ރައްޔިތުންގެ މަޖިލީހުގެ މެންބަރުން ފްލޯ ކްރޮސްކޮށްފި ނަމަ ނުވަތަ އެމީހަކު އެހެން ސިޔާސީ ޕާޓީއަކާ ގުޅިއްޖެ ނަމަ މެންބަރުކަމުން ވަކިވާނެ ކަމަށް ބުނެ ގާނޫނުއަސާސީއަށް ރައްޔިތުންގެ މަޖިލީހުން ބަދަލު ގެނައީ ކުޅުމުގެ މެދުތެރެއިން ގަވާއިދު ބަދަލުކުރާހެން ކަމަށް ސުޕްރީމް ކޯޓުގެ ފަނޑިޔާރު އާއިޝަތު ޝުޖޫން މިއަދު ވިދާޅުވެއްޖެ އެވެ.
ގާނޫނުއަސާސީއަށް ގެނައި އިސްލާހު ބާތިލް ކުރަން ނުޖެހޭ ކަމަށް ސުޕްރީމް ކޯޓުން މިއަދު ނިންމެވި ނިންމެވުމާ ދެކޮޅަށް ހަމައެކަނި ރައުޔު އިއްވަވަައި ޝުޖޫން ވިދާޅުވީ ގާނޫނުއަސާސީއަށް ގެނައި އިސްލާހު ބާތިލް ކުރަން ފެންނަ ކަމަށެވެ. އެއީ ގާނޫނުއަސާސީއާ ހިލާފަށް ގެނައި ބަދަލެއް ކަމަށް ވެސް ރައުޔު އިއްވަވަމުން ފަނޑިޔާރު ވިދާޅުވި އެވެ.
ޝުޖޫން ވިދާޅުވީ މިސާލެއް ބޭނުންކޮށްގެން ތިލަކުރާނަމަ ގަވާއިދުތަކުގެ މައްޗަށް ބިނާކުރާ ކުޅިވަރެއް ރައްޔިތުން ކުޅެނިކޮށް ބަދަލުގެނައީ އެއްވެސް އަހާލުމެއް އަދި މަޝްވަރާއެއް ނެތި ކުޅުމުގެ މެދުތެރެއިން ކަމަށެވެ.
"ގާނޫނުއަސާސީއަށް ގެނެސްފައިވާ އިސްލާހު، ދައުލަތުގެ ފަރާތުން މާނަކުރާގޮތަށް ބެލި ނަމަވެސް، ގާނޫނުއަސާސީގެ 73 ވަނަ މާއްދާގެ (ބ) ގެ 2 ގައި ހިމަނާފައިވަނީ އެ ބަޔަކު ރައްޔިތުންގެ މަޖިލީހަށް ހޮވިއިރު ނެތް ޝަރުތެއް. މިސާލެއް ބޭނުންކޮށްގެން ތިލަކުރާނަމަ، ގަވާއިދުތަކުގެ މައްޗަށް ބިނާކުރާ ކުޅިވަރެއް ރައްޔިތުން ކުޅެމުންދަނިކޮށް އެނގުމެއް، އަހާލުމެއް އަދި މަޝްވަރާ ކުރުމެއް ނެތި ކުޅުމުގެ މެދުތެރެއިން ގަވާއިދު ބަދަލުވުމުގެ ހާލަތެއް،" ފަނޑިޔާރު ޝުޖޫން ވިދާޅުވި އެވެ.
ޝުޖޫން ވިދާޅުވީ މި އިސްލާހު ގާނޫނުއަސާސީއަށް ގެނެސްފައިވަނީ ދައުލަތުގެ އެކި ބާރުތަކަށް އެ ބާރުތައް ދީފައިވާ ގޮތުގެ މައްޗަށް ޖުމްލަކޮށް ނަޒަރު ކުރުމުން ގާނޫނު އަސާސީން އެކަށަ އަޅާފައިވާ އުސޫލުތަކާ ހިލާފަށް ކަމަށެވެ.
