އިންތިހާބުތައް ނިމުމަށްފަހު އެއްވެސް ފިޔަވަޅެއް ނާޅާނެ ކަމުގެ ޔަގީންކަން ސަރުކާރުން ދީފައި ވަނިކޮށް އިންތިހާބު ނިމުނުތާ ދެ ދުވަސް ނުވަނީސް، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ވިއްކާ ތެޔޮ މަސްދަޅުގެ އަގުބޮޑުކުރީ މަޝްވަރާ ނުކޮށް ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސައީދު ވިދާޅުވީ ހަނގުރާމައިގެ މި ހާލަތުގައި ސަރުކާރުގެ އެއްވެސް ކުންފުންޏަކުން ބޮޑު ނިންމުމެއް ނިންމާއިރު އެކަން މުހައްމަދު މުއިއްޒުއަށް އަންގަން ޖެހޭއިރު އެކަން އެގޮތަށް ކޮށްފައި ނުވާ ކަމަށެވެ.
"މިފްކޯއިން މަސްދަޅަށް ބަދަލު ގެނައި އިރަކު އަޅުގަނޑުމެންނަކަށް ނޭނގޭ އެކަމެއް. އެނގޭތޯ. މިފްކޯއަކީ ވަކި މެނޭޖްމަންޓެއް އޮންނަ ކުންފުންޏެއް ސަރުކާރުގެ. އަޅުގަނޑުމެން މިދަންނަވަނީ ކޮންމެހެން އެނގެން ޖެހޭ ވާހަކައެއްވެސް ނޫން،" ސައީދު ވިދާޅުވި އެވެ.
"އެހެންނަމަވެސް މިހާލަތުގައި ސަރުކާރާއި ސަރުކާރާ ގުޅުންހުރި އެއްވެސް ކުންފުންޏަކުން ކަމެއް ކުރެއްވިޔަސް ރައީސަށް ބޭނުންފުޅުވާނެ އޭގެ މައުލޫމާތުތައް. އެއީ ހަނގުރާމައިގެ ހާލަތެއް ދުނިޔޭގައި ހިނގަމުންދާ ވަގުތެއް."
ސައީދު ވިދާޅުވީ މަސްދަޅުގެ އަގުބޮޑުވެއްޖެކަން ނޫސްތަކުން ރިޕޯޓްކުރުމުން އެކަމާ ގުޅިގެން ކުރަންޖެހޭ މަޝްވަރާތައް ކުރި ކަމަށާއި މަސްދަޅު އަގުހެޔޮކުރަން މިފްކޯއިން ނިންމީ ރައްޔިތުންގެ ފާޑުކިޔުން އެކަމަށް އަމާޒުވުމުން ނޫން ކަމަށެވެ.
"އެހެންވީމަ މަސްދަޅުގެ އަގު ބޮޑުވެއްޖެކަން ނޫސްތަކުގައި ރިޕޯޓްކޮށްފައި ހުރީމަ އަޅުގަނޑަށް އެނގުނު ހިސާބުން ފެށިގެން އަޅުގަނޑު އެވާހަކަ ގެންދިޔައީ ކޮމިއުނިކޭޓް ކުރަމުން. ފާޑުކިޔުން އަމާޒުވެގެނެއް ނޫން އެނގޭތޯ މަސްދަޅުގެ އަގު ހެޔޮކުރަން ދިމާވީކީ،" ސައީދު ވިދާޅުވި އެވެ.
ރާއްޖެއިން އެއްވެސް އެއްޗެއް ހުސްވުމަކީ، އެއްވެސް އެއްޗެއް ލިބުން ދަތިވުމަކީ އަދި އެއްވެސް އެއްޗެއް އަގުބޮޑުވުމަކީ މުއިއްޒު ބޭނުންވާނެ ކަމެއް ނޫންކަން ފާހަގަކުރައްވާ ސައީދު ވިދާޅުވީ ހުރިހާ ކަމެއް ބަލައި މޮނިޓާކުރަމުންދާ ކަމަށެވެ.
މީގެއިތުރުން ހަނގުރާމައިގެ ހާލަތުގައި އެއްވެސް އެއްޗެއްގެ އަގުބޮޑުކުރާނަމަ އެކަން ވަރަށް ބޮޑަށް ދިރާސާކުރަން ޖެހޭ ކަމަށާއި މަޝްވަރާ ނުކޮށް އެއްވެސް ރައްޔިތަކަށް އަސަރުކުރާ ގޮތަށް ނިންމުމެއް ނިންމުމަށް ބޭނުން ނުވާ ކަމަށް ސައީދު ވިދާޅުވި އެވެ.
ދުނިޔޭގެ ބާޒާރުގައި ތެލުގެ އަގަށް އައި ބަދަލާއެކު، މަސްދަޅު އުފެއްދުމަށް ހިނގާ ހަރަދު ވަރަށް ބޮޑަށް މައްޗަށް ދިޔުމާ ގުޅިގެން ކަމަށް ބުނެ މިދިޔަ ހޯމަ ދުވަހު މެންދުރު ތެޔޮ މަސްދަޅެއްގެ އަގު 18.50ރ. އަށް ބޮޑުކުރިއިރު، މަސްދަޅު ކޭހެއްގެ އަގުބޮޑުކުރީ 800ރ. އަށެވެ.
ނަމަވެސް މިފްކޯއިން ވަނީ ކުރިން ތެޔޮ މަސްދަޅު ވިއްކި އަގު ކަމަށްވާ 17.50ރ. އަށް އަގު ކުޑަކޮށްފަ އެވެ. އެއާއެކު، ތެޔޮ މަސްދަޅު ކޭހެއް މިހާރު ކުރިން ވިއްކި އަގު ކަމަށްވާ 760ރ. އަށް ލިބެ އެވެ.
މާޗު މަހުގެ ކުރިން 11.57ރ. އަށް ލިބުނު ތެޔޮ ލީޓަރެއް މިހާރު މިފްކޯއަށް ލިބެނީ 14.32ރ. އަށް ކަން އެ ކުންފުނިން ފާހަގަކުރި އެވެ.
މިފްކޯއިން ވަނީ އެ ކުންފުނީގެ މައި އޮފީހާއި ސެންޓަރުތަކުގެ އިދާރީ އޮފީސްތައް ހުޅުވާ ގަޑި ހެނދުނު 8:00 އިން މެންދުރު 2:00 އަށް ވަނީ ކުރުކޮށްފަ އެވެ. މީގެ ކުރިން ހަވީރު ހަތަރެއް ޖަހަންދަން އޮފީސްތައް ހުޅުވާފައި ހުރެ އެވެ.
މިފްކޯއަކީ ސަރުކާރު ހިއްސާވާ ކުންފުނިތަކުގެ ތެރެއިން ދުވަސްވީ ކުންފުންޏެއް ނަމަވެސް، ހިންގުމުގައި އެތައް މައްސަލަތަކެއް ހުރި ކުންފުންޏެކެވެ. އެ ކުންފުންޏަށް ލިބޭ އާމްދަނީން ކުންފުނީގެ ހަރަދުތައް ދެކޮޅު ނުޖެހޭއިރު، ހަރަދުތައް ހަމަޖައްސަން ބަރޯސާވަނީ ސަބްސިޑީތަކަށެވެ.
