ ފަހުން، 2024 ގައި ބޭއްވި ވޯލްޑް ޗެމްޕިއަންޝިޕްގައި ވާދަކުރި ދެ ގައުމެއް ހިމެނެ އެވެ. އެއީ، އޮމާން އާއި ގަތަރެވެ. މި އަހަރުގެ ދުނިޔޭގެ މުބާރާތުގައި އޭޝިއާ އިން ވާދަކުރަނީ އިރާން އާއި އޮމާން އެވެ. އެއީ، މިދިޔަ އަހަރުގެ އޭޝިއާގެ މުބާރާތުގެ ފައިނަލުގައި ކުޅުނު ދެ ޓީމެވެ. ރާއްޖޭން ގްރޫޕްގައި ކުޅޭ ތިން ވަނަ މެޗުގައި ބުރާސްފަތި ދުވަހު މޮންގޯލިއާއާ ކުޅޭނެ އެވެ. އަދި، ހުކުރު ދުވަހު، އޮމާނާއި ތައިލެންޑާ ދެކޮޅަށް ކުޅޭ ދެ މެޗު އޮންނާނެ އެވެ. ހޮނިހިރު ދުވަހު، ޕާކިސްތާނާ ދެކޮޅަަށް ކުޅުމަށް ފަހު، ގްރޫޕްގެ ފަހު މެޗުގައި، އާދިއްތަ ދުވަހު ގަތަރާ ވާދަކުރާނެ އެވެ.
ސަންޔާ ބީޗްގޭމްސް އަށް ދިއުމުގެ ކުރިން ގައުމީ ބީޗްހޭންޑްބޯޅަ ޓީމުން ވަނީ ތައިލެންޑުގައި ޓްރެއިނިން ކޭމްޕެއް ކުރިއަށްގެންގޮސްފަ އެެވެ.
އޭޝިއަން ބީޗް ގޭމްސްގެ ހަ ވަަނަ އެޑިޝަން ސަންޔާގައި ހޯސްޓްކުރަން ފުރަތަމަ ރޭވީ 2020 ވަނަ އަހަރު އެވެ. ބީޗް ގޭމްސްގައި ރާއްޖޭން މި ފަހަރު ހަތަރު ކުޅިވަރަކުން ވާދަކުރާނެ އެވެ އެއީ، ބީޗްހޭންޑްބޯޅައިގެ އިތުރުން، އެތުލެޓިކްސް، ސްވިމިން އަދި ވޮލީބޯލް އެވެ. ރާއްޖޭން ވާދަކުރާ ކުޅިވަރުތަކުގެ ތެރެއިން ހޭންޑްބޯލް ފިޔަވައި، ދެން އޮތް ހަަތަރު ކުޅިވަރުގައި ވެސް ދެ ޖިންސުން އެތުލީޓުން ވާދަކުރާނެ އެވެ. ހޭންޑްބޯލް އިން ވާދަކުރަނީ ހަމައެކަނި ފިރިހެން ޓީމެވެ.