"މި އިސްލާހަށް ރަޖުއީކޮށް އަމަލުކުރުމަކީ ދިވެހިރާއްޖޭގެ ގާނޫނުއަސާސީ ބިނާކޮށްފައި އޮތް ގޮތާއި ގާނޫނުއަސާސީ އަތުރާފައިވާ ގޮތާއި ގާނޫނުއަސާސީން ކަށަވަރު ކޮށްދީފައިވާ ހައްގުތަކާއި ޒިންމާތަކަށް އަދި އޭގެއިންވެސް ހާއްސަކޮށް ގާނޫނުއަސާސީއާ އެއްގޮތަށް އަމަލުކުރުމަށާއި 2 ވަނަ ބާބުގައި ބަޔާންވެގެންވާ ހައްގުތަކާއި މިނިވަންކަން ހިމާޔަތްކޮށް ކުރިއެރުވުމަށް މުޅި ދައުލަތަށް މަތިކޮށްފައިވާ ވާޖިބާއި އަދި ދައުލަތުގެ އެކި ބާރުތަކަށް އެ ބާރުތައް ދީފައިވާ ގޮތުގެ މައްޗަށް ޖުމްލަކޮށް ނަޒަރު ކުރުމުން ގާނޫނު އަސާސީން އެކަށަ އަޅާފައިވާ އުސޫލުތަކާ ހިލާފު ކަމެއް ކަމަށް އަހުރެން ދެކެން،" ޝުޖޫން ވިދާޅުވި އެވެ.
ގާނޫނުއަސާސީއަށް ގެނައި އިސްލާހު ބާތިލް ކުރަން ނުޖެހޭ ކަމަށް އެންމެ މަތީ ކޯޓުން މިއަދު ނިންމީ އެ ކޯޓުގެ ހަތް ފަނޑިޔާރުންގެ ތެރެއިން ހަ ފަނޑިޔާރެއްގެ އަގުލަބިއްޔަތުންނެވެ.
އެ މައްސަލައިގައި މިއަދު ހުކުމް ކުރައްވަމުން އުއްތަމަ ފަނޑިޔާރު އަބްދުލްޣަނީ މުހައްމަދު ވިދާޅުވީ ގާނޫނުއަސާސީ މި ސަރުކާރުން ގެނައި އިސްލާހު ބާތިލް ކުރަންޖެހޭ އެއްވެސް އަސާސެއް ނެތް ކަމަށެވެ.
"ގާނޫނުއަސާސީގެ 73 ވަނަ މާއްދާއަށް ގެނެސްފައިވާ އިސްލާހަކީ ދުސްތޫރީ ބާރުވެރިކަން ލިބިގެންނުވާ ބާތިލު އިސްލާހެއް ކަމަށް ކަނޑައެޅޭނެ އެއްވެސް ހަމައެއް ނެތް،" އުއްތަމަ ފަނޑިޔާރު ވިދާޅުވި އެވެ.
ސިޔާސީ ޕާޓީއަކުން ވަކިވެއްޖެ ނަމަ އެމީހަކު ތަމްސީލު ކުރާ ސިޔާސީ ޕާޓީ ބަދަލުކޮށްފި ނަމަ ރައްޔިތުންގެ މަޖިލީހުގެ ގޮނޑި ގެއްލޭނެ ކަމަށް ބުނާ މާއްދާ ގާނޫނުއަސާސީއަށް އިތުރު ކުރީ 2024 ވަނަ އަހަރެވެ.
އޭގެ ފަހުން ސުޕްރީމް ކޯޓަށް އެ މައްސަލަ ހުށަހަޅައި، ކޯޓުން އެ މައްސަލަ ބަލަމުންދަނިކޮށް ތިން ފަނޑިޔާރަކު ވަނީ ސަސްޕެންޑުކޮށްފަ އެވެ. ސަސްޕެންޑު ކުރި ދެ ފަނޑިޔާރަކު ފަހުން މަގާމުން ވަކިކުރިއިރު، އެއް ފަނޑިޔާރަކު އަމިއްލައަށް އިސްތިއުފާ ދެއްވީ އެވެ.
ސުޕްރީމް ކޯޓުން މިއަދު މައްސަލަ ނިންމީ މި ސަރުކާރުން ފަހުން އައްޔަން ކުރި ތިން ފަނޑިޔާރަކު ހިމަނައިގެންނެވެ.
